Views: 1
ប្រែសម្រួល : កញ្ញាដាលីស (VNExpress) ៖ របាយការណ៍ស្រាវជ្រាវបានរកឃើញថា ប្រទេសមួយចំនួនដែលងាយរងគ្រោះបំផុតចំពោះការប្រែប្រួលអាកាសធាតុ រួមទាំងវៀតណាមនិងកម្ពុជាប្រឈមមុខនឹងការកើនឡើងយ៉ាងខ្លាំងនៃការបង់ថ្លៃសេវាបំណុលក្នុងរយៈពេលពីរឆ្នាំខាងមុខ។
ក្រុមប្រទេសងាយរងគ្រោះទាំងម្ភៃ (V20) ពោលជាក្រុមសេដ្ឋកិច្ចចំនួន ៥៥ ដែលប្រឈមនឹងវិបត្តិនៃបម្រែបម្រួលអាកាសធាតុ រំពឹងថា ការទូទាត់សេវាបំណុលនឹងកើនឡើងដល់ ៦៩ពាន់លានដុល្លារនៅឆ្នាំ ២០២៤ ដែលជាកម្រិតខ្ពស់បំផុតក្នុងទសវត្សរ៍បច្ចុប្បន្ន នេះបើយោងតាមការគណនាពី V20 និង មជ្ឈមណ្ឌលគោលនយោបាយអភិវឌ្ឍន៍សកលរបស់សាកលវិទ្យាល័យបូស្តុន។
ក្រុមអ្នកនិពន្ធបាននិយាយថា ការកើនឡើងនៃការចំណាយនឹងរារាំងលទ្ធភាពរបស់ពួកគេក្នុងការវិនិយោគក្នុងការការពារអាកាសធាតុ និងធ្វើអោយសេដ្ឋកិច្ចរបស់ពួកគេធ្លាក់ចុះ។
ពួកគេបាននិយាយថា ការទូទាត់សេវាបំណុលនៅឆ្នាំ ២០២២ មានចំនួន ៦១,៥ ពាន់លានដុល្លារ ហើយគ្រោងនឹងមានខ្ពស់ជាងនេះនៅឆ្នាំ ២០២៣។
លោកស្រី លូម៉ា រ៉ាម៉ូស (Luma Ramos)បានសរសេរនៅក្នុងរបាយការណ៍ដែលបានចេញផ្សាយកាលពីថ្ងៃសុក្រទី២៣កញ្ញាថា ទីផ្សារដែលកំពុងងើបឡើងនិងប្រទេសកំពុងអភិវឌ្ឍន៍(EMDs)កំពុងជួបការលំបាកជាមួយជំងឺរាតត្បាតកូវីដ១៩ សង្គ្រាមរុស្ស៊ីនៅអ៊ុយក្រែន វិបត្តិអាកាសធាតុ និងការដំឡើងអត្រាការប្រាក់នៅក្នុងប្រទេសដែលមានសេដ្ឋកិច្ចជឿនលឿន។
គម្រោងបន្ធូរបន្ថយបំណុលមួយចំនួនសម្រាប់ប្រទេសក្រីក្របំផុតរបស់ពិភពលោកត្រូវបានដាក់ឱ្យដំណើរការ បន្ទាប់ពីជំងឺរាតត្បាតបានធ្វើឱ្យទីផ្សារហិរញ្ញវត្ថុពិភពលោកកាន់តែរញ៉េរញ៉ៃនិងរារាំងសេដ្ឋកិច្ចជុំវិញពិភពលោក។
ទោះយ៉ាងណា វឌ្ឍនភាពមានភាពយឺតយ៉ាវ ហើយគម្រោងមួយចំនួនដូចជា គំនិតផ្តួចផ្តើមការផ្អាកសេវាបំណុល (DSSI) បានផុតកំណត់ហើយ។
របាយការណ៍បានបន្ថែមថា “បើគ្មានការបន្ធូរបន្ថយបំណុលនិងវិធានការបំពេញបន្ថែមផ្សេងទៀតដូចជាជំនួយទេ បណ្តាប្រទេស V20នឹងពន្យារសមត្ថភាពរបស់ពួកគេក្នុងការប្រមូលផលនៃការវិនិយោគអាកាសធាតុ ដូចជាការធ្វើឱ្យប្រសើរឡើងនូវភាពធន់ និងការពង្រឹងការផលិតថាមពលតាមរយៈថាមពលកកើតឡើងវិញ”។
បន្ថែមពីលើភាពស្មុគស្មាញនេះគឺការផ្លាស់ប្តូររចនាសម្ពន្ធម្ចាស់បំណុលនៅទូទាំងបំណុលសាធារណៈខាងក្រៅចំនួន ៦៨៦,៣ ពាន់លានដុល្លារ ដែលជំពាក់ដោយប្រទេស V20 ។ របាយការណ៍បានរកឃើញថា ម្ចាស់បំណុលឯកជននានាឥឡូវនេះគឺជាក្រុមធំបំផុត ដែលកាន់កាប់បំណុលច្រើនជាងមួយភាគបី ខណៈធនាគារពិភពលោកនិងស្ថាប័នពហុភាគីផ្សេងទៀតកាន់កាប់ម្នាក់ៗចំនួនមួយភាគប្រាំនៃបំណុល។ បណ្តាប្រទេស V20 ជំពាក់ ៧ ភាគរយនៃបំណុលសរុបរបស់ចិន ខណៈ ១៣ ភាគរយជំពាក់ទៅបណ្តាប្រទេសម្ចាស់បំណុលដែលមានទ្រព្យសម្បត្តិស្តុកស្តម្ភ ហៅថា Paris Club ។
អ្នកនិពន្ធក៏បានជំរុញឱ្យអង្គការមូលនិធិរូបិយវត្ថុអន្តរជាតិធ្វើឱ្យប្រសើរឡើងនូវការវិភាគអំពីនិរន្តរភាពបំណុលរបស់ខ្លួនដើម្បីគណនាហានិភ័យអាកាសធាតុដែលប្រទេសងាយរងគ្រោះប្រឈមមុខផងដែរ។
របាយការណ៍បានរកឃើញថា “ដោយហេតុថាផលប៉ះពាល់អាកាសធាតុកំពុងបង្កើនថ្លៃដើមទុនសម្រាប់ប្រទេសដែលងាយរងគ្រោះ ការផ្សារភ្ជាប់គ្នាយ៉ាងជិតស្និទ្ធរវាងការប្រែប្រួលអាកាសធាតុនិងនិរន្តរភាពបំណុលចាំបាច់ត្រូវតែយកចិត្តទុកដាក់ ហើយគួរតែជូនដំណឹងដល់ការពិភាក្សាអំពីប្រទេសដែលត្រូវការការបន្ធូរបន្ថយបំណុល”។
ប្រទេសសេដ្ឋកិច្ច V20 រួមមាន បាបាដូស កម្ពុជា កូស្តារីកា អេត្យូពី ហុងឌូរ៉ាស់ លីបង់ ម៉ារ៉ុក នេប៉ាល់ ហ្វីលីពីន រ៉វ៉ាន់ដា សេណេហ្គាល់ ស៊ូដង់ តង់ហ្សានី ទុយនីស៊ី ទូវ៉ាលូ និង វៀតណាម៕
សង្កាត់ឈួងមីនៅខាងក្រៅទីក្រុងហាណូយត្រូវបានជន់លិចបន្ទាប់ពីមានភ្លៀងធ្លាក់ខ្លាំងក្នុងខែកញ្ញា ឆ្នាំ ២០២២