Views: 2
ដោយ៖ សុវណ្ណកុម្ភៈ / ភ្នំពេញ៖ ទិវារត់ប្រណាំងអន្ដរជាតិពាក់កណ្ដាលម៉ារ៉ាតុង លើកទី២៧ គ្រោងនឹងរៀបចំ នាថ្ងៃទី៤ ខែធ្នូ ឆ្នាំ២០២២ ខាងមុខ ហើយក៏កំពុងទទួល បានការចុះឈ្មោះ ជាបណ្ដើរៗ ផងដែរ ។ នេះបើតាមការបញ្ជាក់បន្ថែមរបស់លោក វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) ។
មកទល់ពេលនេះ មានអ្នកមកចុះឈ្មោះ ចូលរួមរត់ក្នុងព្រឹត្តិការណ៍នេះ មានចំនួនជិត ៣.០០០ នាក់ហើយ។ ជាមួយនឹងការចុះឈ្មោះជាបណ្ដោះអាសន្ននេះ គណៈកម្មការ រៀបចំ បានប្ដេជ្ញា សម្រាប់ព្រឹត្តិការណ៍ឆ្នាំនេះ នឹងរៀបចំឲ្យកាន់តែប្រសើរ និងធំជាង ឆ្នាំកន្លងទៅ ដើម្បីទាក់ទាញភ្ញៀវទេសចរ ជាតិ-អន្ដរជាតិ ចូលរួមឲ្យបានច្រើនកុះករ ដូចកាលមុនផ្ទុះជំងឺកូវីដ-១៩។
នៅថ្ងៃសុក្រទី២៣ កញ្ញា ម្សិលមិញនេះ គណៈកម្មាធិការជាតិអូឡាំពិកកម្ពុជា បរិច្ចាគទឹកប្រាក់ ចំនួន ៣ ម៉ឺនដុល្លារអាមេរិក ដល់មន្ទីរពេទ្យកុមារ និងអង្គការមនុស្សធម៌ ចំនួន ៩ ដើម្បីគាំទ្រ និងចូលរួមសកម្មភាពមនុស្សធម៌ ក៏ដូចជា ជួយកាត់បន្ថយ ការលំបាក មួយចំនួនរបស់សង្គម និងរួមចំណែកអភិវឌ្ឍន៍ប្រទេសជាតិ។
លោក វ៉ាត់ ចំរើន បានមានប្រសាសន៍ថាៈ ថវិកា ៣ ម៉ឺនដុល្លារនេះ បានមកពីការប្រមែ ប្រមូល ក្នុងបរិបទកូវីដ ១៩ ពិសេសអ្នកចូលរួមរត់ប្រណាំងអន្ដរជាតិ ពាក់កណ្ដាល ម៉ារ៉ាតុង លើកទី២៦ នៅអង្គរវត្ត ខេត្តសៀមរាប កាលពីដើមឆ្នាំ២០២២ កន្លងទៅ ដែលត្រូវបែងចែកដល់អង្គការនានា ក្នុងនោះ មានកាកបាទក្រហមកម្ពុជា ១ ម៉ឺនដុល្លារ ដែល NOCC នឹងនាំយកទៅប្រគល់ជូនដល់ទីតាំងផ្ទាល់នាពេលក្រោយ។
អង្គការមនុស្សធម៌ ដែលទទួលបានផ្ទាល់ នៅទីស្នាក់ការ NOCC រួមមាន៖ មន្ទីរពេទ្យគន្ធបុប្ផា ៥.០០០ ដុល្លារ, អង្គការ Cambodia Trust ២.៥០០ ដុល្លារ, អង្គការ Handicap International ២.០០០ ដុល្លារ និងថវិកា ១០.៥០០ ដុល្លារទៀត បានប្រគល់ជូនអង្គការបេះដូងមាស (Heart of Gold) ដែលទទួលបន្ទុកអង្គការពាក់ព័ន្ធចំនួន៥ មានអង្គការ Cambodia Disable Athletics Federation (CDAF), Support Disable Athletics, New Child Care Center (NCC), Physical Education Project និងអង្គការ Youth Development Project។
លោក សែម ផល្លា នាយកបច្ចេកទេសរៀបចំព្រឹត្តិការណ៍កីឡា និងទេសចរណ៍នេះ បានបញ្ជាក់ថាៈ ថវិកាទទួលបានពីការរៀបចំទិវារត់ប្រណាំងអន្ដរជាតិពាក់កណ្ដាល ម៉ារ៉ាតុង លើកទី២៦ នៅខេត្តសៀមរាប លើកនេះ មានការថយចុះច្រើន បើធៀបនឹងលើកមុនៗ ដោយសារការរៀបចំ ក្នុងបរិបទកូវីដ ១៩។ ប៉ុន្ដែលោកមាន ជំនឿចិត្តថា សម្រាប់ការរៀបចំក្រោយៗ នឹងមានអ្នកចូលរួម កើនឡើងច្រើនឡើងវិញ ដើម្បីទទួលបាននូវថវិកាច្រើន សម្រាប់គាំទ្រដល់អង្គការដៃគូ ដែលជាអង្គការចូលរួម សកម្មភាពមនុស្សធម៌ និងការងារសង្គម៕/V
