Views: 1
ប្រែសម្រួល : កញ្ញាដាលីស,បំណង (ស្ត្រេតថែមស៍) ៖ អាជ្ញាធរឈានមុខគេខាងឱសថបុរាណចិនត្រូវបានដកស្រង់សម្តីដោយនិយាយនៅថ្ងៃពុធទី៧ធ្នូនេះថា ចិនគួរតែប្តូរឈ្មោះផ្លូវការរបស់ខ្លួនសម្រាប់កូវីដ១៩ដើម្បីឆ្លុះបញ្ចាំងពីការបំប្លែងខ្លួននៃមេរោគនេះ ហើយអ្នកជំងឺដែលមានរោគសញ្ញាស្រាលគួរតែត្រូវបានអនុញ្ញាតឱ្យធ្វើចត្តាឡីស័កនៅផ្ទះ។
លោកស្រី គូ សៀវហុង (Gu Xiaohong)បានប្រាប់កាសែត Beijing Daily ដែលគ្រប់គ្រងដោយរដ្ឋថា ឈ្មោះចិនសម្រាប់មេរោគកូរ៉ូណា ដែលគេកំណត់ថាជាជំងឺបង្កឱ្យរលាកសួតនោះគួរតែប្តូរឈ្មោះដើម្បីហៅវាថាជាមេរោគឆ្លងមួយ។
វិធីសាស្ត្ររបស់ចិនចំពោះកូវីដ១៩ ដែលសង្កត់ធ្ងន់លើការធ្វើតេស្តិ៍រាលដាលនិងការធ្វើចត្តាឡីស័កករណីវិជ្ជមាននៅក្នុងកន្លែងឯកទេស គួរតែប្តូរពី “ការរកឃើញអកម្ម” ទៅជា “ការការពារសកម្ម”ដោយត្រូវសម្រាកព្យាបាលនៅផ្ទះសម្រាប់ករណីស្រាល។
លោកស្រីគូបាននិយាយថា ផ្នែកជំងឺឆ្លងនៃសមាគមឱសថចិន ដែលលោកស្រីដឹកនាំ បានឈានដល់ការឯកភាពគ្នា ដើម្បីផ្លាស់ប្តូររបៀបដែលពួកគេពណ៌នាអំពីមេរោគនេះ។
ការលើកឡើងរបស់លោកស្រីគឺស្របនឹងការបន្ទន់សំឡេងនាពេលថ្មីៗនេះពីអ្នកជំនាញសុខភាពរបស់ចិននិងប្រព័ន្ធផ្សព្វផ្សាយរដ្ឋចំពោះកូវីដ១៩ខណៈអាជ្ញាធរបានបន្ធូរបន្ថយនូវអ្វីដែលនៅតែជាការទប់ស្កាត់កូវីដ១៩ដ៏តឹងតែងបំផុតមួយចំនួនរបស់ពិភពលោក។
ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃពុធថា ចិនគួរតែបង្កើនប្រសិទ្ធភាពវិធានការបង្ការនិងគ្រប់គ្រងការរីករាលដាលមេរោគនៅឆ្នាំក្រោយខណៈខ្លួនព្យាយាមសម្របសម្រួលគោលនយោបាយឱ្យកាន់តែប្រសើរឡើងជាមួយនឹងការអភិវឌ្ឍសេដ្ឋកិច្ចនិងសង្គម បន្ទាប់ពីកិច្ចប្រជុំការិយាល័យនយោបាយរបស់បក្សកុម្មុយនីស្ត។
ទីភ្នាក់ងារសារព័ត៌មានស៊ីនហួបានរាយការណ៍កាលពីថ្ងៃពុធថា ចិននឹងផ្តោតលើស្ថិរភាពកំណើន ការងារ និងតម្លៃ ខណៈទប់ស្កាត់និងបន្ថយហានិភ័យជាប្រព័ន្ធសំខាន់ៗបន្ទាប់ពីការិយាល័យនយោបាយដែលមានសមាជិក ២៤ នាក់ដឹកនាំដោយប្រធានាធិបតី ស៊ី ជីនភីង បានជួបប្រជុំកាលពីថ្ងៃអង្គារដើម្បីពិភាក្សាអំពីកិច្ចការសេដ្ឋកិច្ចសម្រាប់ឆ្នាំក្រោយ។
បុគ្គលិកសុខាភិបាលរង់ចាំធ្វើតេស្តិ៍អ្នកដំណើរសម្រាប់កូវីដ១៩ បន្ទាប់ពីមកដល់ស្ថានីយរថភ្លើងហុងឈាវក្នុងទីក្រុងសៀងហៃកាលពីថ្ងៃទី ៦ ខែធ្នូ
ចិននៅថ្ងៃពុធទី៧ធ្នូនេះបានប្រកាសកែប្រែទូទៅលើរបបគ្រប់គ្រងកូវីដ១៩ដ៏តឹងរ៉ឹងនាពេលកន្លងមករបស់ខ្លួន ដោយបន្ថយការអនុវត្តវិធានការទប់ស្កាត់ការឆ្លងរាលដាលកូវីដ១៩ ដែលបានធ្វើអោយប៉ះពាល់សេដ្ឋកិច្ចរបស់មហាអំណាចមួយនេះជាខ្លាំងនិងនាំអោយប្រជាជនមិនសប្បាយចិត្តផង។
ការបន្ធូរបន្ថយដែលរួមមាន ការអនុញ្ញាតអោយអ្នកកើតកូវីដចេញរោគសញ្ញាស្រាលឬមិនចេញរោគសញ្ញាអាចធ្វើចត្តាឡីស័កនៅតាមផ្ទះ និងទម្លាក់ចោលការប្រមូលប្រជាជនមកធ្វើតេស្តិ៍រកមេរោគទ្រង់ទ្រាយធំៗនិងការតំរូវអោយប្រជាជនធ្វើតេស្តិ៍បញ្ជាក់គ្មានកូវីដ១៩មុនធ្វើដំណើរទៅកាន់ទីកន្លែងណាមួយក្នុងប្រទេសនោះ ជាសញ្ញាខ្លាំងបំផុតដែលបង្ហាញថារដ្ឋាភិបាលទីក្រុងប៉េកាំងកំពុងត្រៀមអោយប្រជាជន១,៤ពាន់លាននាក់របស់ខ្លួនរៀនរស់នៅជាមួយមេរោគនេះ ដូចប្រទេសភាគច្រើនបំផុតក្នុងលោកអនុវត្តដែរ។
ទោះជាព្រំដែនចិននៅបន្តបិទភាគច្រើន ក៏ប្រជាជនចិនអបអរចំពោះការកែប្រែនេះដែលនៅទីបំផុតអាចនាំចិនចូលក្នុងពិភពមួយក្រោយវីរុសកូរ៉ូណាបានលេចមុខដំបូងគេនៅទីក្រុងអ៊ូហានភាគកណ្តាលចិន។
ពួកអ្នកវិភាគក៏ដូចគ្នា បានស្វាគម៍ការផ្លាស់ប្តូរយុទ្ធវិធីនេះ ដោយសង្ឃឹមថាវាអាចជំរុញអោយសេដ្ឋកិច្ចនិងលុយចិនដែលកំពុងស្ពឹកមានសកម្មភាពឡើងវិញ ហើយបង្កកំណើនសេដ្ឋកិច្ចសកល៕
អាជ្ញាធរចិនលែងតំរូវអោយអ្នកចង់ធ្វើដំណើរទៅណាមកណាក្នុងស្រុក ធ្វើតេស្តិ៍រកកូវីដ១៩ជាមុនទៀតហើយ
