Views: 5
ដោយៈ បាយ័ន / សៀមរាបៈ នាព្រឹកថ្ងៃទី២៣ ខែកញ្ញា ឆ្នាំ២០២២ នេះ បងប្អូនប្រជាពលរដ្ឋ ជាមន្ត្រីរាជការ កងកម្លាំងប្រដាប់អាវុធ កម្មករ កម្មការិនី សិស្ស និស្សិត បានធ្វើដំណើរតាម រថយន្តក្រុង ដោយឥតគិតថ្លៃ ទៅលេងស្រុកកំណើត ដើម្បីជួបជុំបងប្អូនក្រុមគ្រួសារ នៅក្នុងឱកាសពិធីបុណ្យភ្ជុំបិណ្ឌ។ ក្នុងព្រឹកនេះ ក្រុមការងារដឹកជញ្ជូន បានប្រើប្រាស់ រថយន្តចំនួន ១៨ គ្រឿង និងមានអ្នកធ្វើដំណើរចំនួន ៩៩០ នាក់។ នេះបើតាមការបញ្ជាក់ ឱ្យដឹងរបស់ រដ្ឋបាលខេត្តសៀមរាប នៅព្រឹកថ្ងៃទី២៣ ខែកញ្ញា នេះ។
ជាមួយគ្នានេះដែរ បងប្អូនបានថ្លែងអំណរគុណ យ៉ាងជ្រាលជ្រៅចំពោះ សម្តេចតេជោ នាយកដ្ឋមន្ត្រី ដែលបានគិតគូរចំពោះប្រជាពលរដ្ឋ ដោយអនុញ្ញាតឱ្យរថយន្តរបស់ រដ្ឋាករស្វយ័តដឹកជញ្ជូនសាធារណៈ រថយន្តក្រុង (City Bus) រាជធានីភ្នំពេញ ដឹកជញ្ជូន បងប្អូនប្រជាពលរដ្ឋ ដោយឥតគិតថ្លៃ។
សូមបញ្ជាក់ថា រថយន្តត្រូវចេញដំណើរនៅទីតាំង និងកាលបរិច្ឆេទ ដូចខាងក្រោម៖
១-ចេញពីភ្នំពេញ មកសៀមរាបៈ
-ចាប់ពីថ្ងៃទី២៣ ដល់ ២៦ ខែកញ្ញា ឆ្នាំ២០២២ ចេញដំណើរនៅម៉ោង ៥:៣០ នាទីព្រឹក (ចេញជាបន្ទាប់ រហូតអស់រថយន្ត) នៅទីតាំង រង្វង់មូល ទេពមច្ឆា ស្ពានជ្រោយចង្វា រាជធានីភ្នំពេញ។
២-ចេញពី សៀមរាប ទៅភ្នំពេញៈ
-ចាប់ពីថ្ងៃទី២៣ ដល់ ២៥ ខែកញ្ញា ឆ្នាំ២០២២ ចេញដំណើរ នៅម៉ោង ១:០០ នាទី រសៀល (ចេញបន្តបន្ទាប់ រហូតអស់រថយន្ត) ។
-ថ្ងៃទី២៧ ខែកញ្ញា ឆ្នាំ២០២២ ចេញដំណើរនៅម៉ោង ៦:០០ នាទីព្រឹក (ចេញជាបន្តបន្ទាប់ រហូតអស់រថយន្ត) នៅទីតាំងចំណតគ្រឹះស្ថានអង្គរ ជិតរង្វង់មូល ៦០ ម៉ែត្រ ខេត្តសៀមរាប៕ V / N