Views: 4
ដោយៈសុក្ខារិន/ពោធិសាត់៖វេទិកាពិគ្រោះយោបល់ជាមួយអង្គការមិនមែនរដ្ឋាភិបាល សមាគម សហគមន៍ ដែលបានធ្វើប្រតិបត្តិការក្នុងខេត្តពោធិ៍សាត់ បានប្រារព្ធធ្វើនៅសាលាខេត្តកាលពីព្រឹក ថ្ងៃទី៤ខែតុលាឆ្នាំ២០២២ ក្រោមអធិបតីភាពលោក គិត សុផា អភិបាលរង តំណាងលោក ជាវ តាយ អភិបាលនៃគណៈអភិបាលខេត្តពោធិ៍សាត់។
លោក ឈាម តិចឡុង នាយកទីចាត់ការអន្តរវិស័យនៃរដ្ឋបាលខេត្តបានរាយការណ៍ថានៅដើមឆ្នាំ ២០២២នេះ រដ្ឋបាលខេត្តបានធ្វើបច្ចុប្បន្នភាព សមាគម អង្គការមិនមែនរដ្ឋាភិបាលនិងសហគមន៍ ផ្សេងៗដែលកំពុងធ្វើសកម្មភាពក្នុងខេត្តពោធិ៍សាត់មាន សមាគមមានចំនួន១៤, អង្គការមិនមែនរដ្ឋាភិបាលមានចំនួន៣៧, សហគមន៍មានចំនួន១០១ បើធៀបនឹងឆ្នាំ២០២១មានការថយចុះចំនួន៦, សមាគមជនជាតិដើមភាគតិចមានចំនួន១០ បើធៀបនឹងឆ្នាំ២០២១មានការកើនឡើងចំនួន៩, គណបក្សនយោបាយមានចំនួន៥ និងគ្រឹះស្ថានមីក្រូហិរញ្ញវត្ថុធនាគារមានចំនួន២៩មានអង្គការសង្គមស៊ីវិលខ្លះធ្វើសកម្មភាពខុសពីលក្ខន្តិកៈ និងខ្លះទៀតពុំមានទីស្នាក់ការពិតប្រាកដនោះទេ។
លោក ឌី គីរីម៉ា នាយករងទីចាត់ការអន្តរវិស័យ និងលោកស្រី ឡូវ ចំណានប្រធានអង្គការអភិវឌ្ឍន៍ នារីខ្មែរបានធ្វើកិច្ចពិភាក្សាស្ដីពីភាពជាដៃគូជាមួយបណ្ដាអង្គការសង្គមស៊ីវិលថ្នាក់រាជធានីខេត្តនៃវេទិកាសម្ព័ន្ធសង្គមស៊ីវិល។
ក្នុងឱកាសនេះលោក គិត សុផា បានថ្លែងអំណរគុណដល់អង្គការសង្គមស៊ីវិល សមាគម និងសហគមន៍ទាំងអស់ ដែលបានមករួមចំណែកជួយអភិវឌ្ឍន៍នៅក្នុងខេត្តពោធិ៍សាត់នេះ ទាំងខាងវិស័យសុខាភិបាល វិស័យអប់រំ និងវិស័យផ្សេងៗទៀត ក្នុងគោលដៅចូលរួមជាមួយរាជរដ្ឋាភិបាល ក្នុងការកាត់បន្ថយភាពក្រីក្រនិងលើកកម្ពស់សេដ្ឋកិច្ច តាមរយៈការជំរុញសុខដុមនីយកម្ម រវាងអង្គការសង្គមស៊ីវិលនិងអាជ្ញាធរ, ការចែករំលែកបទពិសោធន៍លើកកម្ពស់សមត្ថភាពអង្គការសង្គមស៊ីវិល និងការលើកកម្ពស់ប្រសិទ្ធភាពនៃការអនុវត្តគម្រោងអភិវឌ្ឍន៍៕សរន
