Views: 7
ប្រែសម្រួលៈបំណង(បាងកកប៉ុស្តិ៍,CNN)៖ អតីតបវរកញ្ញាមីយ៉ាន់ម៉ាដែលត្រូវប៉ូលិសថៃឃាត់ទុកនៅអាកាសយានដ្ឋានអន្តរជាតិសុវណ្ណភូមិមិនអោយចូលប្រទេសថៃចាប់តាំងពីសប្តាហ៍មុនដោយសារបញ្ហាលិខិតឆ្លងដែនរបស់នាងនិងបារម្ភខ្លាចត្រូវគេបញ្ជូនទៅកាន់មីយ៉ាន់ម៉ាវិញនោះ ឥឡូវបានទទួលសិទ្ធិជ្រកកោណនៅកាណាដាហើយ។
សូមរំលឹកថា អាជ្ញាធរយោធាមីយ៉ាន់ម៉ាបានចេញដីកាចាប់ខ្លួននាងក្រោយពីនាងបានប្រើវេទិការប្រឡងបវរកញ្ញាអន្តរជាតិមួយប្រហាររិះគន់ក្រុមយោធានៅមាតុភូមិរបស់នាងចំពោះការធ្វើរដ្ឋប្រហារទម្លាក់រដ្ឋាភិបាលស៊ីវិលមួយ។
ប្រភពសន្តិសុខបានប្រាប់សារព័ត៌មានបាងកកប៉ុស្តិ៍ថា នាងថរ ណាន់ដា អ៊ុង(Thaw Nanda Aung)ឬហៅ ហាន់ ឡេ(Han Lay) នឹងចាកចេញពីប្រទេសថៃតាមយន្តហោះនៃក្រុមហ៊ុអាកាសចរណ៍កូរ៉េនៅថ្ងៃអង្គារទី២៧កញ្ញា។
គេថានាងបានដាក់ពាក្យសុំការជ្រកកោនទៅការិយាល័យស្នងការជាន់ខ្ពស់របស់អង្គការសហប្រជាជាតិទទួលបន្ទុកជនភៀសខ្លួន(UNHCR)ប្រចាំប្រទេសថៃបន្ទាប់ពីត្រូវបានអាជ្ញាធរថៃបដិសេធមិនអោយចូលប្រទេសខ្លួនជាថ្មីក្រោយនាងវិលមកពីប្រទេសវៀតណាម។
មុននេះនាងហាន់ ឡេ បានប្រាប់សារព័ត៌មានCNNថានាងឥឡូវមានសុវត្ថិភាពហើយដោយស្ថិតក្រោមការឃុំគ្រងរបស់មន្ត្រីUNHCRក្រោយប្រឈមការបញ្ជូនទៅស្រុកវិញ។
សប្បាយចិត្តវិញក្រោយដឹងថា បានសិទ្ធិជ្រកកោននៅកាណាដា
ហាន់ ឡេ ពីមុនពិបាកចិត្តដោយខ្លាចត្រូវថៃបញ្ជូនទៅមីយ៉ាន់ម៉ា។ហាន់ ឡេ បានប្រឈមការបញ្ជូនទៅកាន់មីយ៉ាន់ម៉ា ក្រោយមន្ត្រីថៃឃាត់នាងទុកនៅអាកាសយានដ្ឋានតាំងពីថ្ងៃពុធសប្តាហ៍មុនដោយសារបញ្ហាលិខិតឆ្លងដែន។ប្រភពព័ត៌មានបាននិយាយថា អាជ្ញាធរមីយ៉ាន់ម៉ាទំនងជាបានដកហូតលិខិតឆ្លងដែនរបស់នាង
នាងបានប្រាប់CNNថា «ខ្ញុំមានសុវត្ថិភាពហើយឥឡូវ។ពួកគេខិតខំអស់ពីចិត្តពីថ្លើមដើម្បីជួយខ្ញុំ តែខ្ញុំមិនអាចនិយាយអ្វីបានច្រើនទេនៅពេលនេះ…រហូតទាល់តែដំណើរការជាមួយUNHCRនិងជាមួយមន្ត្រីអន្តោប្រវេសន៍ថៃបានចាប់សព្វគ្រប់»។
ទោះជាបានការជ្រកកោននៅកាណាដា នាងហាន់ ឡេ បាននិយាយថានាងចង់រស់នៅក្នុងប្រទេសថៃនិងចង់បន្តនៅក្នុងប្រទេសនេះដោយវា«ហាក់ដូចជាផ្ទះទីពីររបស់ខ្ញុំ»។
ឧត្តមសេនីយ៍អាចាយ៉ុន ក្រៃថង(Archayon Kraithong) នាយរងប៉ូលិសអន្តោប្រវេសន៍ថៃ បានប្រាប់CNNថា នាងហាន ឡេត្រូវបានឃាត់ទុកដោយសារមានបញ្ហាលិខិតឆ្លងដែននិងមិនអាចអោយចូលក្នុងប្រទេសថៃបានទេដោយសារតែ«ច្បាប់អន្តោប្រវេសន៍»។
ហាន ឡេ អាយុ២៣ឆ្នាំ បានការចាប់អារម្មណ៍ជាអន្តរជាតិដោយសារនាងថ្លែងសុន្ទរកថាលើវេទិកាប្រឡងបវរកញ្ញាមួយក្នុងប្រទេសថៃអំពីស្ថានការណ៍ក្នុងប្រទេសរបស់នាង។ក្នុងឈុតប្រពៃណីមីយ៉ាន់ម៉ា ជាមួយនាងបដាសរសេរថា«សូមបន់ស្រន់អោយមីយ៉ាន់ម៉ាជួបសេចក្តីសុខ»ដើម្បីបង្កើនការចាប់អារម្មណ៍អំពីការរំលោភសិទ្ធិមនុស្សយ៉ាងព្រៃផ្សៃពីសំណាក់ក្រុមយោធាមីយ៉ាន់ម៉ា។
ចាប់តាំងពីពេលនោះ នាងបានទទួលការគំរាមសម្លាប់និងប្រឈមការចាប់ខ្លួននៅមីយ៉ាន់ម៉ា៕