Views: 10
ប្រែសម្រួលៈបំណង(ស្ត្រេតថែមស៍)៖ ថ្លៃប្រេងរុស្ស៊ីគួរកំណត់ត្រឹម៣០និង៤០ដុល្លារក្នុងមួយបារ៉ែល អោយទាបជាងកំរិតដែលក្រុមប្រទេសG-7បានស្នើឡើង នេះបើតាមការលើកឡើងរបស់ប្រធានាធិបតីអ៊ុយក្រែនលោកវ៉ូឡូឌីមៀ ហ្សេឡេនស្គីកាលពីថ្ងៃសៅរ៍។
បណ្តារដ្ឋាភិបាលក្នុងសហភាពអឺរ៉ុប កំពុងស្វះស្វែងបិទខ្ទប់លទ្ធភាពរបស់រដ្ឋាភិបាលទីក្រុងមូស្គូក្នុងការរកលុយដើម្បីចិញ្ចឹមសង្គ្រាមរបស់ខ្លួននៅក្នុងប្រទេសអ៊ុយក្រែនដោយមិនធ្វើអោយប៉ះពាល់ការផ្គត់ផ្គង់ប្រេងខ្លាំងនៅក្នុងលោក។តែកិច្ចខិតខំរបស់ពួកគេកំពុងជួបការខ្វែងគំនិតគ្នានៅពេលក្រុមG-7ប្រុងកំណត់ថ្លៃប្រេងរុស្ស៊ីត្រឹម៦៥ទៅ៧០ដុល្លារក្នុងមួយបារ៉ែលខណៈប្រេងនៅទីផ្សារអន្តរជាតិមានថ្លៃជាង៩០ដុល្លារ។
វានឹងត្រូវអនុវត្តចាប់ពីថ្ងៃ៥ធ្នូតទៅ តែមិនទាន់មានការព្រមព្រៀងថានឹងយកថ្លៃកំរិតណានៅឡើយ។
លោកហ្សេឡេនស្គី បាននិយាយថា«ថ្លៃកំណត់៦០ដុល្លារក្នុងមួយបារ៉ែលកំពុងត្រូវបានពិចារណានៅពេលនេះ ។ខ្ញុំគិតថាវាជាព្រំដែនសិប្បនិម្មិតមួយ។យើងចង់អោយទណ្ឌកម្មនេះមានប្រសិទ្ធភាពក្នុងសង្គ្រាមនេះ ដូច្នេះថ្លៃកំណត់គួរ៣០ទៅ៤០ដុល្លារ ដើម្បីអោយរុស្ស៊ីដឹងថាវាជាទណ្ឌកម្មពិតៗ»។
គំនិតស្តីពីការកំណត់ថ្លៃប្រេងរុស្ស៊ីនេះមានបំណងរារាំងមិនអោយក្រុមហ៊ុនដឹកជញ្ជូន និងធានារ៉ាប់រងរកស៊ីជាមួយនឹងប្រេងឆៅរុស្ស៊ីនៅទូទាំងពិភពលោក បើសិនជាវាមិនលក់ចេញនៅថ្លៃកំណត់ដោយក្រុមG-7និងសម្ពន្ធមិត្តទេ។ប៉ូឡូញ អេស្តូនីនិងលីទុយអានី កំពុងជំរុញអោយកំណត់ថ្លៃទាបជាង៦៥-៧០ដុល្លារក្នុងមួយបារ៉ែល នៅពេលក្រិច សាយព្រឺស និងម៉ាល់តាចង់បានខ្ពស់ឡើង៕
ប្រធានាធិបតីអ៊ុយក្រែនលោកវ៉ូឡូឌីមៀ ហ្សេឡេនស្គី និយាយក្នុងសន្និសីទកាសែតមួយកាលពីថ្ងៃសៅរ៍
