Views: 1
ដោយៈ ប.ខុន / ភ្នំពេញៈ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ជូនដំណឹងស្តីពី ការដេញថ្លៃឈ្នួលដាយត្រី ចំនួន ១១ គន្លង លើកទី២ នៅរាជធានីភ្នំពេញ សម្រាប់ធ្វើអាជីវកម្ម ក្នុងរដូវនេសាទ ឆ្នាំ២០២២-២០២៣ និង ឆ្នាំ២០២៣-២០២៤ ក្រោយពីគ្មានអ្នកដាក់ពាក្យដេញថ្លៃ កាលពីលើកទី១។
សេចក្តីជូនដំណឹង ដែលចុះហត្ថលេខា ដោយលោក ពុំ សុថា ប្រតិភូរាជរដ្ឋាភិបាលទទួល បន្ទុកជា ប្រធានរដ្ឋបាលជលផល ចុះថ្ងៃទី៥ ខែសីហា ឆ្នាំ២០២២ បានសរសរយោង កំណត់ហេតុប្រជុំថ្ងៃទី៣ ខែសីហា ស្តីពីការដេញថ្លៃឈ្នួលដាយត្រី នៅរាជធានីភ្នំពេញថា រដ្ឋបាលជលផល នឹងរៀបចំដេញថ្លៃឈ្នួលដាយត្រី ជាលើកទី២ សម្រាប់ធ្វើអាជីវកម្ម ក្នុងរដូវនេសាទ ឆ្នាំ២០២២-២០២៣ និង ឆ្នាំ២០២៣-២០២៤ នៅថ្ងៃទី១៩ ខែសីហា ។
លោក ងិន ឌី នាយខណ្ឌរដ្ឋបាលជលផល រាជធានីភ្នំពេញ បានប្រាប់ឱ្យរស្មីកម្ពុជាដឹង នៅថ្ងៃទី១០ ខែសីហាថាៈ ការដេញថ្លៃឈ្នួលដាយត្រី លើកទី១ នៅរាជធានីភ្នំពេញ បានប្រព្រឹត្តទៅ កាលពីថ្ងៃទី៣ ខែសីហា ឆ្នាំ២០២២ ដោយមានអ្នកដាក់ពាក្យ ចំនួន៨នាក់ ដេញថ្លៃយកគន្លងដាយ ចំនួន៦ នៅសល់គន្លងដាយត្រី ចំនួន ១១ ទៀត គ្មានអ្នកដាក់ពាក្យ ដេញថ្លៃ លើកទី១ និងនៅក្នុងការប្រកាស លើកទី២នេះ ក៏មិនទាន់មានអ្នកដាក់ពាក្យ នៅឡើយដែរ។ នៅពេលផុតរយៈពេលប្រកាសគន្លងដាយត្រី ដែលមិនមានអ្នកដាក់ពាក្យ ដេញថ្លៃ ត្រូវបង្វិលឱ្យទៅរដ្ឋបាលជលផល សម្រេចនីតិវិធីបន្តទៀត។
ការដេញថ្លៃឈ្នួលដាយត្រី នៅរាជធានីភ្នំពេញ ខេត្តកណ្តាល និងដាយត្រីលេញ ដាយបង្កង នៅខេត្តព្រៃវែង សម្រាប់ធ្វើអាជីវកម្ម ក្នុងរដូវនេសាទ ឆ្នាំ២០២២-២០២៣ និង ឆ្នាំ២០២៣-២០២៤ លើកទី១ នៅខេត្តព្រៃវែង នៅថ្ងៃទី២៨ ខែកក្កដា ឆ្នាំ២០២២ គ្មានអ្នកដេញ តែមានអ្នកសុំជួលបានម្នាក់ នៅរាជធានីភ្នំពេញ ដេញថ្លៃ ថ្ងៃទី៣ ខែសីហា ឆ្នាំ២០២២ មានអ្នកដាក់ពាក្យចំនួន ៨នាក់ និង នៅខេត្តកណ្តាល ដេញថ្លៃ ថ្ងៃទី៥ ខែសីហា ឆ្នាំ២០២២ មានអ្នកដាក់ពាក្យ ចំនួន៤នាក់។
គន្លងដាយត្រី ដែលត្រូវដាក់ឱ្យដេញថ្លៃ មានចំនួន ១៧ នៅរាជធានីភ្នំពេញ ចំនួន ២៣ នៅខេត្តកណ្តាល និងចំនួន១៣ នៅខេត្តព្រៃវែង ដែលក្នុងនេះ មានដាយត្រីលេញ ចំនួន៦ និងដាយបង្កង ចំនួន៧៕/V
