Views: 2
ដោយៈ ដកស្រង់ពីវចនានុក្រមសម្តេចសង្ឃរាជ ជួន ណាត
ខណ្ឌស្ករ
(ខ័នស្ក)
នាមសព្ទ
( សំ. បា. ខណ្ឌសក្ករ “ស្ករក្រាមដុំៗ” ) ឈ្មោះថ្នាំកែរោគមួយយ៉ាងស្រដៀងនឹងស្ករក្រាម ( មាននិយាយតែក្នុងក្បួនផ្សំថ្នាំពីបុរាណ ) ។ ឈ្មោះស្វាយមួយប្រភេទ ផ្លែរាងតូចខ្លី សំបកទុំហើយក៏នៅតែបៃតង ជ័រច្រើន
ស្វាយខណ្ឌស្ករ ។
ខន្ទរា
(ខ័ន-ទៈ-រា)
នាមសព្ទ
ឈ្មោះរោគកើតក្នុងបំពង់កហើមចេញមកក្រៅ
រោគកន្ទរា ។
គ
ព្យញ្ជនៈទី ៣ ក្នុងវគ្គទី ១ ជាកណ្ឋជៈ មានសំឡេងក្នុងបំពង់ក ជាសិថិល ឃោសៈ, សម្រាប់ភាសាខ្មែរ, ផ្សំនឹងស្រៈ អ អា អិ អី ។ ល ។ អុំ អំ អាំ អះ សំឡេង អ៊ អ៊ា អ៊ិ អ៊ី ។ ល ។ អ៊ុំ អ៊ំ អ៊ាំ អ៊ះ ជា គ គា គិ គី ។ ល ។ គុំ គំ គាំ គះ ។ ( ស្រៈសំឡេងធំទាំងនេះ មិនបាច់ប្រើត្រីសព្ទ ( ៊ ) ទេ គ្រាន់តែអានឲ្យមានសំឡេងធំ ផ្សំនឹងព្យញ្ជនៈសំឡេងធំ ឲ្យងាយយល់សំឡេងប៉ុណ្ណោះ ) ។
គុណសព្ទ
ឥតសំដី
មនុស្សគ ។
បើលោហជាតិវិញថាឥតសូរ
ប្រាក់គ ។
នាមសព្ទ
ឈ្មោះឈើជាដំណាំ ផ្លែមានសរសៃជាប៉ុយសំឡីសម្រាប់ច្រកញាត់ខ្នើយ, កែប, ពូក ជាដើម
ព្រះសម្ពុទ្ធទ្រង់បញ្ញត្តហាម មិនឲ្យភិក្ខុសាមណេរ ប្រើប្រាស់ពូកញាត់សំឡីគ, ទ្រង់អនុញ្ញាតឲ្យប្រើពូកញាត់ស្មៅ, ញាត់ជក់ដូងជាដើមបាន, ឯកែប, ខ្នើយឲ្យញាត់សំឡីគបាន ។
គក
នាមសព្ទ
ឈ្មោះមាន់មួយពួករូបធំៗ ច្រើនមិនសូវមានរោម, សាច់ត្រង់ណាដែលគ្មានរោមនោះ មានសម្បុរក្រហមរងាល
មាន់គក ។
គគីរ
នាមសព្ទ
ឈ្មោះឈើធំមួយប្រភេទ សាច់រឹងជាប់សម្រាប់ប្រើធ្វើទូកនិងការឯទៀតផ្សេងៗ ។ គគីរមានឈ្មោះច្រើនយ៉ាង មាន គគីរថ្ម, គគីរខ្សាច់ ជាដើម ។
Post navigation