Views: 2
ដោយៈភ្នំសន្ទុក/កំពង់ធំ៖លោក ងួន រតនៈ អភិបាលខេត្តកំពង់ធំដឹកនាំក្រុមការងារថ្នាក់ខេត្តនិងថ្នាក់ស្រុកចុះ ពិនិត្យស្ថានភាពទឹកជន់លិចផ្លូវលេខ៦ ជន់ដោយទឹកភ្លៀងធ្លាក់ជារៀងរាល់ថ្ងៃ ក្នុងភូមិសាស្ត្រស្រុកកំពង់ស្វាយ ស្រុកស្ទោងនិងស្រុកប្រាសាទបល្ល័ង្ក។ជំនន់នេះបង្កឱ្យមានការរងការខូចខាតដំណាំស្រូវនិងលេចលំនៅឋានរបស់ប្រជាពលរដ្ឋមួយចំនួន។ដោយឡែកនៅស្រុកតាំងគោកឯណោះវិញស្រូវប្រមាណ៣០ហិកតាបានប្រឈមនឹងការខូចខាត។
ក្នុងសកម្មភាពចុះពិនិត្យជាក់ស្តែងកាលពីរសៀលថ្ងៃទី២៧ខែកញ្ញាឆ្នាំ២០២២លោកអភិបាលខេត្តបានឱ្យដឹងថា ជំនន់ទឹកនេះមូលហេតុដោយសារមានការបើកអាងទឹកនៅតំបន់ដែលសម្បូរទឹកទើបធ្វើឱ្យមានការលិចផ្លូវជាតិលេខ៦។កងកម្លាំងទាំងបីក៏បានសហការគ្នាដើម្បីជួយច្រកដីដាក់ក្នុងការុងយកមកទប់នៅតាមចិញ្ចឹមថ្នល់កុំឲ្យវាហូរដាច់ជាបន្តទៀត។
អភិបាលខេត្តក៏បានបន្តទៀតថា ផលដែលប៉ះពាល់ធំៗជាងគេគឺទៅលើដំណាំស្រូវជាច្រើនហិកតាក្នុងរយៈពេល បីថ្ងៃកន្លងមកនេះ ប៉ុន្តែមិនទាន់មានករណីជម្លៀសប្រជាពលរដ្ឋទៅរស់នៅលើទីទួលសុវត្ថិភាពនោះទេ។
ក្នុងឱកាសនោះលោកអភិបាលខេត្តបានរំលឹកដល់ប្រជាពលរដ្ឋដែលមានកូនតូចៗឱ្យមានការប្រុងប្រយ័ត្នពេលលេងទឹក,ប្រុងប្រយ័ត្នចំពោះសត្វអសិរពិស និងថែរក្សាសុខភាពតាមរយៈ ការផឹកស្អាត ហូបស្អាត និងរស់នៅស្អាត។
គួរបញ្ជាក់ថា សម្រាប់ថ្ងៃទី២៧ខែកញ្ញាស្ថានភាពទឹកនៅក្នុងស្រុកស្ទោងទាំងមូល ក៏ដូចជានៅអាងទឹក៣០កញ្ញា មានការស្រកចុះប្រហែល០,១៥ម៉ែត្រ។ ចំណែកកម្ពស់ទឹកស្ទឹងសែន នៅស្ថានីយកំពង់ធំ១៣,៦៤ម៉ែត្រ លើសកម្ពស់ប្រុងប្រយ័ត្ន៕សរន