Views: 1
ដោយ:ភ្នំសន្ទុក/ កំពង់ធំ៖ ដោយសារការខិតខំប្រឹងប្រែងពីកម្លាំងសមត្ថកិច្ចចម្រុះខេត្ត ស្រុករួមជាមួយក្រុមគ្រួសារជនរងគ្រោះ ដែលរអិលជើងធ្លាក់ទឹកម្សិលមិញនេះ ត្រូវបានរកឃើញសាកសពហើយចំនួនបីនាក់ នៅថ្ងៃទី៨ ខែសីហា ឆ្នាំ២០២២នេះ ។
ប្រភពពីសមត្ថកិច្ចអធិការដ្ឋាននគរបាលស្រុកស្ទោងឱ្យដឹងថា នៅថ្ងៃទី៧ ខែសីហា វេលាម៉ោងជាង៤រសៀល
នៅចំណុចទំនប់ទឹកបង្ហៀរក្រុមហ៊ុន លឹម ប៊ុនណា ស្ថិតនៅក្នុងភូមិត្រាច ឃុំកំពង់ចិនជើង ស្រុកស្ទោងមានករណីមនុស្សចុះលេងទឹក ហើយបានរអិលជើងធ្លាក់បណ្ដាលឲ្យយុវជនបីនាក់បានលង់ទឹកស្លាប់។ជនរងគ្រោះទី ១. ឈ្មោះ នី សុថានិត អាយុ១៧ឆ្នាំមានទីលំនៅរស់នៅក្នុងភូមិកំពង់ក្តី ឃុំកំពង់ចិនត្បូង ស្រុកស្ទោង,ទី២.ឈ្មោះ ប៉ា វណ្ណារ័ត្ន អាយុ ១៦ឆ្នាំ មានទីលំនៅរស់នៅភូមិត្នោត ឃុំកំពង់ចិនជើង ស្រុកស្ទោង និងទី៣.ឈ្មោះ ប៉ា បញ្ញាលាងសុផានិត អាយុ ១២ឆ្នាំ មានទីលំនៅ ក្នុងភូមិបឹងកុក ក្រុង ខេត្តកំពង់ចាម ។
យោងតាមសាក្សី នៅកន្លែងកើតហេតុបានបញ្ជាក់ឱ្យដឹងដែលថា មុនពេលកើតហេតុក្មេងប្រុសម្នាក់ ឈ្មោះ ប៉ា បញ្ញាលាងសុផានិត បានរអិលជើងធ្លាក់ទឹកនៅចំណុចទំនប់បង្ហៀរ។ ឃើញយ៉ាងដូច្នេះក្មេងប្រុសម្នាក់ទៀតឈ្មោះ នី សុផានិត បានចុះទៅជួយចាប់ទាញដៃ ខណៈនោះក៏មានក្មេងប្រុសម្នាក់ទៀតឈ្មោះ ប៉ា វណ្ណារ័ត្ន ក៏បានចុះទៅជួយដែរ ប៉ុន្តែត្រូវបានទឹកហូរកួចលិចបាត់ទាំងបីអ្នកតែម្ដង។
ពេលទទួលបានដំណឹងករណីនេះកម្លាំងសមត្ថកិច្ចស្រុកស្ទោង និងសាច់ញាតិ ព្រមទាំងក្រុមជួយសង្គ្រោះក៏បានប្រឹងប្រែងស្វែងរករហូតដល់ម៉ោង៧យប់តែរកជនរងគ្រោះទាំងបីនាក់នោះមិនឃើញ។រហូតមកដល់ថ្ងៃទី៨ ខែសីហាវេលាម៉ោងប្រមាណ២:៤៧រសៀល សពជនរងគ្រោះត្រូវបានរកឃើញទាំងបីនាក់ នៅចំណុចក្បែរកន្លែងកើតហេតុចម្ងាយប្រមាណ ១០០ម៉ែត្រ៕សរន