Views: 3
ប្រែសម្រួល : កញ្ញាដាលីស (ដេល្លីម៉េល) ៖ សមាជិកសភាជាន់ខ្ពស់មួយរូបបាននិយាយកាលពីថ្ងៃអាទិត្យទី៥កុម្ភៈថា រដ្ឋមន្ត្រីការពារជាតិអ៊ុយក្រែនលោក អូឡេកសី រីស្នីកូវ (Oleksiy Reznikov) នឹងត្រូវជំនួសដោយប្រធានចារកម្មយោធា នៅមុនការរំពឹងទុកអំពីការវាយលុករបស់រុស្ស៊ី និងបន្ទាប់ពីរឿងអាស្រូវពុករលួយ។
ប្រធានាធិបតីលោក វ៉ូឡូឌីមៀ ហ្សេលេនស្គី បាននិយាយនៅក្នុងសុន្ទរកថាពេលល្ងាចរបស់លោកដោយមិនបានបញ្ជាក់លម្អិតថា “យើងកំពុងរៀបចំការសម្រេចចិត្តនិងការចរចាដែលគួរតែពង្រឹងទាហានរបស់យើង ផ្តល់ឱ្យអ៊ុយក្រែននូវការគាំទ្ររបស់អន្តរជាតិ និងអាវុធជាច្រើនទៀត”។
លោកហ្សេលេនស្គីបាននិយាយនៅសប្តាហ៍នេះថា លោកចង់ឱ្យកិច្ចពិភាក្សាស្តីពីសមាជិកភាពរបស់អ៊ុយក្រែននៅក្នុងសហភាពអឺរ៉ុបចាប់ផ្តើមនៅឆ្នាំនេះ ដោយបង្កើនការប្រយុទ្ធប្រឆាំងនឹងអំពើពុករលួយ។
សមាជិកសភាជាន់ខ្ពស់ដែលស្និទ្ធនឹងលោកហ្សេលេនស្គី បាននិយាយកាលពីថ្ងៃអាទិត្យថា លោករីស្នីកូវ អាយុ ៥៦ ឆ្នាំ ដែលជាមុខមាត់ដ៏ល្បីម្នាក់នៃកិច្ចខិតខំប្រឹងប្រែងសង្គ្រាមរបស់ប្រទេសនឹងត្រូវដូរចេញ។
សមាជិកសភាលោក ដេវីដ អារ៉ាខាមៀ (David Arakhamia)ដែលសំដៅទៅលើប្រធានចារកម្មយោធាវ័យ ៣៧ ឆ្នាំ បាននិយាយថា “លោក គីរីឡូ ប៊ូដានូវ (Kyrylo Budanov)នឹងដឹកនាំក្រសួងការពារជាតិ ដែលពិតជាសមហេតុផលក្នុងសម័យសង្គ្រាម”។
ដោយកាន់ឋានន្តរស័ក្តិឧត្តមសេនីយ៍ទោ លោកប៊ូដានូវបានដឹកនាំផ្នែកចារកម្មយោធាចាប់តាំងពីខែសីហា ឆ្នាំ ២០២០៕
រដ្ឋមន្ត្រីការពារជាតិអ៊ុយក្រែនលោក អូឡេកសី រីស្នីកូវ
