Views: 1
ប្រែសម្រួល : កញ្ញាដាលីស (ដេល្លីម៉េល) ៖ កាលពីថ្ងៃអង្គារទី៦ធ្នូ អនុប្រធានាធិបតីអាហ្សង់ទីនលោកស្រី គ្រីស្ទីណា ហ្វើណង់ដេស (Cristina Fernández)ត្រូវបានផ្តន្ទាទោសនិងកាត់ទោសឱ្យជាប់ពន្ធនាគាររយៈពេលប្រាំមួយឆ្នាំ និងហាមប្រាមពេញមួយជីវិតពីការកាន់តំណែងសាធារណៈសម្រាប់គម្រោងការក្លែងបន្លំ ដែលបានកិបកេងប្រាក់ចំនួន ១ពាន់លានដុល្លារតាមរយៈគម្រោងការងារសាធារណៈក្នុងអំឡុងពេលលោកស្រីកាន់តំណែងជាប្រធានាធិបតី។
ក្រុមចៅដែលមានគ្នាបីនាក់បានរកឃើញថា មេដឹកនាំបក្សពែរ៉ូនីស(Peronist) រូបនេះមានទោសពីបទក្លែងបន្លំ ប៉ុន្តែបានច្រានចោលការចោទប្រកាន់ពីបទបើកអង្គការឧក្រិដ្ឋកម្មមួយដែលអាចមានស្ថានទម្ងន់ទោសជាប់គុក ១២ ឆ្នាំ។
វាជាលើកទីមួយហើយដែលអនុប្រធានាធិបតីអាហ្សង់ទីនត្រូវបានកាត់ទោសពីបទឧក្រិដ្ឋក្នុងអំឡុងពេលកាន់តំណែង។
លោកស្រីហ្វើណង់ដេសបានរិះគន់សាលក្រមនេះ ដោយពណ៌នាខ្លួនលោកស្រីថាជាជនរងគ្រោះនៃ “ម៉ាហ្វីយ៉ាតុលាការ”។ប៉ុន្តែក្រោយមកលោកស្រីក៏បានប្រកាសថាលោកស្រីនឹងមិនឈរឈ្មោះនៅឆ្នាំក្រោយសម្រាប់តំណែងប្រធានាធិបតី ដែលជាមុខតំណែងលោកស្រីធ្លាប់បានកាន់ពីមុនក្នុងឆ្នាំ ២០០៧-២០១៥។
ការកាត់ទោសនេះមិនទាន់រឹងមាំទេរហូតទាល់តែបណ្តឹងឧទ្ធរណ៍ត្រូវបានសម្រេច ដែលជាដំណើរការមួយអាចចំណាយពេលរាប់ឆ្នាំ។ ក្នុងខណៈពេលនេះ លោកស្រីនៅតែមានអភ័យឯកសិទ្ធិពីការចាប់ខ្លួន។
អ្នកគាំទ្ររបស់លោកស្រីហ្វើណង់ដេសបានប្តេជ្ញានឹងធ្វើឱ្យប្រទេសជាប់គាំងជាមួយនឹងកូដកម្មទូទាំងប្រទេស។ ពួកគេបានបិទទីក្រុងប៊ុយណូសែរ ហើយបានដើរក្បួនសំដៅទៅអគារតុលាការសហព័ន្ធដោយវាយស្គរនិងស្រែក ខណៈពួកគេរុលទៅមុខប្រឆាំងនឹងរបាំងប៉ូលិស។
លោកស្រីហ្វើណង់ដេសបានបដិសេធរាល់ការចោទប្រកាន់ទាំងអស់។ ជាមេដឹកនាំលេចធ្លោរបស់អាហ្សង់ទីនក្នុងសតវត្សរ៍នេះ លោកស្រីត្រូវបានចោទប្រកាន់ថាបានផ្តល់កិច្ចសន្យាការងារសាធារណៈដោយមិនត្រឹមត្រូវដល់មហាសេដ្ឋីសំណង់ម្នាក់ដែលមានទំនាក់ទំនងយ៉ាងជិតស្និទ្ធជាមួយគ្រួសាររបស់លោកស្រី។
សាលក្រមនេះប្រាកដណាស់នឹងធ្វើឱ្យមានការប្រេះឆាកាន់តែជ្រៅក្នុងប្រទេសអាម៉េរិកខាងត្បូងមួយនេះ ជាកន្លែងដែលនយោបាយអាចក្លាយជាទីលានបង្ហូរឈាម ហើយមេដឹកនាំប្រជានិយមវ័យ ៦៩ ឆ្នាំរូបនេះត្រូវបានគេស្រឡាញ់ផងនិងស្អប់ផង។
ប្រធានាធិបតីលោក អាល់បឺតូ ហ្វើណង់ដេស (Alberto Fernández) ដែលមិនជាប់ទាក់ទងនឹងអនុប្រធានាធិបតីរបស់គាត់ បាននិយាយនៅលើ Twitter ថា លោកស្រីគ្មានកំហុសទេ ហើយការផ្តន្ទាទោសលោកស្រីគឺជា “លទ្ធផលនៃការកាត់ក្តីមួយ ដែលក្នុងនោះទម្រង់អប្បបរមានៃដំណើរការត្រឹមត្រូវមិនត្រូវបានយកចិត្តទុកដាក់”៕
អនុប្រធានាធិបតីអាហ្សង់ទីនលោកស្រី គ្រីស្ទីណា ហ្វើណង់ដេស