Views: 3
ដោយៈ ភ្នំស្វាយ / ស្រះកែវ ថៃៈ គណៈប្រតិភូកម្ពុជា ថៃ បានអញ្ជើញរួមគ្នា ប្រារព្ធពិធីបុណ្យភ្ជុំបិណ្ឌ នាល្ងាចថ្ងៃទី២៤ ខែកញ្ញានៅផ្សារទំនើបឥណ្ឌូចិន (IndoChina supermarket) ស្ថិតនៅក្នុងឃុំប៉ារ៉ៃ ស្រុកអារញ្ញប្រាថេត ខេត្តស្រះកែវ ប្រទេសថៃ ទល់មុខសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។
ប្រតិភូខេត្តបន្ទាយមានជ័យ ដឹកនាំដោយលោក អ៊ុំ រាត្រី អភិបាលខេត្តបន្ទាយមានជ័យ និងលោក នេត សេរី អគ្គកុងស៊ុលកម្ពុជា ប្រចាំខេត្តស្រះកែវ ។ ចំណែកភាគីថៃ ដឹកនាំដោយលោក ប៉ៈរិនបញ្ញា ពោធិសាត អភិបាលខេត្តស្រះកែវ លោកធីរ៉ាក់ឆៃ លីមប្រាសីតស័ក្តិ អភិបាលរងខេត្ត លោក ឆាក់ណាធីប ឌុកប៉ាក់នី អភិបាលស្រុក អារញ្ញប្រថេត និងមន្ត្រីរាជការស៊ីវិល កងកម្លាំងពាក់ព័ន្ធ បានអញ្ជើញទទួល គណៈប្រតិភូកម្ពុជា។
ភាគីទាំងពីរ បានអះអាងថាៈ បំណងនៃពិធីធំបង្អស់ទី២ ខាងវប្បធម៌ ពុទ្ធសាសនា រួមគ្នានេះ ក៏ដើម្បីរឹតចំណងមេត្រីភាព កិច្ចសហប្រតិបត្តិការ លើកស្ទួយទេសចរណ៍ វប្បធម៌ សាសនា ក៏ដូចជាការឆ្លងកាត់ព្រំដែន រវាងខេត្តទាំងពីរ ក៏ដូចជា ប្រទេសទាំងពីរ ថៃ-កម្ពុជា។
សមភាគីទាំងពីរ បានថ្លែងសុន្ទរកថា ដោយកត់សម្គាល់ពីលទ្ធផលជោគជ័យ នៃការអនុវត្តគោលនយោបាយ នៃរាជរដ្ឋាភិបាល និងរដ្ឋបាលខេត្ត រៀងៗខ្លួន លើវិស័យនានា ប្រកបដោយផ្លែផ្កា នៃទំនាក់ទំនង កិច្ចសហប្រតិបត្តិការរបស់ខេត្ត ចំណងមេត្រីភាពទាំងពីរ ពីមុនមក និងជាពិសេស ក្នុងរយៈពេលចុងក្រោយ ក្នុងអំឡុងវិបត្តិសាកលនៃការឆ្លងរាលដាល នៃជំងឺកូវីដ១៩ និងការខិតខំស្តារជីវភាព របស់ប្រជាជន និងសេដ្ឋកិច្ចខេត្ត ក៏ដូចជា ប្រទេសជាតិទាំងពីរ ឡើងវិញ ៕/V