Views: 4
ដោយៈ សុក្ខារិន / កំពង់ឆ្នាំងៈ ប្រជាពលរដ្ឋ ដែលរស់នៅលើដីកោះ តាមរយៈលោកមេ ឃុំអំពិលទឹក ស្រុកកំពង់ត្រឡាច សំណូមពរអាជ្ញាធរស្រុក និងខេត្ត ជួយស្ដារកំណាត់ផ្លូវ នៅលើដីកោះនេះ ដែលលំបាកធ្វើដំណើរ ក្នុងរដូវវស្សា ដើម្បីងាយស្រួលធ្វើដំណើរទៅមក ដឹកកសិផលទៅទីផ្សារ សិស្សានុសិស្ស ទៅសាលារៀន ពិសេសនាំអ្នកជំងឺទៅមន្ទីរពេទ្យ ។
លោក ហេង ចម្រើន មេឃុំអំពិលទឹក ស្រុកកំពង់ត្រឡាច បានឱ្យដឹង នៅវេលាម៉ោង ១១និង២០នាទី ថ្ងៃទី៨ សីហា ២០២២ នេះថាៈ ស្ថានភាពផ្លូវនៅលើដីកោះនេះ ពិតជាមានការលំបាកធ្វើដំណើរពិតមែន សម្រាប់សិស្សានុសិស្ស ទៅសាលារៀន នៅពេលមានអ្នកជំងឺ ដឹកជញ្ជូនមកកាន់មន្ទីពេទ្យស្រុក ឬខេត្ត និងការដឹកជញ្ជូនកសិផល ផ្សេងៗ ទៅកាន់ទីផ្សារ ។
លោកមេឃុំអំពិលទឹក បានបញ្ជាក់ថាៈ បច្ចុប្បន្ននេះ នៅក្នុងឃុំរបស់លោក ដែលកំពុងជួប ការលំបាក លើផ្លូវធ្វើដំណើរ មាននៅក្នុងភូមិក្បាលកោះ ក្អែកពង បែកចាន ខ្លាក្រហ៊ឹម បាក់ភ្នំ ដែលកំពុងជួបការលំបាកក្នុងការធ្វើដំណើរ នៅរដូវវស្សា មានភ្លៀង ហើយណាមួយ កម្មករ កម្មការិនី សិស្សានុសិស្ស ត្រូវឆ្លងសាឡាង មករៀននិងមកធ្វើការទៀតផង។
លោកបានសំណូមពរដល់អាជ្ញាធខេត្ត និងក្រុមការងារចុះជួយមូលដ្ឋាន និងសប្បុរសជន មេត្តាជួយដល់ឃុំរបស់លោក ព្រោះជាឃុំមួយ នៅលើដីកោះ ជួបការលំបាកធ្វើដំណើរ ដោយសារផ្លូវខូចខាត ហើយ បើចង់ទៅទីប្រជុំជនស្រុក ឬទីរួមខេត្ត ត្រូវធ្វើដំណើរ ឆ្លងសាឡាងមួយតង់ទៀត ទើបទៅដល់។
ជាមួយគ្នានេះ លោក ហេង ចម្រើន បានឱ្យដឹងដែរថាៈ កន្លងមថវិកាមូលនិធិឃុំរបស់លោក បានដេញថ្លៃ ផ្លូវក្រាលក្រួសក្រហម មួយខ្សែ ប្រវែង ៣.៣១៤ ម៉ែត្រ ក្នុងភូមិគៀនឃ្លាំង នៅក្នុងឆ្នាំ២០១៨ ដល់ឆ្នាំ២០២០ ហើយនៅឆ្នាំ២០២២ នេះ ដេញបានប្រវែង ១.១២៦ ម៉ែត្រ ដោយក្រាលក្រួសក្រហម ចាប់ពីភូមិគៀនឃ្លាំង តភ្ជាប់មកភូមិវាលស្បៅ ៕/V
