Views: 11
ប្រែសម្រួល : កញ្ញាដាលីស (ដេល្លីម៉េល) ៖ក្រុមអ្នកស៊ើបអង្កេតរបស់អង្គការសហប្រជាជាតិបាននិយាយកាលពីថ្ងៃអង្គារទី៩សីហាថាមានភស្តុតាងច្រើនឡើងអំពីឧក្រិដ្ឋកម្មដែលបានប្រព្រឹត្តនៅក្នុងប្រទេសមីយ៉ាន់ម៉ា ចាប់តាំងពីរដ្ឋប្រហារយោធាកាលពីឆ្នាំមុន។
យន្តការស៊ើបអង្កេតឯករាជ្យរបស់អ.ស.បសម្រាប់មីយ៉ាន់ម៉ា (IIMM) បាននិយាយថាខ្លួនបានប្រមូលភស្តុតាងច្រើនឡើងអំពីការរំលោភបំពានក៏ដូចជាតម្រុយសំខាន់ៗជាច្រើនទៀតដែលបង្ហាញពីឧក្រិដ្ឋកម្មអន្តរជាតិធ្ងន់ធ្ងរបំផុត។
របាយការណ៍មួយសរសេរថា “យន្តការស៊ើបអង្កេតឯករាជ្យរបស់អ.ស.បបានប្រមូលភស្តុតាងព័ត៌មានយ៉ាងច្រើន រួមទាំងវីដេអូ រូបថត និងឯកសារនានាដែលអាចបង្ហាញពីឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាម ដែលបានប្រព្រឹត្តនៅទូទាំងប្រទេសមីយ៉ាន់ម៉ាដោយបុគ្គលផ្សេងៗគ្នាចាប់តាំងពីខែកុម្ភៈ ឆ្នាំ២០២១”។
យោធាមីយ៉ាន់ម៉ាបានដណ្តើមអំណាចកាលពីថ្ងៃទី ១ ខែកុម្ភៈឆ្នាំមុន ដោយបណ្តេញរដ្ឋាភិបាលស៊ីវិលនិងចាប់ខ្លួនមេដឹកនាំជាក់ស្តែងរបស់ខ្លួន គឺលោកស្រី អ៊ុងសាន ស៊ូជី។ របបយោធាបានធ្វើការបង្ក្រាបយ៉ាងបង្ហូរឈាមលើអ្នកប្រឆាំង។
ប្រធាន IIMM លោក នីកូឡាស គូមចៀន (Nicholas Koumjian) បាននិយាយនៅក្នុងសេចក្តីថ្លែងការណ៍មួយថា “ជនល្មើសនៃឧក្រិដ្ឋកម្មទាំងនេះត្រូវតែដឹងខ្លួនថាពួកគេមិនអាចបន្តធ្វើសកម្មភាពដោយនិទណ្ឌភាពបានទេ។ យើងកំពុងប្រមូលនិងរក្សាទុកភស្តុតាងដើម្បីចាប់ពួកគេឱ្យទទួលខុសត្រូវនៅថ្ងៃណាមួយ”។
IIMM ត្រូវបានបង្កើតឡើងដោយក្រុមប្រឹក្សាសិទ្ធិមនុស្សអ.ស.បក្នុងខែកញ្ញា ឆ្នាំ ២០១៨ ដើម្បីប្រមូលភស្តុតាងនៃឧក្រិដ្ឋកម្មអន្តរជាតិធ្ងន់ធ្ងរបំផុត និងការរំលោភច្បាប់អន្តរជាតិនិងរៀបចំឯកសារសម្រាប់ការកាត់ទោសឧក្រិដ្ឋកម្ម ដែលបានប្រព្រឹត្តចាប់តាំងពីឆ្នាំ ២០១១។
មានទីតាំងនៅទីក្រុងហ្សឺណែវ IIMM បានចាប់ផ្តើមដំណើរការនៅខែសីហា ឆ្នាំ ២០១៩ ហើយបានរាយការណ៍ជារៀងរាល់ឆ្នាំទៅកាន់ក្រុមប្រឹក្សាសិទ្ធិមនុស្ស និងមហាសន្និបាតអ.ស.ប៕
បាតុករមីយ៉ាន់ម៉ាតវ៉ានៅមុខស្ថានទូតមីយ៉ាន់ម៉ានៅទីក្រុងបាងកកកាលពីថ្ងៃទី២៦ ខែកក្កដា ឆ្នាំ២០២២