Views: 1
ដោយៈ ដកស្រង់ពីវចនានុក្រមសម្តេចសង្ឃរាជ ជួន ណាត
ព្រត
(ព្រត់)
នាមសព្ទ
( ព. បុ. សំ. ( វ្រត, វ>ព=ព្រត; បា. វត ) ផ្នួស, ការបួសជាឥសី
ព្រះវេស្សន្ដរទ្រង់លាព្រតគឺព្រះអង្គទ្រង់សឹកចាកផ្នួសជាឥសី… ( ម. កណ្ឌមហារាជបព្វៈ )។
សាងព្រត គឺសាងផ្នួស ។ កាន់ព្រត គឺកាន់សីលធម៌សម្រាប់អ្នកបួស ។ ប្រព្រឹត្តមិនឲ្យល្អៀងអំពីព្រត គឺប្រព្រឹត្តមិនឲ្យមានមោះហ្មងឃ្លាតចាកសីលធម៌របស់អ្នកបួស ( ច្រើនប្រើចំពោះតែចរិយារបស់ឥសី, ឯខាងបព្វជិតពុទ្ធសានិកច្រើនតែប្រើពាក្យថា ផ្នួស ) ។
ព្រនាក់បំពង់
នាមសព្ទ
អ្នកទំនុកទុកចិត្តដែលតាមកំដរជាគ្នា
មានព្រនាក់បំពង់តាមជានិច្ច ។
ព្រហក់
(–ហ៊ក់)
មើលពាក្យ ប្រហុក ។ ព្រហក់កន្ដរ៉ ( ព្រហ៊ក់កន់-ត-រ៉ ) ឬ ព្រហក់តរ៉ ឈ្មោះព្រហក់មួយប្រភេទ, ធ្វើតាមបែបលាវ, គេហាលត្រីចង្វាតូចៗ ដូចយ៉ាងត្រីចង្វាមូល, ត្រីស្លឹកឫស្សីជាដើមឲ្យស្ងួតក្រៀម ហើយដាក់ញាត់សង្កត់ឲ្យណែនក្នុងបំពង់ឫស្សីស្ងួត ( ច្រើនប្រើបំពង់វែង ២ ថ្នាំង ) រួចយកដីស្អិត ( ដែលលញ់ធ្វើជាឆ្នុកហាលថ្ងៃឲ្យស្ងួតស្រេច ) ញាត់បិទមាត់បំពង់នោះឲ្យជិតស្លុងមិនឲ្យខ្យល់ចូលបាន, ទុកប្រើការបានយូរ, សម្រាប់ស្លឬចៀនខ្លាញ់ជាដើម, ជាអាហារសម្រាប់ស្រុកដែលក្រត្រី ( លាវហៅ ប៉ាតៅ ឬ ប៉ាតៅប័ង, តែ លាវប្រើញាត់បំពង់ឫស្សីក៏មាន ដាក់នឹងអ្វីៗឯទៀតក៏មាន ឯប៉ាតៅប័ង ប្រើចំពោះតែដាក់ញាត់នឹងបំពង់ឫស្សីម្យ៉ាង ) ។
ព្រឹក
នាមសព្ទ
វេលាចាប់តាំងពីព្រះអាទិត្យបំព្រាងដល់ថ្ងៃពេញពន្លឺធំ; ឬដរាបដល់ថ្ងៃត្រង់ក៏នៅហៅ ព្រឹក បានដែរ
ព្រឹកល្ងាច, ទាំងព្រឹងទាំងល្ងាច ។
ព្រឹកព្រាង វេលាដែលព្រះអាទិត្យទើបរះព្រាងៗ, វេលាបំព្រាង ។
ព្រឹកស្អែក វេលាព្រឹកក្នុងថ្ងៃស្អែក ។
ភរិយាតិក្រម
(ភៈ–ក្រំ)
នាមសព្ទ
( សំ. ក្ល.; សំ. ភាយ៌ាតិក្រម ) ការប្រព្រឹត្តកន្លងចិត្តភរិយា, ការក្បត់ចិត្តប្រពន្ធ ។ ( ព. កា. )
ភរិយាតិក្រម ជាកម្មច្រឡំ ច្រឡូកដោយបាប អ្នកធ្វើអំពើ អរភ័យដរាប អរព្រោះតែច្រាប ភ័យព្រោះគេដឹង ។
Post navigation
