Views: 4
ដោយៈ ភ្នំសន្ទុក / កំពង់ធំ ៖ លោក ងួន រតនៈ អភិបាលខេត្តកំពង់ធំ ឧត្តមសេនីយ៍ទោ ម៉ែន លី ស្នងការនគរបាលខេត្ត ប្រធានមន្ទីរជុំវិញខេត្ត នៅថ្ងៃចុងសប្ភាហ៍ ខែតុលានេះ ចុះត្រួតពិនិត្យស្ថានភាពជំនន់ទឹកភ្លៀង ដែលជន់លិចបង្ករឱ្យមានផលប៉ះពាល់ ដល់ហេដ្ឋារចនាសម្ព័ន្ធ ផ្លូវថ្នល់ ផលដំណាំផ្សេងៗ និងលិចលង់ខូចខាតដំណាំស្រូវ ស្រុកសណ្តាន់ ស្រុកប្រាសាទសំបូរ ស្រុកកំពង់ស្វាយ និងក្រុងស្ទឹងសែន ខេត្តកំពង់ធំ ។
នៅក្នុងឱកាសចុះត្រួតពិនិត្យជំនន់ទឹកភ្លៀង នៅស្រុកសណ្តាន់ ស្រុកប្រាសាទសំបូរ ស្រុកកំពង់ស្វាយ និងក្រុងស្ទឹងសែន លោក ងួន រតនៈ បានថ្លែងនូវការសោកស្តាយ ចំពោះការខូចខាតផលដំណាំស្រូវ របស់បងប្អូនប្រជាពលរដ្ឋ និងហេដ្ឋារចនាសម្ព័ន្ធ មួយចំនួន ដែលបានបង្ករការលំបាក ដល់ការធ្វើដំណើររបស់បងប្អូនប្រជាពលរដ្ឋ។
លោក ងួន រតនៈ ក៏បានផ្តាំផ្ញើដល់ប្រជាពលរដ្ឋទាំងអស់ ត្រូវខិតខំថែរក្សាសុខភាព និងមានការប្រុងប្រយ័ត្នខ្ពស់ចំពោះ កូនចៅតូចៗ ខ្លាចលង់ទឹកដោយប្រការផ្សេងៗ ដែល អាចបណ្តាលឲ្យបាត់បង់អាយុជីវិត និងបានណែនាំឲ្យអាជ្ញាធរដែនដី ត្រូវអញ្ជើញបងប្អូន ប្រជាពលរដ្ឋ ដែលលិចលង់ផ្ទះសម្បែង មកកាន់ទីទួលមានសុវត្ថិភាព បណ្តោះអាសន្ន សិន ទម្រាំទឹកស្រក ចាំវិលត្រឡប់ទៅកាន់លំនៅដ្ឋានវិញ និងត្រូវចាត់ចែង កងកម្លាំង ការពារ សន្តិសុខ សុវត្ថិភាព ជូនពួកគាត់ឲ្យបានល្អ។
ក្នុងនោះដែរ អភិបាលខេត្តកំពង់ធំ បានសង្កត់ធ្ងន់ថាៈ សូមឱ្យអាជ្ញាធរថ្នាក់ក្រោម ត្រូវត្រៀមផែនការ ៤ ចំណុចសំខាន់ៗគឺ ទី១. ត្រូវត្រៀមទូកជួយសង្គ្រោះ និងទូក សំរាប់ប្រចាំការពិនិត្យមូលដ្ឋានណា តើមានមនុស្ស ឬគ្មានមនុស្សឱ្យម៉ត់ចត់ ។ ទី២. ត្រូវត្រៀមរកទីតាំងទីទួលសុវត្ថិភាព ឱ្យល្អ និងសំអាតអនាម័យឱ្យត្រឹមត្រូវ ជៀសវាងមានសត្វអសិរពឹសខាំចឹកប្រជាពលរដ្ឋ ។ ទី៣. មិនអនុញ្ញាតឱ្យពលរដ្ឋគ្រប់រូប ហែលទឹក រកត្រី នៅចំណុចទឹកហូរខ្លាំងជាដាច់ខាត ជៀសវាងគ្រោះថ្នាក់ជាយថាហេតុ។ ទី៤. ពលរដ្ឋដែលជម្លៀស មកកាន់ទីទួលសុវត្ថិភាព ត្រូវឱ្យផ្នែកសុខាភិបាលប្រចាំការ គ្រប់ពេលវេលា៕/V