Views: 6
ប្រែសម្រួល : កញ្ញាដាលីស (ដេល្លីម៉េល) ៖ មនុស្សបីនាក់ រួមទាំងគូស្នេហ៍វ័យចំណាស់មួយគូ ដែលទើបប្រារព្ធខួបអាពាហ៍ពិពាហ៍លើកទី ៥៦ របស់ពួកគេ ត្រូវបានប្រកាសស្លាប់កាលពីថ្ងៃសុក្រទី៥សីហា បន្ទាប់ពីត្រូវរន្ទះបាញ់នៅក្នុងសួនក្បែរសេតវិមាន។
រន្ទះបានបាញ់លើទីលានឡាហ្វាយ៉េត (Lafayette) ដែលជាសួនតូចមួយនៅមួយផ្លូវពីសេតវិមាន ភ្លាមៗមុនម៉ោង ៧៖០០ យប់កាលពីថ្ងៃព្រហស្បតិ៍ ដោយបណ្តាលឱ្យបុរសពីរនាក់និងស្ត្រីពីរនាក់ “រងរបួសធ្ងន់ធ្ងរគំរាមដល់អាយុជីវិត” នេះបើយោងតាមសេចក្តីថ្លែងការណ៍មួយពីនាយកដ្ឋានពន្លត់អគ្គិភ័យនិងសង្គ្រោះបន្ទាន់របស់ក្រុងវ៉ាស៊ីនតោន។
ជនរងគ្រោះទាំងអស់ត្រូវបានបញ្ជូនទៅមន្ទីរពេទ្យក្នុងស្រុក ប៉ុន្តែនៅព្រឹកថ្ងៃសុក្រ ប៉ូលិសក្រុងបានបញ្ជាក់ថា ពួកគេពីរនាក់គឺ ឈ្មោះ ដូនណា មូលល័រ (Donna Mueller) អាយុ ៧៥ ឆ្នាំ និង ជេមស៍ មូលល័រ (James Mueller) អាយុ ៧៦ ឆ្នាំមកពីទីក្រុងជេនស៍វីល (Janesville) ក្នុងរដ្ឋវីស្កុនសិន (Wisconsin) ត្រូវបានប្រកាសស្លាប់។
ក្មួយស្រីរបស់ពួកគេឈ្មោះ មីសែល ម៉ាកណេត (Michelle McNett) បានប្រាប់កាសែត ថា គូស្នេហ៍មួយគូនេះគឺជាសង្សារនឹងគ្នានៅវិទ្យាល័យហើយកំពុងនៅក្នុងរដ្ឋធានីដើម្បីប្រារព្ធខួបអាពាហ៍ពិពាហ៍របស់ពួកគាត់។
ប៉ូលិសបាននិយាយថា ក្រោយមកជនរងគ្រោះទីបី ជាបុរសអាយុ២៩ឆ្នាំ ក៏បានស្លាប់ដោយសាររបួសដែរ។
មនុស្សពេញវ័យម្នាក់ទៀតកំពុងស្ថិតក្នុងស្ថានភាពធ្ងន់ធ្ងរ។
អ្នកនាំពាក្យសេតវិមានបាននិយាយថា រដ្ឋបាលបៃដិន “សោកស្តាយចំពោះការបាត់បង់ជីវិតដ៏សោកនាដកម្មនេះ”៕
មនុស្សបីនាក់ស្លាប់និងម្នាក់របួសធ្ងន់ដោយសាររន្ទះបាញ់ក្បែរសេតវិមានកាលពីយប់ថ្ងៃព្រហស្បតិ៍
