Views: 7
ដោយៈសុផល/ភ្នំពេញៈ តបតាមការអញ្ជើញរបស់ឥណ្ឌូនេស៊ីជាម្ចាស់ផ្ទះ លោក ថោង ខុន រដ្ឋមន្ត្រីក្រសួងទេសចរណ៍កម្ពុជា នៅថ្ងៃទី២៦ ខែកញ្ញា ឆ្នាំ២០២២នេះ បានដឹកនាំគណៈប្រតិភូក្រសួងទេសចរណ៍កម្ពុជា ចូលរួមកិច្ចប្រជុំថ្នាក់រដ្ឋមន្ត្រីទេសចរណ៍ប្រទេស G20 នៅទីក្រុងបាលី ប្រទេសឥណ្ឌូនេស៊ី។
( លោក ថោង ខុន រដ្ឋមន្ត្រីក្រសួងទេសចរណ៍កម្ពុជា )
កិច្ចប្រជុំនេះមានការចូលរួមពីរដ្ឋមន្ត្រី និងថ្នាក់ដឹកនាំទទួលបន្ទុកទេសចរណ៍ នៃប្រទេសG20, ប្រទេសជាភ្ញៀវចំនួន ២៤ប្រទេស ព្រមទាំងមានអង្គការ និងសហគមន៍អន្តរជាតិពាក់ព័ន្ធចំនួន៩ ផងដែរក្នុងនោះក៏មានដូចជា អង្គការទេសចរណ៍ពិភពលោក (UNWTO), ដៃគូរអភិវឌ្ឍន៍ និងអង្គការអន្តរជាតិធំៗក្នុងពិភពលោកមួយចំនួន។
ក្នុងនាមកម្ពុជា ជាប្រធានអាស៊ាន និងតំណាងឲ្យវិស័យទេសចរណ៍អាស៊ាន លោករដ្ឋមន្ត្រី បានបញ្ជាក់ជូនអង្គប្រជុំថា ប្រធានបទសម្រាប់ប្រធាន G20 ឥណ្ឌូនេស៊ី ឆ្នាំ២០២២នេះ គឺ «ស្តារឡើងវិញទាំងអស់គ្នា, ស្តារឡើងវិញខ្លាំងជាងមុន (Recover Together, Recover Stronger )» ដើម្បីបង្កើនល្បឿននៃការស្ដារឡើងវិញបន្ទាប់ពីជំងឺរាតត្បាតកូវីដ-១៩ ។
លោករដ្ឋមន្ត្រីបានថ្លែងថា ប្រធានបទនេះ ពិតជាស្របនឹងប្រធានបទអាស៊ានឆ្នាំ២០២២ ក្រោមភាពជាប្រធានរបស់កម្ពុជា «A.C.T: Addressing Challenges Together (រួមគ្នាដោះស្រាយបញ្ហាប្រឈម)» ហើយជាពិសេសកាន់តែជាប់ពាក់ព័ន្ធនឹងវិស័យទេសចរណ៍ ដែលជាវិស័យរងផលប៉ះពាល់ខ្លាំងជាងគេ។
ក្នុងសុន្ទរកថា លោករដ្ឋមន្ត្រីបានចែករំលែកបទពិសោធន៍ នៃកិច្ចខិតខំស្ដារវិស័យទេសចរណ៍របស់រាជរដ្ឋាភិបាល ព្រមទាំងបង្ហាញអំពីអាទិភាពមួយចំនួនក្នុងការស្តារវិស័យទេសចរណ៍អាស៊ាន ដែលកិច្ចប្រជុំរដ្ឋមន្ត្រីទេសចរណ៍អាស៊ាន ដឹកនាំដោយកម្ពុជា បានដាក់ចុះ នាអំឡុងវេទិកាទេសចរណ៍អាស៊ាន ២០២២ (ATF2022) នៅក្រុងព្រះសីហនុ ។
លោករដ្ឋមន្ត្រីក៏បានថ្លែងនិងគួសបញ្ជាក់អំពី បទពិសោធន៍កម្ពុជាក្នុងរយៈពេលជាង ២ឆ្នាំ កន្លងមកនេះ នៅក្នុងការទប់ស្កាត់ការឆ្លងជំងឺកូវីដ១៩ និងដោះស្រាយផលប៉ះពាល់បានយ៉ាងមានប្រសិទ្ធភាព តាមរយៈការដាក់ចុះនូវវិធានសុខាភិបាល និងរដ្ឋបាល ការអន្តរាគមន៍សេដ្ឋកិច្ច និងសង្គមនានា ក្នុងស្មារតីបុរេសកម្ម។
លោករដ្ឋមន្ត្រីក៏បានបន្ថែមថា បច្ចុប្បន្នកម្ពុជាកំពុងតែអនុវត្តយ៉ាងសកម្ម និងជោគជ័យនូវផែនទីចង្អុលផ្លូវ ស្តីពីការស្តារទេសចរណ៍កម្ពុជា ២០២០-២០២៥ ហើយក៏បានរំលឹកពីការ ឆ្លងកាត់ការប្រយុទ្ធប្រឆាំងកូវីដ១៩ នៅក្នុងតំបន់អាស៊ាន។
នាឱកាសនោះ លោករដ្ឋមន្ត្រី បានស្នើឲ្យប្រទេស G20 និងដៃគូអភិវឌ្ឍន៍នានា ផ្ដល់ការគាំទ្រ និងសហការជាមួយអាស៊ាន ដើម្បីជួយអភិវឌ្ឍទេសចរណ៍អាស៊ាន ស្របតាមយុទ្ឋសាស្ត្រអាទិភាពនានាខាងលើ។
លោករដ្ឋមន្ត្រីក៏បានអញ្ជើញប្រតិភូចូលរួមកិច្ចប្រជុំថ្នាក់រដ្ឋមន្ត្រីទេសចរណ៍នៃប្រទេស G20 មកទស្សនាកម្ពុជា និងព្រឹត្តិការណ៍កីឡាស៊ីហ្គាម ២០២៣ នៅកម្ពុជា ផងដែរ។
គួរកត់សម្គាល់ផងដែរថា វិស័យទេសចរណ៍ត្រូវបានប្រទេស G20 និងអង្គការពិភពលោកធំៗ ចាត់ទុកជាវិស័យអាទិភាព ដែលត្រូវដាក់បញ្ចូលក្នុងរបៀបវារៈអភិវឌ្ឍន៍ជាតិ និងសាកលលោក ក្នុងបរិបទស្ដារឡើងវិញក្រោយវិបត្តិកូវីដ១៩៕ N