Views: 1
ប្រែសម្រួល : កញ្ញាដាលីស (ដេល្លីម៉េល) ៖ កាលពីថ្ងៃព្រហស្បតិ៍ទី៦តុលាមេដឹកនាំនៅទូទាំងទ្វីបអឺរ៉ុបបានសាទររណសិរ្សរួបរួមរបស់ពួកគេប្រឆាំងនឹងសង្គ្រាមរបស់រុស្ស៊ីលើអ៊ុយក្រែននៅក្នុងកិច្ចប្រជុំកំពូលមួយ ដែលឃើញប្រមុខនៃគូសត្រូវចាស់តួកគីនិងអាមេនីជួបទល់មុខគ្នាលើកដំបូងចាប់តាំងពីពួកគេបានព្រមព្រៀងគ្នាកាលពីឆ្នាំមុនដើម្បីដាក់ភាពជូរចត់រាប់ទសវត្សរ៍នៅមួយឡែកសិន។
កិច្ចប្រជុំកំពូលបើកឆាកនៃសហគមន៍នយោបាយអឺរ៉ុបបានប្រមូលផ្តុំប្រទេសសមាជិកសហភាពអឺរ៉ុបទាំង ២៧ ដៃគូពោរពេញដោយបំណងប្រាថ្នានៅតំបន់បាល់កង់និងអឺរ៉ុបខាងកើតក៏ដូចជាប្រទេសជិតខាងដូចជាចក្រភពអង់គ្លេស ដែលជាប្រទេសតែមួយគត់ចាកចេញពីសហភាពអឺរ៉ុប។
រុស្ស៊ីគឺជាមហាអំណាចអឺរ៉ុបមួយដែលមិនត្រូវបានអញ្ជើញឱ្យចូលរួមក្នុងការប្រមូលផ្តុំនៅប្រាសាទប្រាក រួមជាមួយបេឡារូស ជាអ្នកជិតខាងនិងជាអ្នកគាំទ្រនៅក្នុងសង្គ្រាមប្រឆាំងនឹងអ៊ុយក្រែនដែលជាជម្លោះមួយរុញឱ្យមានវិបត្តិថាមពលនិងអតិផរណាខ្ពស់ ដែលកំពុងបំផ្លិចបំផ្លាញសេដ្ឋកិច្ចអឺរ៉ុប។
នាយករដ្ឋមន្ត្រីអង់គ្លេស លោកស្រី លីស ត្រាស (Liz Truss) បាននិយាយថា “ក្រុមមេដឹកនាំចាកចេញពីកិច្ចប្រជុំកំពូលនេះជាមួយនឹងការតាំងចិត្តរួមគ្នាកាន់តែខ្លាំងដើម្បីក្រោកឈរឡើងតតាំងនឹងការឈ្លានពានរបស់រុស្ស៊ី។ អ្វីដែលយើងបានឃើញនៅទីក្រុងប្រាក គឺ ការបង្ហាញកម្លាំងសាមគ្គីភាពជាមួយអ៊ុយក្រែន និងសម្រាប់គោលការណ៍នៃសេរីភាពនិងលទ្ធិប្រជាធិបតេយ្យ”។
សមភាគីបែលហ្ស៊ិករបស់លោកស្រី គឺ លោក អាឡិចសាន់ឌឺ ដឺ គ្រូ (Alexander De Croo) បាននិយាយថា “ប្រសិនបើអ្នកគ្រាន់តែមើលការចូលរួមនៅទីនេះ អ្នកមើលឃើញពីសារៈសំខាន់។ទ្វីបអឺរ៉ុបទាំងមូលនៅទីនេះ លើកលែងតែប្រទេសពីរគឺបេឡារូសនិងរុស្ស៊ី។ ដូច្នេះវាបង្ហាញថាតើប្រទេសទាំងពីរនោះឯកោកម្រិតណា”។
នាយករដ្ឋមន្ត្រីឡេតូនីលោក គ្រីសចានី ការីន (Krisjanis Karins) បាននិយាយថា វិបត្តិពីសង្គ្រាមគឺជាអ្វីដែលពួកគេទាំងអស់គ្នាមានដូចគ្នា។
លោកបាននិយាយថា “វាប៉ះពាល់ដល់យើងទាំងអស់គ្នាក្នុងន័យសន្តិសុខ ហើយវាប៉ះពាល់ដល់យើងទាំងអស់គ្នាតាមរយៈសេដ្ឋកិច្ចរបស់យើង តាមរយៈការកើនឡើងនៃថ្លៃថាមពល។ដូច្នេះវិធីតែមួយគត់ដែលយើងអាចដោះស្រាយបានគឺធ្វើការជាមួយគ្នា មិនមែនត្រឹមតែសហភាពអឺរ៉ុបប៉ុណ្ណោះទេ។ បណ្តាប្រទេសអឺរ៉ុបទាំងអស់ចាំបាច់ត្រូវធ្វើការជាមួយគ្នា”។
នាយករដ្ឋមន្ត្រីអ៊ុយក្រែនលោក ដេនីស ស្មីហាល់ (Denys Shmyhal) កំពុងស្ថិតនៅទីក្រុងប្រាកសម្រាប់កិច្ចប្រជុំនេះ ខណៈប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គីបាននិយាយទៅកាន់មេដឹកនាំតាមរយៈវីដេអូ។
លោកហ្សេលេនស្គីបាននិយាយថា “មិនមានអ្នកតំណាងរបស់រុស្ស៊ីនៅជាមួយយើងនៅទីនេះទេ ជារដ្ឋដែលតាមភូមិសាស្ត្រហាក់ជាកម្មសិទ្ធិរបស់អឺរ៉ុបប៉ុន្តែតាមទស្សនៈនៃតម្លៃនិងអាកប្បកិរិយារបស់ខ្លួនគឺជារដ្ឋដែលប្រឆាំងនឹងអឺរ៉ុបបំផុតនៅក្នុងពិភពលោក”។
លោកបាននិយាយថា “ឥឡូវនេះយើងស្ថិតក្នុងជំហររឹងមាំមួយដើម្បីដឹកនាំមហាអំណាចទាំងអស់នៃទ្វីបអឺរ៉ុបឱ្យបញ្ចប់សង្គ្រាម និងធានាសន្តិភាពយូរអង្វែង។ សម្រាប់អ៊ុយក្រែន សម្រាប់អឺរ៉ុប សម្រាប់ពិភពលោក”៕
មេដឹកនាំនៅទូទាំងទ្វីបអឺរ៉ុបបានសាទររណសិរ្សរួបរួមរបស់ពួកគេប្រឆាំងនឹងសង្គ្រាមរបស់រុស្ស៊ីលើអ៊ុយក្រែននៅក្នុងកិច្ចប្រជុំកំពូលកាលពីថ្ងៃព្រហស្បតិ៍
