Views: 10
ដោយៈ កាំពី / ក្រចេះ ៖ នៅល្ងាចថ្ងៃទី៣០ ខែកញ្ញា ឆ្នាំ២០២២ គណៈកម្មាធិការ គ្រប់គងគ្រោះមហន្តរាយខេត្ត្កក្រចេះ បានចេញសេចក្ដីជូនដំណឹងដល់លោក លោកស្រី ប្រធានមន្ទីរ-អង្គភាពជុំវិញខេត្ត -លោកនាយកប្រតិបត្តិសាខា កាកបាទក្រហមកម្ពុជាខេត្ត ពីការត្រៀមលក្ខណៈបង្ការ សង្គ្រោះ និងឆ្លើយតបហានិភ័យគ្រោះមហន្តរាយ ដែលអាចបង្កឡើងដោយទឹកភ្លៀង និងទឹកទន្លេមេគង្គ នាពេលខាងមុខនេះ។
គណៈកម្មាធិការ គ្រប់គងគ្រោះមហន្តរាយខេត្ត្កក្រចេះ បានជម្រាបជូនថាៈ យោងតាមការព្យាករណ៍កម្ពស់ទឹកទន្លមេគង្គ របស់ក្រសួងធនធានទឹក និងឧតុនិយម និងគណៈកម្មាធិការជាតិទន្លេមេគង្គកម្ពុជា ចុះថ្ងៃទី២៩ ខែកញ្ញា ឆ្នាំ២០២២ បានព្យាករណ៍កម្ពស់ទឹកទន្លេមេគង្គ និងស្ថានភាពអាកាសធាតុ ក្នុងភូមិសាស្ត្រខេត្តក្រចេះ ឃើញថាៈ ទឹកទន្លមេគង្គ នឹងហក់ឡើង ក្នុងរយៈពេល ៣ ទៅ ៥ ថ្ងៃខាងមុខ ដល់កម្ពស់ ២១ ម៉ែត្រ ហើយនឹងមានភ្លៀងធ្លាក់ពីកម្រិតបង្គួរ ទៅច្រើន ។ ជាក់ស្ដែង គិតត្រឹមម៉ោង ២:០០នាទីរសៀល ថ្ងៃទី៣០ ខែកញ្ញា ឆ្នាំ២០២២ កម្ពស់ទឹកទន្លេមេគង្គ ខេត្តក្រចេះ ហក់ឡើង ២០,២៣ ម៉ែត្រ ហើយនៅព្រឹកថ្ងៃទី១ ខែតុលា ឆ្នាំ២០២២ កម្ពស់ទឹកទន្លេមេគង្គ ហក់ឡើងដល់ ២០,៥៤ ម៉ែត្រ។
ក្នុងន័យនេះ គណៈកម្មាធិការគ្រប់គ្រងគ្រោះមហន្តរាយខេត្ត បានសូមណែនាំថាៈ
ត្រូវពិនិត្យធនធានសម្ភារៈ និងកម្លាំងអន្តគមន៍បន្ទាន់ ដើម្បីត្រៀមលក្ខណៈឆ្លើយតប និងសង្គ្រោះបន្ទាន់ គ្រោះទឹកជំនន់ទឹកភ្លៀង និងទឹកជំនន់ទន្លេមេគង្គ។ តាមដាន ត្រួតពិនិត្យ ជាបន្តបន្ទាប់នូវមុខសញ្ញាគ្រោះថ្នាក់ ហានិភ័យ ដែលអាចគំរាមកំហែង ដល់ប្រជាពលរដ្ឋងាយរងគ្រោះ ដូចជា ទឹកជំនន់ លង់ទឹក ខ្យល់កន្ត្រាក់ អគ្គិភ័យ បាក់ច្រាំង ។ មន្ទីរជំនាញពាក់ព័ន្ធ ត្រូវធ្វើរបាយការណ៍ ស្តីពីផលប៉ះពាល់នៃ គ្រោះមហន្តរាយ និងស្ថានភាពជលសាស្ត្រ សីតុណ្ហភាព ជូនលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត ជាប់ជាប្រចាំ ៕ V / N
រូបថត ( ទឹកទន្លេមេគង្គ កំពុងហក់ឡើងក្នុងខេត្តក្រចេះ )
