Views: 3
ដោយ៖ រ៉ាម៉ន / ភ្នំពេញ៖ អំណោយជាអង្កររបស់សម្តេចតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុន សែន ចំនួន ៣០០ តោន ត្រូវបាននាំយកមកប្រគល់ជូន លោក ឃួង ស្រេង អភិបាលរាជធានីភ្នំពេញ ដើម្បីចូលរួមរួមចំណែកជាមួយ រដ្ឋបាលរាជធានី ភ្នំពេញ ក្នុងការជួយឧបត្ថម្ភ ជូនដល់ប្រជាពលរដ្ឋក្រីក្រ ក្នុងរាជធានីភ្នំពេញ។
ពិធីប្រគល់និងទទួលអំណោយខាងលើនេះ បានធ្វើឡើងនាព្រឹកថ្ងៃទី១ ខែកុម្ភៈ ឆ្នាំ២០២៣ ក្រោមវត្តមានលោក ឃួង ស្រេង អភិបាលរាជធានីភ្នំពេញ និងលោក ផាន់ ចាន់ធុល តំណាងអ្នកឧកញ៉ា ទ្រី ភាព និងលោកស្រី អ្នកឧកញ៉ា គៀន ស្រីនាង នៅសាលារាជធានី ភ្នំពេញ។
លោក ឃួង ស្រេង អភិបាលរាជធានីភ្នំពេញ ក្នុងឱកាសនោះ បានថ្លែងអំណរគុណយ៉ាង ជ្រាលជ្រៅ ជូនចំពោះអ្នកឧកញ៉ា និងលោកស្រី អ្នកឧកញ៉ា ដែលបាននាំយកអង្ករ ចំនួន ៣០០ តោន ដែលជាអំណោយរបស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មកប្រគល់ជូនរដ្ឋបាលរាជធានីភ្នំពេញ ដើម្បីរួមចំណែកជាមួយ រដ្ឋបាលរាជធានីភ្នំពេញ ក្នុងការជួយឧបត្ថម្ភ ជូនដល់ប្រជាពលរដ្ឋក្រីក្រ ក្នុងរាជធានី ភ្នំពេញ។
ទឹកចិត្តសប្បុរសធម៌ដ៏ថ្លៃថ្លាមួយនេះ ស្តែងឱ្យឃើញ អំពីការគិតគូរ និងក្ដីអាណិត ស្រឡាញ់ ចំពោះបងប្អូនប្រជាពលរដ្ឋក្រីក្រ ទាំងអស់ ក្នុងរាជធានីភ្នំពេញ។ កាយវិការដ៏ ប្រពៃនេះ នឹងត្រូវបានចងចាំទុក ដោយរដ្ឋបាលរាជធានីភ្នំពេញ និងអាជ្ញាធរ មូលដ្ឋានគ្រប់ លំដាប់ថ្នាក់ ក៏ដូចបងប្អូនប្រជាពលរដ្ឋទាំងអស់ នៅទូទាំងរាជធានីភ្នំពេញផងដែរ៕/V-PC
