Views: 1
ប្រែសម្រួល : កញ្ញាដាលីស (ដេល្លីម៉េល) ៖ អភិបាលនៃតំបន់ហ្សាផូរីហ្សហ្សា (Zaporizhzhia) ដែលកាន់កាប់ភាគច្រើនដោយរុស្ស៊ី បាននិយាយថាគ្រាប់រ៉ុក្កែតរុស្សីចំនួនប្រាំពីរបានវាយប្រហារទៅលើអគារលំនៅដ្ឋានក្នុងទីក្រុងហ្សាផូរីហ្សហ្សាមុនពេលព្រលឹមថ្ងៃព្រហស្បតិ៍ទី៦តុលា ដោយសម្លាប់មនុស្សប្រាំពីរនាក់និងយ៉ាងហោចប្រាំនាក់ផ្សេងទៀតបានបាត់ខ្លួននៅក្នុងទីក្រុងនៅជិតរោងចក្រថាមពលនុយក្លេអ៊ែរធំបំផុតរបស់អឺរ៉ុប។
ការវាយប្រហារនេះបានកើតឡើងតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានប្រកាសថា យោធារបស់ប្រទេសបានដណ្តើមយកភូមិចំនួនបីទៀតនៅក្នុងតំបន់មួយក្នុងចំណោមតំបន់នានាដែលកាត់យកដោយខុសច្បាប់ដោយរុស្ស៊ី។
ប្រធានាធិបតីហ្សេលេនស្គីបាននិយាយអំពីការវាយប្រហារនៅក្នុងសុន្ទរកថាជាវីដេអូទៅកាន់កិច្ចប្រជុំកំពូលនៃសហគមន៍នយោបាយអឺរ៉ុបនៅទីក្រុងប្រាក យ៉ាងដូច្នេះថា “អាក្រក់បំផុត។ ព្រៃផ្សៃបំផុត។ មានការបង្ហាញឱ្យឃើញរាប់ពាន់ដងរួចមកហើយនូវអំពើអាក្រក់បែបនេះ។ ជាអកុសលអាចនឹងមានការបង្ហាញបែបនេះរាប់ពាន់ដងទៀត”។
អភិបាល លោក អូឡេកសាន់ឌ្រ៍ ស្តារូក (Oleksandr Starukh) បានសរសេរនៅលើបណ្តាញ Telegramរបស់គាត់ថា មនុស្សជាច្រើនត្រូវបានជួយសង្គ្រោះពីអគារច្រើនជាន់មួយរួមទាំងក្មេងស្រីអាយុបីឆ្នាំម្នាក់ ដែលត្រូវបានបញ្ជូនទៅមន្ទីរពេទ្យដើម្បីព្យាបាល។
ខេត្តហ្សាផូរីហ្សហ្សាគឺជាតំបន់មួយក្នុងចំណោមតំបន់ចំនួនបួនដែលប្រធានាធិបតីរុស្ស៊ី វ្ល៉ាឌីមៀ ពូទីន កាត់យកដោយបំពានលើច្បាប់អន្តរជាតិកាលពីថ្ងៃពុធនិងជាលំនៅរបស់រោងចក្រនុយក្លេអ៊ែរដែលស្ថិតនៅក្រោមការកាន់កាប់របស់រុស្ស៊ី។ ទីក្រុងដែលមានឈ្មោះដូចគ្នានេះគឺស្ថិតក្រោមការគ្រប់គ្រងរបស់អ៊ុយក្រែន។
ប្រធានអង្គការឃ្លាំមើលនុយក្លេអ៊ែររបស់អង្គការសហប្រជាជាតិត្រូវគេរំពឹងថានឹងធ្វើទស្សនកិច្ចនៅទីក្រុងគៀវក្នុងសប្តាហ៍នេះ ដើម្បីពិភាក្សាអំពីស្ថានភាពនៅរោងចក្រហ្សាផូរីហ្សហ្សាបន្ទាប់ពីលោកពូទីនបានចុះហត្ថលេខាលើក្រឹត្យមួយកាលពីថ្ងៃពុធ ដែលប្រកាសថា រុស្ស៊ីកំពុងកាន់កាប់រោងចក្ររ៉េអាក់ទ័រចំនួនប្រាំមួយ។
ក្រសួងការបរទេសអ៊ុយក្រែនបានហៅវាថាជាអំពើឧក្រិដ្ឋ ហើយនិយាយថា ខ្លួនបានចាត់ទុកក្រឹត្យរបស់មេដឹកនាំរុស្ស៊ីជា “មោឃៈ” ខណៈប្រតិបត្តិករនុយក្លេអ៊ែររបស់រដ្ឋ Energoatom បាននិយាយថា ខ្លួននឹងបន្តដំណើរការរោងចក្រនេះ។
លោក រ៉ាហ្វាអែល ហ្គ្រោសស៊ី (Rafael Grossi) អគ្គនាយកទីភ្នាក់ងារថាមពលបរមាណូអន្តរជាតិ គ្រោងនឹងពិភាក្សាជាមួយមន្ត្រីអ៊ុយក្រែនអំពីចំណាត់ការរបស់រុស្ស៊ី។លោកក៏នឹងពិភាក្សាផងដែរអំពីកិច្ចខិតខំប្រឹងប្រែងដើម្បីបង្កើតតំបន់ការពារសុវត្ថិភាពនៅជុំវិញរោងចក្រដែលរងការខូចខាតនៅក្នុងការប្រយុទ្ធគ្នានិងឃើញបុគ្គលិករួមទាំងនាយករបស់ខ្លួនត្រូវបានចាប់ពង្រត់ដោយទាហានរុស្ស៊ី។
លោកហ្គ្រោសស៊ីនឹងធ្វើដំណើរទៅក្រុងមូស្គូដើម្បីពិភាក្សាជាមួយមន្ត្រីរុស្ស៊ីបន្ទាប់ពីឈប់សំចតនៅទីក្រុងគៀវ៕
បុរសម្នាក់ជិះកង់ឆ្លងកាត់អគារខូចខាតនៅក្នុងភូមិ Drobysheve ក្បែរក្រុង Lyman ដែលអ៊ុយក្រែនដណ្តើមបានមកវិញ