Views: 2
ដោយៈបាយ័ន / សៀមរាបៈ នៅថ្ងៃទី២៥ ខែកញ្ញា ឆ្នាំ២០២២ លោក ទៀ សីហា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខា កាកបាទក្រហមកម្ពុជា ខេត្តសៀមរាប និង អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងជាប្រធានកិត្តិយស សាខាកាកបាទក្រហមកម្ពុជា ខេត្តសៀមរាប ព្រមទាំងសហការី បានអញ្ជីញជួបសំណេះសំណាល និងនាំយកអំណោយមនុស្សធម៌ ជូនដល់គ្រួសាររងគ្រោះ ដោយជំនន់ទឹកភ្លៀង ចំនួន ៤៨៥ គ្រួសារ ក្នុងនោះ នៅស្រុកអង្គរជុំ ចំនួន ១៣២ គ្រួសារ និងស្រុកស្រីស្នំ ចំនួន ៣៥៣ គ្រួសារ។
លោកប្រធាគណៈកម្មាធិការសាខា បានពាំនាំនូវការផ្ដាំផ្ញើសួរសុខទុក្ខនិងការយកចិត្ត ទុកដាក់ពីសំណាក់ សម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សម្ដេចទាំងទ្វេ តែងគិតគូរខ្ពស់បំផុត និងមុនគេបង្អស់ ចំពោះសុខទុក្ខប្រជាលពលរដ្ឋគ្រប់រូប ដោយមិនប្រកាន់ វណ្ណៈ ពូជសាសន៍ ពណ៌សម្បុរ ជំនឿសាសនា ឬនិន្នាការនយោបាយ ណាមួយឡើយ។
លោកប្រធាន បានបន្តថាៈ អំណោយមនុស្សធម៌ដែលនាំមកជូន នាពេលនេះ គឺអាចជួយសម្រាលទុក្ខលំបាករបស់លោកយាយ លោកតា បងប្អូន បានមួយរយៈខ្លី ក៏ពិតមែន តែនេះជាការបង្ហាញពីការយកចិត្តទុកដាក់ របស់រាជរដ្ឋាភិបាល និងកាកបាទក្រហមកម្ពុជា ដែលជានិច្ចកាល តែងតែនៅជាមួយលោកយាយ លោកតា បងប្អូនប្រជាពលរដ្ឋយើងជានិច្ច ទោះស្ថិតក្នុងកាលៈទេសៈណាក៏ដោយ។
លោកប្រធាន ក៏បានអំពាវនាវដល់លោកយាយ លោកតា បងប្អូនប្រជាពលរយើង សូមទៅទទួលយកនូវការចាក់វាក់សាំងការពារជំងឺកូវីដ-១៩ បន្តទៀត ដើម្បីបង្ការខ្លួនពីការឆ្លងជំងឺកូវីដ-១៩ ព្រោះជាសកល ក៏ដូចជា នៅក្នុងប្រទេសកម្ពុជាយើង នៅតែព្រួយបារម្ភ អំពីការរាតត្បាតនៃជំងឺនេះនៅឡើយ។
អំណោយមនុស្សធម៌បានផ្ដល់ជូន១គ្រួសារ ទទួលបានអង្ករ ៣០ គីឡូក្រាម មុង១ ភួយ១ សារុង១ ក្រមា១ មី១កេស ត្រីខ១យួរ ទឹកត្រី១យួរ និងថវិកាចំនួន ៥ ម៉ឺនរៀល។
បន្ទាប់ពីជួបសំណេះសំណាល និងប្រគល់អំណោយមនុស្សធម៌ ជូនលោកយាយ លោកតា បងប្អូនប្រជាពលរដ្ឋរួច លោកប្រធានបានអញ្ជើញចុះពិនិត្យស្ថានភាពទឹក ក្នុងភូមិសាស្ត្រមួយចំនួន ក្នុងស្រុកអង្គរជុំ ស្រុកក្រឡាញ់ និងស្រុកស្នំ ៕/V
