Views: 1
ដោយ: ចាន់តូ/ភ្នំពេញ: បុរសម្នាក់បានស្លាប់ និងបុរសម្នាក់ទៀត រងរបួសស្រាល បន្ទាប់ពីរថយន្តមួយគ្រឿង បុកចំម៉ូតូពីមុខពេញទំហឹង នៅវេលាម៉ោង១១:១០នាទីយប់ថ្ងៃចន្ទ ទី៣០ ខែឧសភា ឆ្នាំ២០២២ នៅត្រង់ចំណុចស្តុបផ្លូវបំបែកជាបួន (វត្តមហាមន្ត្រី) ស្ថិតតាមបណ្ដោយផ្លូវមហាវិថីព្រះសីហនុ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។
តាមប្រភពព័ត៌មានពីកន្លែងកើតហេតុបាន បញ្ជាក់ដល់ក្រុមការងារឲ្យបានដឹងថា៖ នៅមុន ពេលកើតហេតុគេបានឃើញបុរសចំនួនពីរនាក់ជិះម៉ូតូម៉ាកហុងដាឃ្លីកមួយគ្រឿង ពណ៌សលាយខ្មៅ ពាក់ស្លាកលេខ ភ្នំពេញ ១HJ.០០៧៤ បានធ្វើដំណើរតាមបណ្ដោយផ្លូវ១៦៣ ក្នុងទិសដៅពីជើងទៅត្បូង។
លុះពេលធ្វើដំណើរមកដល់ត្រង់ចំណុចកើតហេតុខាងលើ ក៏ស្រាប់តែមានរថយន្តមួយគ្រឿងមិនចាំម៉ាកធ្វើដំណើរតាមបណ្ដោយផ្លូវមហាវិថីព្រះសីហនុក្នុងទិសដៅពីស្តុប៤២ជាន់ឆ្ពោះទៅកាន់ស្តុបអាងទឹក ក្នុងល្បឿនលឿនបានបុកម៉ូតូចំពីមុខពេញទំហឹងបណ្តាលឲ្យបុរសម្នាក់ ហោះផ្លោងខ្ទាតបោកក្បាល ស្លាប់ភ្លាមៗនិងម្នាក់ទៀតរងរបួសស្រាល។ ចំណែកម៉ូតូរងការខូចខាតផ្នែកខាងមុខខ្ទេចស្ទើរទាំងស្រុង។ ឯរថយន្ដបង្កបើក រត់គេចពីកន្លែងកើតហេតុបាត់ស្រមោល។
ជនរងគ្រោះដែលស្លាប់ ជាជនជាតិវៀតណាម អាយុប្រមាណ ៣០ ឆ្នាំជាង ស្នាក់នៅម្តុំផ្សារប៉េសេ តាមបណ្តោយផ្លូវ៣៧១ មុខរបរ មេជាងកម្មករសំណង់ (ស្លាប់ )។
ក្រោយពេល កើតហេតុ សម្ថកិច្ចជំនាញ ផ្នែកចរាចរណ៍ បានធ្វើ ការវាស់វែង និងធ្វើកំណត់ហេតុ រួចប្រគល់សពឲ្យក្រុមគ្រួសារសាច់ញាតិ ទទួយកសពទៅធ្វើបុណ្យតាមប្រពៃណី។ ចំណែករថយន្តបង្កសម្ថកិច្ចជំនាញផ្នែក ចរាចរណ៍ ធ្វើការស្រាវជ្រាវនៅពេលក្រោយ៕