Views: 2
ដោយៈពៅនិមល/ភ្នំពេញ៖ដោយសារការផ្សព្វផ្សាយព័ត៌មាននានាតាមបណ្តាញសង្គមដោយអះអាងថា លោកស្រី សេង សុគន្ធា ថាជាម្ចាស់(ហាងពេជ្រព្រីនស៍)បោកប្រាស់អតិថិជន។ចំពោះរឿងរ៉ាវនេះធាតុពិតលោកស្រីមិនបានជាប់ពាក់ព័ន្ធនឹងហាងនោះទេ។លោកស្រីថា លោកស្រីបានធ្វើកិច្ចសន្យាសេងហាងអាជីវកម្មឱ្យទៅអ្នកផ្សេងតាំងពីថ្ងៃទី២៥ ខែមិថុនា ឆ្នាំ២០២២ ដែលមានមេធាវីទទួលស្គាល់ ប្រថាប់ត្រាស្របតាមផ្លូវច្បាប់។
ដោយបង្ហាញឯកសារផង នៅល្ងាចថ្ងៃទី៦ ខែធ្នូនេះ លោកស្រី សេង សុគន្ធា បាននិយាយថាចំពោះករណីធ្វើកិច្ចសន្យាសេងហាង អាជីវកម្ម(ហាងពេជព្រីនស៍) ឱ្យទៅលោកស្រី គង់ ថាស្រីពេជ្រ ។គឺសេងទាំងផ្លាកយីហោ ទាំងលេខទូរស័ព្ទ ទាំងផេកផ្សព្វផ្សាយលក់ ទាំងទីតាំង កៅអី សម្ភារពេជ្រទាំងអស់។ លោកស្រីបានបន្តថា “ចំពោះកាសេងនេះផងដែរខ្ញុំមិនបោះបង់ចោលនូវការទទួល ខុសត្រូវរបស់ខ្ញុំឡើយ។ មានន័យថា ការធ្វើអាជីវកម្មលក់ពេជ្ររបស់គាត់កន្លងមក អតីតជាម្ចាស់ហាង គឺធ្វើអាជីវកម្មត្រឹមត្រូវ រាល់ការលក់ពេជ្រឱ្យទៅអតិថិជន មានលិខិតស្នាមទទួលខុសត្រូវច្បាស់លាស់។ ពេលណាអតិថិជន ត្រូវយកពេជ្រមកលក់ឱ្យគាត់វិញ គឺគាត់ទិញចូលវិញ។ ក្នុងនោះសូម្បីតែអតិថិជនចង់ដូរម៉ូតអ្វី ក៏គាត់ទទួលខុសត្រូវទាំងអស់។ ប៉ុន្តែក្នុងកំឡុងថ្ងៃទី២៥ ខែមិថុនា ឆ្នាំ២០២២លោកស្រីមានធុរៈផ្សេងៗនៅក្នុងគ្រួសារនិងម្យ៉ាងទៀតមានគោលបំណងផ្លាស់ប្ដូរមុខរបរទើបគាត់បានសេងហាងខាងលើនេះទៅឱ្យលោកស្រី គង់ ថាស្រីពេជ្រ”។
លោកស្រីបានលើកឡើងទៀតថា ទោះជាសេងហាងពេជ្រនេះទៅឱ្យលោកស្រី គង់ ថាស្រីពេជ្រ ក៏ដោយ ក៏នៅក្នុងកិច្ចសន្យានោះ គាត់សំណូមពរឱ្យអ្នកដែលសេងហាងបន្តពីគាត់ទទួលស្គាល់នូវលិខិតរបស់គាត់ដែលគាត់លក់ឱ្យទៅអតិថិជនរបស់គាត់កន្លងមកនោះ ពេលអតិថិជនគាត់មក ត្រូវការប្ដូរម៉ូត ឬត្រូវការយកពេជ្រហ្នឹងមកលក់វិញ បើមានលិខិតស្នាមដែលគាត់បានធ្វើរវាងអតិថិជន ម្ចាស់ក្រោយត្រូវទទួលទិញពេជ្រ គ្រឿងអលង្ការហ្នឹងវិញ ដោយអនុវត្តទៅតាមកិច្ចសន្យា ហើយកាត់ខាតប៉ុន្មានភាគរយៗ ដែលមានចែងនៅក្នុងវិក័្កយប័ត្រ។
លោកស្រីក៏បានពន្យល់ផងដែរថា ការទទួលខុសត្រូវរបស់លោកស្រីក៏បានផុតតាំងពីថ្ងៃទី២៥ ខែមិថុនា ឆ្នាំ២០២២។ ដូច្នេះអ្វីដែលកើតឡើងក្រោយថ្ងៃ២៥ខែមិថុនាគឺជារឿងភាគីខាងក្រោយជាអ្នកទទួលខុសត្រូវជាមួយអតិថិជនបន្ត មិនបានពាក់ព័ន្ធជាមួយនឹងលោកស្រីឡើយ។
លោកស្រីបានបញ្ជាក់ថា លោកស្រីមិនបានជាប់ពាក់ព័ន្ធជាមួយនឹងហាងពេជ្រដូចដែលបានធ្វើការផ្សព្វផ្សាយនោះឡើយ។ លោកស្រីបានសំណូមពរអតិថិជនសាធារណៈជនទាំងអស់មេត្តាជ្រាបអំពីបញ្ហានេះ ហើយក៏សុំឱ្យអ្នកដែលបានបង្ហោះ អ្នកខមមិន (Comments)បរិហារកេរ្ដិ៍ ដែលជារឿងមិនពិតកន្លងមកប៉ះពាល់ទៅលើកិត្តិយស និងសេចក្តីថ្លៃថ្នូររបស់លោកស្រី សូមមេត្តាដករូប ដកអត្ថបទចេញវិញទាំងអស់ផង៕សរន