Views: 12
ប្រែសម្រួល : កញ្ញាដាលីស (ស្ត្រេតថែមស៍) ៖ ក្រុមមន្ត្រីអ៊ុយក្រែនបាននិយាយថារុស្ស៊ីកំពុងវាយប្រហារគោលដៅជនស៊ីវិលនិងយោធាជាច្រើនក្នុងគោលបំណងបង្កើនការគ្រប់គ្រងពេញលេញលើតំបន់ដូណិតសខ៍និងលូហានសខ៍ភាគខាងកើតអ៊ុយក្រែន ដោយគ្រាប់រ៉ុក្កែតចំនួន ១២០ បានវាយប្រហារតំបន់ជុំវិញទីប្រជុំជននីកូប៉ូល (Nikopol)ពេញមួយយប់។
អភិបាលក្រុងឌីនីប្រូប៉េត្រូវសខ៍ (Dnipropetrovsk) លោក វ៉ាឡិនទីន រីស្នីឆិនកូ (Valentyn Reznychenko)បាននិយាយថាមនុស្សបីនាក់បានស្លាប់និងប្រាំពីរនាក់បានរងរបួសដោយការបាញ់ផ្លោងនៅទីប្រជុំជននីកូប៉ូល នៅពេលគ្រាប់រ៉ុក្កែត Gradចំនួន ១២០ គ្រាប់បានវាយប្រហារតំបន់នោះ។
នាយអគ្គសេនាធិការរបស់អ៊ុយក្រែនបាននិយាយនៅក្នុងរបាយការណ៍មួយកាលពីព្រឹកថ្ងៃព្រហស្បតិ៍ ទី១១ សីហា ដោយដកស្រង់ប្រភពពីការតាំងយោធាជាង ៦០ ថា”សត្រូវកំពុងផ្តោតការខិតខំប្រឹងប្រែងរបស់ខ្លួនលើការបង្កើតការគ្រប់គ្រងពេញលេញលើទឹកដីនៃតំបន់លូហានសខ៍និងដូណិតសខ៍”។
ការប្រយុទ្ធគ្នាយ៉ាងខ្លាំងក្លាបានកើតឡើងនៅជុំវិញទីប្រជុំជនពីស្គី (Pisky) ភាគខាងកើតអ៊ុយក្រែនកាលពីថ្ងៃព្រហស្បតិ៍ខណៈនៅភាគខាងលិចអ៊ុយក្រែនបានចោទប្រកាន់កងកម្លាំងរុស្ស៊ីថាបានប្រើប្រាស់រោងចក្រនុយក្លេអ៊ែរដើម្បីធ្វើជាខែលទប់ទល់នឹងកាំភ្លើងធំ។
មន្ត្រីម្នាក់នៃសាធារណរដ្ឋប្រជាមានិតដូណិតសខ៍ ដែលគាំទ្រដោយរុស្ស៊ីបាននិយាយថា ទីប្រជុំជនពីស្គីស្ថិតនៅសមរភូមិជួរមុខចម្ងាយត្រឹមតែ ១០ គីឡូម៉ែត្រនៅភាគពាយព្យនៃរដ្ឋធានីដូណិតសខ៍ដែលស្ថិតនៅក្រោមការគ្រប់គ្រងរបស់កងកម្លាំងរុស្ស៊ីនិងក្រុមបំបែកខ្លួន។
មន្ត្រីឈ្មោះ ដានីល បេស្នូនូវ (Danil Bezsonov) បាននិយាយនៅលើ Telegram ថា “វាកំពុងក្តៅគគុកនៅក្នុងទីប្រជុំជនពីស្គី។ ទីប្រជុំជននេះជារបស់យើងប៉ុន្តែនៅតែមានក្រុមតស៊ូមួយក្តាប់តូចនៅភាគខាងជើងនិងខាងលិច”។
មន្ត្រីអ៊ុយក្រែនបានបដិសេធថា ទីប្រជុំជន ដែលមានខែលការពាររឹងមាំខ្លាំងសម្រាប់ការពារទីក្រុងដូណិតសខ៍ បានដួលរលំ។ទីភ្នាក់ងារសារព័ត៌មានរ៉យទ័រមិនអាចផ្ទៀងផ្ទាត់ភស្តុតាងសមរភូមិណាមួយបានទេ៕
ផ្សែងហុយនៅទីក្រុងដូណិតសខ៍របស់អ៊ុយក្រែនកាលពីថ្ងៃពុធទី១០សីហា ឆ្នាំ២០២២