Views: 4
ដោយៈសុផល/ភ្នំពេញ៖លោក ថោង ខុន រដ្ឋមន្ត្រីក្រសួងទេសចរណ៍ និងលោក ងួន រតនៈ អភិបាលខេត្តកំពង់ធំ បានដឹកនាំកិច្ចប្រជុំពិភាក្សាស្ដីពីការត្រៀមរៀបចំពិធីបុណ្យទន្លេលើកទី៧ នៅខេត្តកំពង់ធំដោយមានការចូលរួមពីតំណាង ក្រសួងស្ថាប័នពាក់ព័ន្ធរដ្ឋបាលខេត្តនិងមន្ទីរអង្គភាពពាក់ព័ន្ធជុំវិញខេត្តប្រមាណ១២០នាក់។កិច្ចប្រជុំបានប្រព្រឹត្តិទៅនារសៀលថ្ងៃទី៣១ ខែមករានេះនៅសាលាខេត្តកំពង់ធំពិធីបុណ្យទន្លេនឹងប្រព្រឹត្តទៅរយៈពេលបីថ្ងៃ ចាប់ពីថ្ងៃទី០៨-១០ ខែមីនាក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត»។សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីបើកបុណ្យទន្លេនាល្ងាចថ្ងៃទី៩ ខែមីនា។
ប្រភពក្រសួងទេសចរណ៍នៅរសៀលថ្ងៃទី៣១ ខែមករាបានឱ្យដឹងថា ក្នុងពិធីបុណ្យទន្លេលើកទី៧នេះ នឹងមានព្រឹត្តិការណ៍ និងសកម្មភាពទាក់ទាញជាច្រើន ដូចជាការផ្សាយផ្ទាល់នូវការសម្ដែងទស្សនីយភាពសិល្បៈ និងការប្រគំតន្ត្រី មហោស្រពម្ហូបអាហារខ្មែរ និងអន្តរជាតិ ស្រា និងភេសជ្ជៈ ការតាំងពិព័រណ៍ផលិតផលកសិទេសចរណ៍ និងផលិតផលក្នុងស្រុក និងសកម្មភាពកីឡាលើគោក និងលើទឹក
ដើម្បីជំរុញដំណើរការរៀបចំបុណ្យទន្លេលើកទី៧នេះឲ្យបានរលូន និងទទួលបានជោគជ័យ រាជរដ្ឋាភិបាលបានចេញសេចក្ដីសម្រេចមួយលេខ ០៩សសរ ចុះថ្ងៃទី៣០ ខែមករា ឆ្នាំ២០២៣ ស្ដីពីការបង្កើតគណៈកម្មការអន្តរក្រសួងដើម្បីរៀបចំពិធីបុណ្យទន្លេលើកទី៧ ចាប់ពីថ្ងៃទី០៨-១០ ខែមីនា ឆ្នាំ២០២៣ ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត»។
បន្ថែមលើនេះលោក ថោង ខុន ប្រធានគណៈកម្មការអន្តរក្រសួងក៏បានចេញជាសេចក្ដីសម្រេចមួយលេខ ០២៤សសរ ចុះថ្ងៃទី៣១ ខែមករា ឆ្នាំ២០២៣ ស្ដីពីការបង្កើត និងតែងតាំងសមាសភាពអនុគណៈកម្មការ និងលេខាធិការដ្ឋាន ដែលរួមមាន៖អនុគណៈកម្មការរៀបចំខ្លឹមសារ និងពង្រឹងគុណភាពសេវាកម្មទេសចរណ៍, អនុគណៈកម្មការហិរញ្ញវត្ថុ ស្នាក់នៅ ហូបចុក ដឹកជញ្ជូន និងបដិសណ្ឋារកិច្ច, អនុគណៈកម្មការឃោសនាផ្សព្វផ្សាយ តាំងពិព័រណ៍សមិទ្ធិផលនានា និងគម្រោងអភិវឌ្ឍន៍ទេសចរណ៍ ក្រុមតន្ត្រីចល័តពេលថ្ងៃ មហោស្រពម្ហូបអាហារ និងតុបតែងលំអរក្នុងពិធី, អនុគណៈកម្មការរៀបចំទស្សនីយភាពសិល្បៈនិងព្យុហយាត្រា, អនុគណៈកម្មការរៀបចំកីឡាលើគោក និងកីឡាលើទឹក, អនុគណៈកម្មការសន្តិសុខ សណ្ដាប់ធ្នាប់សាធារណៈ និងសង្គ្រោះបន្ទាន់និង លេខាធិការដ្ឋាន។
ប្រភពដដែលបន្តថា ក្រោយពីអនុគណៈកម្មការនីមួយៗបានឡើងរាយការណ៍ពីលទ្ធផលការងាររួចមកលោក ថោង ខុន ប្រធានអង្គប្រជុំបានណែនាំដល់អនុគណៈកម្មការទាំងអស់និងលេខាធិការដ្ឋានបន្តខិតខំអនុវត្តការងាររបស់ខ្លួនឲ្យបានល្អ ដោយសហការជិតស្និទ្ធជាមួយរដ្ឋបាលខេត្ត និងមន្ទីរអង្គភាពពាក់ព័ន្ធជុំវិញខេត្ត និងផ្នែកឯកជនសំដៅធ្វើឱ្យ ព្រឹត្តិការណបុណ្យទន្លេនៅខេត្តកំពង់ធំក្លាយជាឱកាសដ៏ល្អប្រសើរសម្រាប់ពង្រឹងគុណភាពផលិតផលសេវាកម្មទេសចរណ៍ និងជំរុញការអភិវឌ្ឍហេដ្ឋារចនាសម្ព័ន្ធរបស់ខេត្ត ពិសេសលើកកម្ពស់មុខមាត់ និងកិត្យានុភាពរបស់ខេត្តកំពង់ធំ៕សរន