Views: 3
ដោយ: បូកគោ/កំពត: ថ្នាក់ដឹកនាំខេត្តកំពត បានបញ្ជាក់ថា ការលុបបំបាត់សំរាមគ្រប់ប្រភេទទោះនៅទីណាក្តីត្រូវផ្តើមចេញពីមនុស្សម្នាក់ៗព្រោះបុគ្គលជាអ្នកបង្កើតឡើង។ គំនរសំរាមកើតមានកន្លែងណា ក្តីអាម៉ាស់នឹងដិតដាមជាប់នៅទីនោះ ពិសេសបានបង្ហាញពីការរស់នៅប្រចាំថ្ងៃមិនមានភាពថ្លៃថ្នូរតែម្តង។ ការបញ្ជាក់យ៉ាងដូច្នេះ បានធ្វើឡើងនាព្រឹកថ្ងៃទី៧ ខែធ្នូ ឆ្នាំ២០២២ ក្នុងការប្រារព្ធទិវាអនាម័យបរិស្ថានជាតិ២៣ វិច្ឆិកា នៅបរិវេណសួនច្បាររូបសំណាកព្រះអង្គឌួងក្រុងកំពត។
ថ្លែងក្នុងពិធីខាងលើ លោកខៀវ ឫទ្ធិភ័ណ្ឌ អភិបាលរងខេត្តកំពតបានមានប្រសាសន៍ថាប្រមុខរាជរដ្ឋាភិបាលបានយកចិត្តទុកដាក់យ៉ាងខ្លាំងលើការថែរក្សាអនាម័យបរិស្ថាន។ ដោយឡែក រដ្ឋបាលខេត្តកំពតបានខិតកសាងឆ្នេរកម្សាន្តជាច្រើនកន្លែងដើម្បីទាក់ទាញទេសចរជិតឆ្ងាយ។ ក្នុងនោះ ការថែរក្សាបាននូវបរិស្ថានអនាម័យស្អាតជារឿងចាំបាច់ដែលប្រជាពលរដ្ឋគ្រប់រូបត្រូវចូលរួមព្រោះបើមានកន្លែងកម្សាន្តល្អ តែបរិស្ថានអនាម័យកខ្វក់ ពោរពេញដោយសំរាមនោះនឹងឆ្លុះបញ្ចាំងឲ្យឃើញពីចរិតលក្ខណៈរបស់បុគ្គល សហគមន៍ ពិសេសជាតិសាសន៍ទាំងមូលតែម្តង។
លោកអេង ប៉ូឡូ ប្រធានមន្ទីរបរិស្ថានខេត្តកំពតបានបញ្ជាក់ថា ទិវាអនាម័យបរិស្ថានជាតិ២៣ វិច្ឆិកា តែងបានធ្វើឡើងរៀងរាល់ឆ្នាំដើម្បីផ្សព្វផ្សាយអប់រំ បញ្ជ្រាបចំណេះដឹងផ្សេងៗដល់ប្រជាពលរដ្ឋទូទៅមានការយល់ដឹង និងចូលរួមថែរក្សាអនាម័យបរិស្ថានឲ្យកាន់តែស្រស់បំព្រង៕/R
