Views: 3
ដោយៈ ឫទ្ធិស័ក្តិ / ភ្នំពេញៈ លោក យិន ស្រាង ប្រធានលេខាធិការដ្ឋានរដ្ឋបាលសាលា ដំបូង ខេត្តសៀមរាប និងជាអ្នកនាំពាក្យ បានប្រាប់រស្មីកម្ពុជា នៅរសៀល ថ្ងៃទី៨ ខែសីហា នេះថាៈ សំណុំរឿង លោក សោម សមស័ក្តិ នាយកទីចាត់ការហិរញ្ញវត្ថុ ខេត្តសៀមរាប បានមកដល់រដ្ឋបាល ហើយនឹងបញ្ជូនទៅ ចៅក្រមស៊ើបសួរ បន្តទៀត។
លោកស្រី សាត ធីតា ព្រះរាជអាជ្ញារង និងជាអ្នកនាំពាក្យសាលាដំបូង ខេត្តសៀមរាប បានបញ្ជាក់ថាៈ ឈ្មោះ សោម សមស័ក្តិ ត្រូវបានតំណាងអយ្យការ សម្រេចចោទប្រកាន់ ពីបទ “ ជេរប្រមាថ ហិង្សាដោយចេតនា និងប៉ុនប៉ងមនុស្សឃាត ”។ បច្ចុប្បន្ន សំណុំរឿង លោក សោម សមស័ក្តិ កំពុងស្ថិងក្នុងការអនុវត្តនីតិវិធី របស់ចៅក្រមស៊ើបសួរ។
ទាក់ទងករណីនេះ ស្ត្រីរងគ្រោះឈ្មោះ ផាត់ សុជឿន បានដាក់ពាក្យបណ្តឹង ប្តឹងលោក សោម សមស័ក្តិ នាយកទីចាត់ការហិរញ្ញវត្ថុ ខេត្តសៀមរាប ទៅសាលាដំបូងខេត្តសៀមរាប ពីបទ ជេរប្រមាថជាសាធារណ: បទប្រើអំពើហិង្សាដោយចេតនា និងបទប៉ុនប៉ងមនុស្សឃាត តាមរយៈបើករថយន្ត ម៉ាក range rover discovery ពាក់ស្លាកលេខ ភ្នំពេញ 2BU-០០០៩ ប៉ុនប៉ងបំបុក នៅចំណុចផ្សារអាស៊ី កាលពីយប់ថ្ងៃទី១៤ ខែមិថុនា ឆ្នាំ២០២២ ។
បន្ទាប់ពីទទួលបានពាក្យបណ្តឹង តំណាងអយ្យការ អមសាលាដំបូងខេត្តសៀមរាប បានចេញដីកាកោះហៅលោក សោម សមសក្តិ ឲ្យចូលខ្លួនទៅបំភ្លឺ នៅតុលាការ ចំនួន២ដងរួចមកហើយ តែលោក សោម សមស័ក្តិ មិនបានចូលទៅតាមដីកាកោះទេ ដោយដាក់ពាក្យសុំពន្យារ ។
ស្ត្រីរងគ្រោះ បានអះអាងថាៈ នៅមុនពេលកើតហេតុ ពួកគាត់ មានគ្នា ៨ ទៅ ៩ នាក់ ញាំអាហារនៅផ្សារទំនើបអាស៊ី ត្រង់ចំណុចក្រោយព្រះអង្គចេកព្រះអង្គចម ស្ថិតនៅភូមិមណ្ឌល១ សង្កាត់ស្វាយដង្គុំ ក្រុង/ខេត្តសៀមរាប ។ លុះពេលចេញមក ដល់ខាងមុខ វេលាម៉ោង ១០និង៣០នាទីយប់ ថ្ងៃទី១៤ ខែមិថុនា ឆ្នាំ ២០២២ ឈ្មោះ ស័ក្ត ដែលជាជនដៃដល់ បានវាយសង្កត់ក្បាល លោក ម៉ក់ ប្រុស អភិបាលស្រុកសូទ្រនិគម ដែលរួមដំណើរជាមួយគាត់ (ស្ត្រីរងគ្រោះ) ជាច្រើនដង។ ខណ:នោះរូបគាត់ (ជនរងគ្រោះ) បាននិយាយថាៈ មេចក៏វាយក្បាលគាត់ចឹង គាត់ចាស់ជាង វាយរបៀបហ្នឹងមិនសមទេ។ ភ្លាមនោះ ជនដៃដល់បានជេរប្រមាថទៅលើរូបគាត់ ហើយវាយមកលើផ្ទៃមុខ ផ្នែកក្បាលរបស់គាត់ ១ដៃ និងបន្តជេរប្រមាថ រហូតផ្អើលដល់ សមត្ថកិច្ច មកជួយអន្តរាគមន៍ ។
ស្ត្រីរងគ្រោះ បានបន្តថាៈ ពេលក្រុមសមត្ថកិច្ច មកដល់កន្លែងកើតហេតុ ជនដៃដល់ បានបើករថយន្ត ម៉ាក range rover discovery ពាក់ស្លាកលេខ ភ្នំពេញ 2BU-០០០៩ ចេញមួយសន្ទុះ ហើយបើកត្រឡប់មកបំបុករូបគាត់ បំណងសម្លាប់។ ប៉ុន្តែសំណាង ដោយសារម៉ូតូរបស់ប៉ូលិស នៅបាំងពីមុខ ទើបបុកត្រូវម៉ូតូរបស់ប៉ូលិ បណ្តាលឱ្យដួលខ្ទេច ហើយដួលសង្កត់ជើងរបស់គាត់ បណ្តាលឱ្យរងរបួសស្រាល ទើបជនបង្កបើករថយន្ត គេចខ្លួនតែម្តង។
ស្ត្រីរងគ្រោះ បានបញ្ជាក់ថាៈ រវាងរូបគាត់ និងជនបង្កពុំដែលស្គាល់គ្នាសោះឡើយ ប៉ុន្តែជនរូបនេះ បែរជាមកប៉ុនប៉ង ធ្វើឃាតលើរូបគាត់ទៅវិញ អីចឹងហើយ ទើបសម្រេចដាក់ពាក្យបណ្តឹង ដើម្បីស្វែងរកយុត្តិធម៌។ ចំណែកពាក្យបណ្តឹង ដែលប្តឹងនៅដំណាក់កាលប៉ូលិស រូបគាត់មិនទាន់ទាមទារសំណងទេ គឺសុំឱ្យតែអនុវត្តទៅតាមច្បាប់៕/V
លោក សោម សមស័ក្តិ នាយកទីចាត់ការហិរញ្ញវត្ថុខេត្តសៀមរាប