Views: 1
ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីបាននិយាយកាលពីថ្ងៃអាទិត្យទី៥កុម្ភៈថា ឧត្តមសេនីយ៍ ភើវេស មូសារ៉ាហ្វ (Pervez Musharraf)ដែលបានដណ្ដើមអំណាចនៅក្នុងរដ្ឋប្រហារមួយ ហើយក្រោយមកបានដឹកនាំប៉ាគីស្ថានដើម្បីជួយដល់សង្គ្រាមរបស់អាម៉េរិកនៅក្នុងប្រទេសអាហ្វហ្គានីស្ថានប្រឆាំងនឹងពួកតាលីបង់នោះ បានទទួលមរណភាពនៅអាយុ ៧៩ ឆ្នាំ។
លោកមូសារ៉ាហ្វ ជាអតីតមេបញ្ជាការកងកុម្ម៉ង់ដូពិសេស បានក្លាយជាប្រធានាធិបតីតាមរយៈរដ្ឋប្រហារយោធាចុងក្រោយ ដែលបានធ្វើឱ្យប៉ាគីស្ថានកាន់តែយ៉ាប់យ៉ឺនចាប់តាំងពីការបង្កើតប្រទេសនេះឡើងក្នុងពេលបំបែកចេញពីឥណ្ឌាក្នុងឆ្នាំ១៩៤៧។ លោកបានគ្រប់គ្រងរដ្ឋដែលមានអាវុធនុយក្លេអ៊ែរនេះបន្ទាប់ពីរដ្ឋប្រហារឆ្នាំ ១៩៩៩ក្នុងពេលកំពុងមានភាពតានតឹងជាមួយឥណ្ឌា រឿងអាស្រូវនៃការរីកសាយភាយអាវុធបរមាណូ និងការបះបោរអ៊ីស្លាមជ្រុលនិយម។
លោកបានចុះចេញពីតំណែងក្នុងឆ្នាំ២០០៨ ខណៈប្រឈមមុខនឹងការចោទប្រកាន់ដកពីតំណែងពីសភា។
ក្រោយមកលោកមូសារ៉ាហ្វបានរស់នៅនិរទេសខ្លួននៅក្នុងទីក្រុងឌូបៃដើម្បីគេចវេសការចោទប្រកាន់ពីព្រហ្មទណ្ឌនានា ត្បិតមានការប៉ុនប៉ងត្រឡប់មកក្នុងនយោបាយវិញក្នុងឆ្នាំ ២០១២។ប៉ុន្តែសុខភាពមិនល្អបានញាំញីរូបលោកនៅប៉ុន្មានឆ្នាំចុងក្រោយនេះ។ លោកតែងចៀសផុតពីសេចក្តីស្លាប់ បន្ទាប់ពីរួចពីការប៉ុនប៉ងសម្លាប់ជាច្រើនលើក ខណៈពួកសកម្មប្រយុទ្ធអ៊ីស្លាមបានកំណត់គោលដធ្វើឃាតរូបលោកពីរដង។
លោកមូសារ៉ាហ្វធ្លាប់បានសរសេរថា “ខ្ញុំបានប្រឈមមុខនឹងសេចក្តីស្លាប់និងជំទាស់នឹងវាជាច្រើនដងកាលពីអតីតកាល ពីព្រោះវាសនានិងជោគវាសនាតែងញញឹមដាក់ខ្ញុំ”។
គ្រួសាររបស់លោកមូសារ៉ាហ្វបានប្រកាសក្នុងខែមិថុនា ឆ្នាំ ២០២២ ថាគាត់បានសម្រាកព្យាបាលនៅមន្ទីរពេទ្យជាច្រើនសប្តាហ៍នៅក្នុងទីក្រុងឌូបៃ ខណៈទទួលរងនូវជំងឺ Amyloidosisជាជំងឺមិនអាចព្យាបាលបាន។ ក្រោយមកពួកគេបាននិយាយថាគាត់ក៏ត្រូវការការប្រើប្រាស់ថ្នាំ Daratumumab ដែលត្រូវបានប្រើដើម្បីព្យាបាលជំងឺមហារីកខួរឆ្អឹង Myeloma។មហារីកខួរឆ្អឹងនេះអាចបណ្តាលឱ្យមានជំងឺ Amyloidosis ។
លោក សាហ្ស៊ីយ៉ា ស៊ីរ៉ាច (Shazia Siraj) អ្នកនាំពាក្យរបស់ស្ថានកុងស៊ុលប៉ាគីស្ថាននៅទីក្រុងឌូបៃ បានបញ្ជាក់ពីការស្លាប់របស់គាត់ ហើយបាននិយាយថាអ្នកការទូតកំពុងផ្តល់ការគាំទ្រដល់គ្រួសាររបស់គាត់៕
លោក ភើវេស មូសារ៉ាហ្វ ស្លាប់នៅអាយុ ៧៩ ឆ្នាំ
