Views: 2
ដោយៈ ទេពកង្រី / កំពង់ឆ្នាំងៈ រដ្ឋបាលខេត្តកំពង់ឆ្នាំង បានបើកកិច្ចប្រជុំ អនុគណៈកម្មការ វាយតម្លៃពន្ធលើដីធ្លី មិនបានប្រើប្រាស់ ប្រចាំឆ្នាំ នៅថ្ងៃទី២៣ ខែកញ្ញា ឆ្នាំ២០២២ នៅសាលប្រជុំសាលាខេត្តកំពង់ឆ្នាំង ក្រោមវត្តមានលោកស្រី ប៊ន សុភី អភិបាលរងខេត្តកំពង់ឆ្នាំង ។
លោក វង្ស ឌីណា ប្រធានសាខាពន្ធដាខេត្តកំពង់ឆ្នាំង បានមានប្រសាសន៍ឱ្យដឹងថាៈ កិច្ចប្រជុំអនុគណកម្មការនេះ គឺធ្វើឡើងដើម្បីធ្វើការត្រួតពិនិត្យសកម្មភាពការងារ នៃការអនុវត្តការប្រមូលពន្ធលើដីធ្លី មិនបានប្រើប្រាស់ ក្នុងភូមិសាស្ត្រខេត្តកំពង់ឆ្នាំង និង ការធ្វើបច្ចុប្បន្នភាព បញ្ជីឈ្មោះម្ចាស់អចលនទ្រព្យទាំងអស់ ដើម្បីជាមូលដ្ឋានគ្រឹះមួយ ច្បាស់លាស់ ក្នុងការឈានទៅការប្រមូលពន្ធ ឱ្យកាន់តែប្រសើរឡើង និងមានប្រសិទ្ធ ភាពខ្ពស់ នៃចំណូលថវិការបស់ជាតិ ។
លោក វង្ស ឌីណា បានបញ្ជាក់ទៀតថាៈ កន្លងមកនេះ មន្ត្រីជំនាញ បានគោរពតាម គោលការណ៍ នៃការប្រមូលពន្ធលើដីធ្លី ដែលមិនបានប្រើប្រាស់ ទៅតាមច្បាប់ ហើយការប្រមូលពន្ធ កន្លងមកនេះ គឺបានឆ្លើយតបតាមផែនការ និងសកម្មភាព ដែលមានការចូលរួម ពីប្រជាពលរដ្ឋ ទាំងនេះដោយសារកិច្ចសហការល្អរបស់ អាជ្ញាធរ គ្រប់មូលដ្ឋាន រួមទាំងម្ចាស់អចលនទ្រព្យ បានយល់ដឹង អំពីកិច្ចការបង់ពន្ធលើកដីធ្លី មិនបានប្រើប្រាស់នេះ ។
នៅក្នុងឱកាសនោះដែរ លោកស្រី ប៊ន សុភី អភិបាលរងខេត្តកំពង់ឆ្នាំង បានថ្លែងនូវ ការកោតសរសើរដល់ ក្រុមការងារអនុគណៈកម្មការវាយតម្លៃដីធ្លី ដែលបានសហការ រួមគ្នា ប្រមូលពន្ធលើដីធ្លី ដែលមិនបានប្រើប្រាស់ នៅគ្រប់មូដលដ្ឋាន ប្រកបដោយ ប្រសិទ្ធភាពខ្ពស់ ។
លោកស្រី ប៊ន សុភី ក៏បានផ្តាំផ្ញើដល់មន្ត្រីនៃអនុគណៈកម្មការទាំងអស់ត្រូវតែរួមសហការ គ្នាបន្តទៀត ដើម្បីឈានទៅសម្រេចឱ្យបាន លើការប្រមូលពន្ធ ឱ្យបានលើសផែនការ។ ដើម្បីឆ្លើយតបទៅនឹងផែនការ នៃការប្រមូលពន្ធ មានប្រសិទ្ធភាពខ្ពស់ អាជ្ញាធរមូលដ្ឋាន ទាំងអស់ ត្រូវបង្កើននូវកិច្ចសហការជាមួយ មន្ត្រីជំនាញសាខាពន្ធដា និងជំនាញពាក់ព័ន្ធ ក្នុងការផ្សព្វផ្សាយ អំពីច្បាប់គតិយុត្តិនានា ស្តីពីការបង់ពន្ធលើដីធ្លី ដែលមិនបានប្រើ ប្រាស់ ដោយធ្វើបញ្ជីបច្ចុប្បន្នភាព ឱ្យបានច្បាស់លាស់ សម្រាប់ម្ចាស់អចលនទ្រព្យ ដែលមានដីមិនបានប្រើប្រាស់ ដើម្បីមន្ត្រីជំនាញ មានមូលដ្ឋានច្បាស់លាស់ ក្នុងការប្រមូលពន្ធ ប្រកបដោយប្រសិទ្ធភាពខ្ពស់ ៕/V
