Views: 7
ប្រែសម្រួល : កញ្ញាដាលីស (VNExpress) ៖ ដោយពាក់មួក “បាលី” ពណ៌លឿងដែលមានពាក្យសរសេរថា “អ្នកជិះស្គី” អ្នកទេសចរចិនបានដើរតាមមាត់សមុទ្រខៀវស្រងាត់នៃតំបន់ទេសចរណ៍ដ៏ពេញនិយមរបស់ឥណ្ឌូនេស៊ី ដោយបំភ្លេចចោលទុក្ខលំបាកកូវីដ១៩រយៈពេលបីឆ្នាំ។
ដើរលេងលើ “កោះអណ្តើក” ធ្វើដំណើរមួយថ្ងៃទៅកាន់កោះលុមបុក (Lombok)ជិតខាង និង លេងលើឆ្នេរសមុទ្រដ៏ល្បីល្បាញរបស់កោះបាលី ក្រុមអ្នកទេសចរដែលចាយលុយច្រើនជាងគេបំផុតរបស់ពិភពលោកបានត្រឡប់មកវិញ បន្ទាប់ពីពិធីបុណ្យចូលឆ្នាំថ្មីបានចាប់ផ្ដើម ហើយទីក្រុងប៉េកាំងបានបើកដំណើរការឡើងវិញទៅកាន់ពិភពលោកកាលពីខែមុន។
លោក លី ចាវឡុង (Li Zhao-long) អាយុ ២៨ ឆ្នាំជាបុគ្គលិកក្រុមហ៊ុនអ៊ិនធឺណិតក្នុងទីក្រុងគុនមីង ខេត្តយូនណាន បានប្រាប់ទីភ្នាក់ងារសារព័ត៌មាន AFP ថា”ខ្ញុំសប្បាយចិត្តណាស់ដែលបានធ្វើដំណើរពីព្រោះមុនពេលជំងឺរាតត្បាត ខ្ញុំជាមនុស្សចូលចិត្តធ្វើដំណើរច្រើន ដើរលេងជុំវិញពិភពលោកដើម្បីមើលទេសភាព ដកបទពិសោធន៍វប្បធម៌និងមនុស្សផ្សេងៗគ្នា។បីឆ្នាំក្រោយមក អាចមកពីប្រទេសចិនទៅកាន់ឥណ្ឌូណេស៊ី ខ្ញុំពិតជាសប្បាយចិត្តខ្លាំងណាស់”។
អ្នកទេសចរចិនបានស៊ូទ្រាំនឹងការបិទខ្ទប់និងការរឹតបន្តឹងការធ្វើដំណើរជាច្រើនឆ្នាំ ដែលជំរុញដោយគោលនយោបាយ “កូវីដសូន្យ” របស់រដ្ឋាភិបាលក្រុងប៉េកាំងដែលក្រោយមកស្រាប់តែបើកប្រទេសឡើងវិញភ្លាមៗ ហើយក៏អមដោយការផ្ទុះករណីឆ្លងខ្លាំងផងដែរ។
ឥឡូវនេះ មនុស្សមានសំណាងមួយចំនួន ដែលកាន់ដង Selfieនិងពាក់អាវត្រូពិច និងមួកស្លឹក កំពុងធ្វើដំណើរទៅកាន់កោះបាលី ដែលមានរហស្សនាមថា “កោះព្រះ”។
ក្នុងរយៈពេលប៉ុន្មានឆ្នាំចុងក្រោយនេះ ចំនួនអ្នកទេសចរចិនទៅកាន់កោះបាលីបានធ្លាក់ចុះ បន្ទាប់ពីប្រទេសទាំងពីរបានបិទព្រំដែនរបស់ពួកគេនៅពេលកំពុងផ្ទុះជំងឺរាតត្បាត។ប៉ុន្តែរដ្ឋមន្ត្រីទេសចរណ៍របស់ឥណ្ឌូនេស៊ីបាននិយាយថា រដ្ឋាភិបាលក្រុងហ្សាការតាមានគោលបំណងធ្វើឱ្យវិស័យទេសចរណ៍ស្ទុះងើបខ្លាំងឡើងវិញ ហើយបានប៉ាន់ប្រមាណថាប្រទេសនេះនឹងស្វាគមន៍ភ្ញៀវទេសចរចិនចំនួន ២៥៣.០០០ នាក់នៅឆ្នាំនេះ៕
អ្នកទេសចរចិនវិលមកកោះបាលីវិញ