Views: 1
ដោយៈ ទេពកង្រី / កំពង់ឆ្នាំងៈ សាខាកាកបាទក្រហមកម្ពុជាខេត្តកំពង់ឆ្នាំង នៅព្រឹកថ្ងៃទី ១០ ខែសីហា ឆ្នាំ២០២២ បានប្រារព្ធពិធីទិវាពិភពលោក កាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២២ ក្រោមប្រធានបទ “ទាំងអស់គ្នា រួមគ្នាជាមួយកាកបាទក្រហមកម្ពុជា ដោះស្រាយបញ្ហាប្រឈម និងបន្តពង្រឹងភាពធន់សហគមន៍” និងប្រកាសទទួលស្គាល់ គណៈកិត្តិយសសាខា និងគណៈកម្មាធិការសាខា កាកបាទក្រហមខេត្តកំពង់ឆ្នាំង អាណត្តិទី៥ ផងដែរ។
ក្នុងឱកាសនោះ សាខាកាកបាទក្រហមកម្ពុជាខេត្តកំពង់ឆ្នាំង បានប្រកាសទទួលស្គាល់ លោកបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងារថ្នាក់ជាតិចុះមូលដ្ឋានខេត្តកំពង់ឆ្នាំង ជាប្រធានគណៈកិត្តិយសសាខា លោក ជា វ៉ាន់ដេត ជាអនុប្រធានកិត្តិយសសាខា និងលោក លោកស្រី ១៩ រូបទៀត ជាសមាជិក សមាជិកាកិត្តិយសសាខា នៃគណៈកម្មាធិការសាខា កាកបាទក្រហម ខេត្តកំពង់ឆ្នាំង អាណត្តិទី៥។
ដោយឡែក លោក ស៊ុន សុវណ្ណារិទ្ធិ អភិបាល នៃគណៈអភិបាល ខេត្តកំពង់ឆ្នាំង ត្រូវបានប្រកាសឡើងកាន់តំណែង ជាប្រធានគណៈកម្មាធិការ សាខាកាកបាទក្រ ហមខេត្តកំពង់ឆ្នាំង អាណត្តិទី៥ ។
នៅក្នុងឱកាសនេះដែរលោកស្រី ប៊ន សុភី អនុប្រធានកិត្តិយសសាខា បានអាន របាយការណ៍ បូកសរុបការងាររបស់សាខាកាកបាទក្រហម ខេត្តកំពង់ឆ្នាំង អាណត្តិទី៤ ដោយបានគូសបញ្ជាក់ថាៈ សាខាកាកបាទក្រហមខេត្ត មានអនុសាខាក្រុង ស្រុក ចំនួន ៨ មានយុវជនកាកបាទក្រហមសរុប ៩៥០ នាក់ , មានអ្នកស្ម័គ្រចិត្តកាកបាទក្រហម សរុប ៣០៥ នាក់ ដែលបានស្ម័គ្រចិត្តចូលរួមយ៉ាងសកម្ម ក្នុងការងារអនុវត្ត តាមវិស័យទាំង៤ របស់កាកបាទក្រហមកម្ពុជា ទទួលបានជោគជ័យ។
ដោយឡែក នៅក្នុងទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ គណៈកម្មាធិការសាខា និងអនុសាខា បានខិតខំគៀគរប្រមូលមូលនិធិ ពីសប្បុរសជន ក្នុងនិងក្រៅខេត្ត រកចំណូលបាន ១១៧.៣០៨ ដុល្លារ ក្នុងនោះអនុសាខា រកបាន ២៩.៧៨៦ ដុល្លារ ដើម្បីចាត់ចែងធ្វើការងារ តាមវិស័យស្នូលរបស់កាកបាទក្រហម ។
ចំណែកលោកស្រី ពុំ ចន្ទីនី អគ្គលេខាធិការ គណៈកម្មាធិការ កាកបាទក្រហមកម្ពុជា បានថ្លែង នៅក្នុងពិធីនេះថាៈ ប្រធានគណៈកម្មាធិការ សាខាកាកបាទក្រហមខេត្ត ដែលបានប្រកាស ចូលកាន់តំណែងនេះ មានតួនាទីភារកិច្ចកៀងគរ រកមូលនិធិថវិកា ដើម្បីសាខា និងអនុសាខា ទាំង ៨ ក្រុង ស្រុក មានលទ្ធភាពធ្វើការងារមនុស្សធម៌ ក្នុងដែនដីរបស់ខ្លួន ស្របតាមលក្ខន្តិកៈសមាគមជាតិ កាកបាទក្រហមកម្ពុជា។ សាខា និងអនុសាខា ត្រូវឈ្មុសឈ្មុលរកអ្នកដែលត្រូវការយើង ជួយពិតប្រាកដ ដែលជាជនរងគ្រោះ និងជនងាយរងគ្រោះ ដោយត្រូវជួយដោះស្រាយ ឲ្យបានទាន់ពេលវេ លា ជាមួយនោះដែរ ត្រូវត្រៀមបង្ការគ្រោះមហន្តរាយជាប់ជានិច្ច ។ ការអភិវឌ្ឍស្ថាប័ន ត្រូវពង្រឹងអភិបាលកិច្ចល្អ មានតម្លាភាព ពង្រឹងសមត្ថភាពអ្នកស្ម័គ្រចិត្ត ដើម្បីក្តាប់បាន ជនរងគ្រោះ និងដោះស្រាយ ឱ្យបានទាន់ពេលវេលា ។ គណៈកម្មាធិ ការសាខា ត្រូវចាត់តាំងសវនកម្មផ្ទៃក្នុង ត្រួតពិនិត្យ ការងារហិរញ្ញវត្ថុរបស់សាខា និងអនុសាខា ដោយការចាយវាយ ត្រូវមានតម្លាភាព តាមច្បាប់ហិរញ្ញវត្ថុ ។
លោកស្រី អគ្គលេខាធិការ ក៏បានសង្ឃឹមផងដែរថាៈ ប្រធានគណៈកម្មាធិការសាខា និងអនុសាខា ក្រុង ស្រុកទាំងអស់ និងបន្តគាំទ្រការងារកាកបាទក្រហមកម្ពុជា ក្នុងបុព្វហេតុ មនុស្សធម៌ និងសេចក្តីថ្លៃថ្នូររបស់មនុស្សសុជាតិ ។
នៅចុងបញ្ចប់នៃកម្មវិធីនេះដែរ លោក អ៊ូ ជួបកុសល ហេរញ្ញឹកសាខាកាកកាបាទក្រហមខេត្ត បានប្រកាសឱ្យដឹងថាៈ ក្នុងទិវាកាកបាទក្រហម និងអឌ្ឍចន្ទក្រហម ពេលនេះ យើងទទួលបានថវិកា ពីសប្បុរសជន ជាបឋមសរុបចំនួនជាង ២១ ម៉ឺនដុល្លារ ៕/V