Views: 8
ប្រែសម្រួលៈបំណង(ស្ត្រេតថែមស៍)៖ យោធាអ៊ីស្រាអែលបាននិយាយថា ខ្លួនបានវាយប្រហារទីក្រុងហ្កាហ្សា(Gaza)កាលពីរំលងអធ្រាតឈានចូលថ្ងៃព្រហស្បតិ៍នៅប៉ុន្មានម៉ោងក្រោយគ្រាប់រ៉ុក្កែតមួយគ្រាប់ត្រូវបានបាញ់ចេញពីហ្កាហ្សានិងក្រោយពីមានការអំពាវនាវពីអាម៉េរិកអោយភាគីទាំងអស់អត់ធ្មត់កុំបង្កអំពើហិង្សានៅអ៊ីស្រាអែលនិងតំបន់វែសប៊ែង(West Bank)។
មិនមានសេចក្តីរាយការណ៍អំពីការស្លាប់ឬរងរបួសមនុស្ស និងការខូចខាតបណ្តាលមកពីការវាយប្រហារនេះនៅឡើយទេ។
យោធាអ៊ីស្រាអែលបាននិយាយថា ជាការឆ្លើយតបនឹងការវាយប្រហារដោយរ៉ុក្កែតកាលពីថ្ងៃពុធ ការវាយប្រហារតាមផ្លូវអាកាសរបស់ខ្លួនផ្តោតលើទីតាំងផលិតគ្រាប់រ៉ុក្កែតនិងសព្វាវុធប្រើដោយក្រុមហាម៉ាស(Hamas)ជាក្រុមសកម្មប្រយុទ្ធអ៊ីស្លាមដែលគ្រប់គ្រងតំបន់ដែលអ៊ីស្រាអែលបិទខ្ទប់នេះ។
ការផ្ទុះខ្លាំងៗបានអង្រួនបណ្តាអាគារនិងជះអណ្តាតភ្លើងអោយភ្លឺពេញមេឃនៅហ្កាហ្សានៅពេលសម្លេងសឺរ៉ែនបានបន្លឺឡើងជាថ្មីនៅតំបន់អ៊ីស្រាអែលនៅជុំវិញហ្កាហ្សាអំពីគ្រាប់រ៉ុក្កែតហោះចូលមកនៅមុនព្រឹកថ្ងៃព្រហស្បតិ៍។
នៅមិនមានការអះអាងទទួលខុសត្រូវចំពោះការបាញ់គ្រាប់រ៉ុក្កែតកាលពីថ្ងៃពុធពីក្រុមហាម៉ាស ឬចលនាអ៊ីស្លាមជីហាដគាំទ្រអ៊ីរ៉ង់មួយ ដែលកាលពីសប្តាហ៍មុនបានបាញ់គ្រាប់រ៉ុក្កែតនោះទេ។តែក្រុមមួយមកពីក្រុមរណសិរ្សប្រជាធិបតេយ្យសំរាប់រំដោះប៉ាឡេស្ទីន បាននិយាយថាខ្លួនបានបាញ់រ៉ុក្កែតដាក់អ៊ីស្រាអែលកាលពីដើមថ្ងៃព្រហស្បតិ៍ ដើម្បីឆ្លើយតបនឹងការវាយប្រហារតាមផ្លូវអាកាសនិងការរំលោភជាប្រព័ន្ធលើអ្នកទោសប៉ាឡេស្ទីននៅក្នុងគុកអ៊ីស្រាអែល។
ការវាយប្រហារគ្នាទៅវិញទៅមកនេះបញ្ជាក់ពីភាពតានតឹងរវាងអ៊ីស្រាអែលនិងប៉ាឡេស្ទីន ក្រោយខ្មាន់កាំភ្លើងប៉ាឡេស្ទីនម្នាក់បាញ់សម្លាប់មនុស្សប្រាំពីរនាក់នៅក្បែរអាគារជនជាតិជ្វីហ្វមួយនៅក្រុងហ្សេរុយសាឡឹមខាងកើត និងអ៊ីស្រាអែលឆ្មក់វាយប្រហារចូលជំរំជនភៀសខ្លួននៅវេសប៊ែងសម្លាប់ជនប៉ាឡេស្ទីនដប់នាក់។
រដ្ឋមន្ត្រីការបរទេសអាម៉េរិក បានទទូចសុំអោយអត់ធ្មត់កុំបង្កអំពើហិង្សាថែមក្នុងពេលលោកបញ្ចប់ដំណើរទស្សនកិច្ចតំបន់នេះកាលពីថ្ងៃអង្គារ ៕
អណ្តាតភ្លើងនិងផ្សែងហុតលើអាការនៅទីក្រុងហ្កាហ្សា នៅពេលអ៊ីស្រាអែលធ្វើការវាយប្រហារតាមផ្លូវអាកាសកាលពីយប់ឈានចូលថ្ងៃ២កុម្ភៈ