Views: 10
ប្រែសម្រួល : កញ្ញាដាលីស (ដេល្លីម៉េល) ៖ នៅថ្ងៃសុក្រនេះរុស្ស៊ីចាប់ផ្តើមផែនការរបស់ខ្លួនក្នុងការដាក់បញ្ចូលទឹកដីអ៊ុយក្រែនប្រហែល ១៥ ភាគរយចូលក្នុងទឹកដីខ្លួនតាមរយៈការធ្វើប្រជាមតិនៅក្នុងតំបន់ចំនួនបួន ដែលគ្រប់គ្រងដោយកងកម្លាំងរុស្ស៊ី ជាទង្វើមួយដែលលោកខាងលិចនិយាយថាជាការបំពានយ៉ាងធ្ងន់ធ្ងរលើច្បាប់អន្តរជាតិ ដែលនឹងធ្វើឱ្យសង្គ្រាមកាន់តែធ្ងន់ធ្ងរ។
បន្ទាប់ពីសង្គ្រាមជិតប្រាំពីរខែនិងបរាជ័យក្នុងសមរភូមិដ៏សំខាន់នៅភាគឦសានអ៊ុយក្រែនកាលពីដើមខែនេះ ប្រធានាធិបតី វ្ល៉ាឌីមៀ ពូទីន បានគាំទ្រយ៉ាងច្បាស់លាស់នូវការបោះឆ្នោតប្រជាមតិបន្ទាប់ពីតំបន់ដែលគ្រប់គ្រងដោយរុស្ស៊ីបានតម្រង់ជួរគ្នាដើម្បីសុំឱ្យមានការបោះឆ្នោតយ៉ាងឆាប់រហ័សដើម្បីចូលរួមជាមួយរុស្ស៊ី។
សាធារណរដ្ឋប្រជាមានិតដូណិតសខ៍ (DPR) និងសាធារណរដ្ឋប្រជាមានិតលូហានសខ៍ (LPR) ដែលពូទីនទទួលស្គាល់ជាប្រទេសឯករាជ្យនៅមុនការលុកលុយនិងរដ្ឋបាលដែលបន្តុបដោយរុស្ស៊ីនៅក្នុងតំបន់ឃើសុន (Kherson)និងហ្សាផូរីហ្សហ្សា (Zaporizhzhia) នឹងរៀបចំការបោះឆ្នោត។
ការបោះឆ្នោតដែលលោកខាងលិចនិងអ៊ុយក្រែននិយាយថាជាការបោះឆ្នោតក្លែងក្លាយ នឹងត្រូវចាប់ផ្តើមនៅថ្ងៃសុក្រនេះ ហើយនឹងបញ្ចប់នៅថ្ងៃអង្គារ ដោយលទ្ធផលរំពឹងចេញនៅពេលក្រោយទៀត។
រុស្ស៊ីនឹងកាត់យកតំបន់ទាំងនោះជាផ្លូវការបន្ទាប់ពីចេញលទ្ធផល។
ប្រធានាធិបតីអាម៉េរិក លោក ចូ បៃដិន បានប្រាប់សម័យប្រជុំលើកទី ៧៧ នៃមហាសន្និបាតអង្គការសហប្រជាជាតិថា “វិមានក្រឹមឡាំងកំពុងរៀបចំប្រជាមតិក្លែងក្លាយដើម្បីព្យាយាមកាត់យកផ្នែកខ្លះនៃអ៊ុយក្រែន”។
លោកបៃដិន ដែលចាត់ទុកសង្គ្រាមជាផ្នែកមួយនៃការប្រជែងសាកលរវាងប្រជាធិបតេយ្យនិងអត្ថាធិបតេយ្យ បាននិយាយថា “អ៊ុយក្រែនមានសិទ្ធិដូចគ្នា ដែលជាកម្មសិទ្ធិរបស់គ្រប់ប្រទេអធិបតេយ្យទាំងឡាយដែរ។ យើងនឹងរួមសាមគ្គីជាមួយអ៊ុយក្រែន”។
អ៊ុយក្រែន ដែលមានព្រំដែនក្រោយសូវៀតជាប់នឹងរុស្ស៊ី និយាយថា ខ្លួននឹងមិនទទួលយកការគ្រប់គ្រងរបស់រុស្ស៊ីលើទឹកដីណាមួយរបស់ខ្លួនឡើយ ហើយនឹងប្រយុទ្ធរហូតដល់ទាហានរុស្ស៊ីចុងក្រោយត្រូវបានបណ្តេញចេញ។
ពូទីន ដែលជាមេដឹកនាំកំពូលរបស់រុស្ស៊ី ចាប់តាំងពីឆ្នាំ ១៩៩៩ បាននិយាយថា រុស្ស៊ីនឹងមិនបោះបង់ចោលអ្នកនៅក្នុងតំបន់ដែលខ្លួនគ្រប់គ្រងនិងអ្នកដែលគាត់និយាយថាចង់បំបែកចេញពីការគ្រប់គ្រងរបស់រដ្ឋាភិបាលទីក្រុងគៀវនោះឡើយ។គាត់បានចាត់ទុកសង្គ្រាមនេះជាការប្រយុទ្ធដើម្បីសង្គ្រោះអ្នកនិយាយរុស្ស៊ីនៅភាគខាងកើតអ៊ុយក្រែនពីការធ្វើទុក្ខបុកម្នេញ និង ជាមធ្យោបាយមួយដើម្បីបញ្ចៀសនូវអ្វីដែលគាត់និយាយថាជាផែនការរបស់លោកខាងលិចដើម្បីបំផ្លាញរុស្ស៊ី។
ទោះជាយ៉ាងនា អ៊ុយក្រែនបដិសេធថាអ្នកនិយាយភាសារុស្ស៊ីមិនត្រូវបានធ្វើទុក្ខបុកម្នេញនោះទេ។
នៅក្នុងការព្រមាននុយក្លេអ៊ែរដោយផ្ទាល់ទៅកាន់លោកខាងលិច លោកពូទីនបាននិយាយថា លោកនឹងការពារទឹកដីរុស្ស៊ីជាមួយនឹងគ្រប់មធ្យោបាយសព្វាវុធដែលអាចរកបានរបស់គាត់ព្រមទាំងតំបន់នៃអ៊ុយក្រែន ដែលនឹងត្រូវចាត់ទុកជាទឹកដីរបស់រុស្ស៊ីក្នុងពេលដ៏ខ្លីខាងមុខ៕
តំបន់ដែលគ្រប់គ្រងដោយរុស្ស៊ីតម្រង់ជួរគ្នាដើម្បីសុំឱ្យមានការបោះឆ្នោតយ៉ាងឆាប់រហ័សដើម្បីចូលរួមជាមួយរុស្ស៊ី