Views: 12
ដោយៈសុខុម / មណ្ឌលគីរីៈ មកដល់រសៀលថ្ងៃទី៩ ខែសីហា ឆ្នាំ២០២២ សមត្ថកិច្ចខេត្តមណ្ឌលគីរី បានរកឃើញសាកសពអ្នកបើកបរ រថយន្តដឹកស៊ីទែនហ្គាស មានទម្ងន់រាប់តោន ដែលក្រឡាប់បណ្ដាលឱ្យខូចខាតដល់ផ្ទះប្រជាពលរដ្ឋហើយ។
សមត្ថកិច្ច បានរំលឹកឲ្យដឹងថាៈ រថយន្តដឹកស៊ីទែនហ្គាសមួយគ្រឿងធំ បានក្រឡាប់ចូលផ្ទះប្រជាពលរដ្ឋ នៅផ្លូវជាតិ៧៦ ចំណុចផ្ទះចាន់សំណាង និងហ៊ឹមវល្ណី ផ្ទះលីចន្តា កាលពីថ្ងៃទី៧ ខែសីហា ឆ្នាំ២០២២ ស្ថិតក្នុងភូមិចំបក់ សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
រថយន្តយីឌុបបួនភ្លៅ ដឹកហ្គាស គឺជារបស់ក្រុមហ៊ុន តារា ធី ស៊ី ហ្គាស បានបើកក្នុងល្បឿនលឿន ត្រង់ចំណុចផ្លូវកោង ហើយបានបុករះតូបចំនួនប្រាំតូប បណ្តាលឲ្យក្រឡាប់ខ្លួនឯង។
សមត្ថកិច្ច បានបញ្ជាក់ថាៈ អ្នកបើករថយន្តឈ្មោះ សឿន សាវឿន ភេទប្រុស អាយុ៣៥ឆ្នាំជនជាតិខ្មែរ មុខរបរបើកបរ រស់នៅបច្ចុប្បន្ន ភូមិព្រៃឈរ ឃុំព្រៃឈរ ស្រុកព្រៃឈរ ខេត្តកំពង់ចាម។ រថយន្តម៉ាកយីឌុបបួនភ្លៅ ពាក់ផ្លាកលេខ 3E ភ្នំពេញ.4191។
នៅពេលយករថយន្តស្ទួចប្រភេទធំ ចំនួនពីគ្រឿង មកស្ទួចរថយន្ដដែលក្រឡាប់នោះឡើង ទើបបានឃើញសពអ្នកបើកបរ គៀបជាប់ក្នុងកាប៊ីនរថយន្ត។ កម្លាំងសមត្ថកិច្ច បានយកដែកគាស់កាប៊ីនរថយន្ត និងយកកៅឡាក់ ទាក់កាប៊ីន ហើយយករថយន្តអូសទាញ ទើបបានយកសពចេញបាន។
នៅក្នុងហេតុការណ៍គ្រោះថ្នាក់ចរាចរណ៍នោះបង្កឲ្យម្ចាស់តូប ឈ្មោះ តឹក ម៉េងអឹង អាយុ ៣៥ ឆ្នាំ និងប្រពន្ធឈ្មោះ សម្បត្តិ ស្រីតូច អាយុ៣១ឆ្នាំ ជនជាតិខ្មែរ មានមុខរបរ លក់ដូរ ដូចគ្នា និងរងរបួសទាំងពីរនាក់។ ប្ដីឈ្មោះ ញ៉ សុជា អាយុ ២៨ ឆ្នាំ មុខរបរកសិករ និងប្រពន្ធជាម្ចាស់តូប ឈ្មោះ ខាំ សុភាព អាយុ ៣៤ ឆ្នាំ ជនជាតិខ្មែរ មុខរបរលក់ដូរ ព្រមទាំងប្អូនស្រី ពីរនាក់ រស់នៅជាមួយ ឈ្មោះ ខាំ សុភ័ណ្ឌ អាយុ ២៧ ឆ្នាំ និងឈ្មោះ ហ៊ុន មូលីកា អាយុ ២០ ឆ្នាំ ជនជាតិខ្មែរ មុខរបរកសិករ គឺទាំងបួននាក់ បានរងរបួស។ ម្ចាស់តូបឈ្មោះ កៅ វិចិត្ត ភេទប្រុសអាយុ ៣៣ ឆ្នាំ ជនជាតិខ្មែរ និងប្រពន្ធ ឈ្មោះសៀក បុប្ផា អាយុ ៣០ ឆ្នាំ ជនជាតិខ្មែរ មុខរបរលក់ដូរ និងកូនស្រី ឈ្មោះកៅ ហ្គិចលាង អាយុ ២ ឆ្នាំ រស់នៅភូមិ សង្កាត់ កើតហេតុខាងលើ មិនមានអ្នករងរបួសធ្ងន់នោះទេ។
ចំណែកសពតៃកុងរថយន្ដដឹកហ្គាស ត្រូវបានសមត្ថកិច្ច ពិនិត្យរួច ក៏បានប្រគល់ឱ្យទៅក្រុមគ្រួសារយកទៅធ្វើបុណ្យ ។ ឯរថយន្តដឹកហ្គាសនោះ បានស្ទួចដាក់លើរថយន្តមួយទៀត ដឹកយកទៅបង្ហូរដាក់ស្ថានីយ៍ហ្គាសរបស់ក្រុមហ៊ុន តារា ស៊ី ធី ហ្គាស នៅក្នុងខេត្តមណ្ឌលគិរី រួចហើយរថយន្តនោះ ក៏បានយកមករក្សាទុកនៅស្នងការដ្ឋាននគរបាលខេត្តមណ្ឌលគិរី ដើម្បីដោះស្រាយតាមផ្លូវច្បាប់៕/V
