Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ មន្ត្រីសហភាពអឺរ៉ុបបាននិយាយកាលពីថ្ងៃពុធទី១កុម្ភៈថា សហភាពអឺរ៉ុបនឹងបង្កើនចំនួនទាហានអ៊ុយក្រែនទ្វេដងសំរាប់ការហ្វឹកហាត់ រហូតដល់ ៣០.០០០ នាក់ ខណៈខ្លួនកំពុងព្យាយាមពង្រឹងការប្រយុទ្ធរបស់រដ្ឋាភិបាលក្រុងគៀវប្រឆាំងនឹងរុស្ស៊ី។
ប្លុក ដែលមានប្រទេសចំនួន ២៧ នេះ បានបង្កើតកម្មវិធីមួយឡើងសម្រាប់កងកម្លាំងអ៊ុយក្រែនកាលពីខែវិច្ឆិកាឆ្នាំមុន ជាមួយនឹងគោលដៅដំបូងគឺបណ្តុះបណ្តាលកងទ័ពចំនួន ១៥.០០០ នាក់។
មន្ត្រីសហភាពអឺរ៉ុបម្នាក់បាននិយាយថា “នេះនឹងសម្រេចបាននៅប្រហែលមុនដំណាច់ត្រីមាសទី ២ នៃឆ្នាំនេះ ហើយនឹងមានគោលដៅបន្ថែមទាហានអ៊ុយក្រែនថ្មី ១៥.០០០ នាក់បន្ថែមទៀតដែលត្រូវបណ្តុះបណ្តាលដោយបណ្តាប្រទេសអឺរ៉ុបផ្សេងៗ។ដូច្នេះ ការបន្ថែមនេះនឹងនាំឱ្យចំនួនទាហានអ៊ុយក្រែនដែលបានហ្វឹកហ្វឺនក្នុងគម្រោងនេះកើនដល់៣០.០០០នាក់”។
តួលេខកើនឡើង ដែលនឹងត្រូវប្រកាសជាផ្លូវការនៅក្នុងកិច្ចប្រជុំកំពូលរវាងសហភាពអឺរ៉ុបនិងអ៊ុយក្រែនក្នុងទីក្រុងគៀវនៅថ្ងៃសុក្រនេះកើតឡើងខណៈសម្ពន្ធមិត្តអឺរ៉ុបបង្កើនការគាំទ្រផ្នែកយោធារបស់ពួកគេ។
ប្រទេសសហភាពអឺរ៉ុបជាច្រើនបានសន្យាផ្តល់រថក្រោះ Leopard 2ផលិតដោយអាល្លឺម៉ង់ដល់រដ្ឋាភិបាលក្រុងគៀវ ហើយកំពុងបណ្តុះបណ្តាលកងទ័ពអ៊ុយក្រែនរួចហើយដើម្បីប្រើប្រាស់វា៕
ទាហានអូស្ត្រាលីកំពុងបង្វឹកទាហានអ៊ុយក្រែននៅអង់គ្លេសកាលពីថ្ងៃទី១កុម្ភៈ ឆ្នាំ២០២៣