Views: 2
ដោយៈវ៉ៃកូ/ស្វាយរៀង៖លោក សេង សិលា អភិបាលរងខេត្តតំណាងលោក ម៉ែន វិបុល អភិបាលខេត្តស្វាយរៀងនៅព្រឹកថ្ងៃទី២៧ខែកញ្ញាឆ្នាំ២០២២នេះបានអញ្ជើញជាអធិបតីក្នុងពិធីសិក្ខាសិលាសមាហរណកម្មកម្មវិធីវិនិយោគបីឆ្នាំរំកិល (២០២៣-២០២៥)នៅសាលប្រជុំសាលាក្រុងបាវិត ។
នៅក្នុងពិធីនោះដែរមានការអញ្ជើញចូលរួមពី លោកប្រធានក្រុមប្រឹក្សាក្រុង លោក លឹម សៀងហេង អភិបាល ក្រុងបាវិត លោក លោកស្រី អនុប្រធានមន្ទីរ-អង្គភាពនានាក្នុងខេត្ត លោកនាយករដ្ឋបាលសាលាក្រុង ការិយាល័យនានាជុំវិញក្រុង លោក លោកស្រី ចៅសង្កាត់ ស្មៀនសង្កាត់ និងមន្ត្រីពាក់ព័ន្ធមួយចំនួនទៀត។
លោក សេង សិលា អភិបាលរងខេត្ត បានថ្លែងថាគោលបំណងនៃការរៀបចំសិក្ខាសាលានាពេលនេះគឺដើម្បីធ្វើ ឱ្យគម្រោងសកម្មភាពជា អាទិភាព ស្នើឡើងដោយឃុំ សង្កាត់ មានភាពស៊ីច្រវាក់ប្រទាក់ក្រឡាគ្នាទៅនឹងគោល នយោបាយយុទ្ធសាស្ត្រចតុកោណរបស់រាជរដ្ឋាភិបាល ព្រមទាំងសកម្មភាពនានារបស់បណ្ដាមន្ទីរ-អង្គភាពជំនាញ និងអង្គការមិនមែនរដ្ឋាភិបាលឈានទៅសម្រេចបាននូវគោលដៅរួមនៃការអភិវឌ្ឍមូលដ្ឋានប្រកបដោយប្រសិទ្ធភាពឆ្លើយតបទៅ នឹងតម្រូវការជាក់ស្ដែងពិតប្រាកដរបស់ប្រជាពលរដ្ឋ ។
លទ្ធផលនៃអង្គសិក្ខាសាលាគឺ នៅឆ្នាំ២០២៣ ខាងមុខ គម្រោងវិនិយោគក្រុងបាវិតមានចំនួន ៤៨គម្រោង មានការសន្យាគាំទ្រចំនួន ពីរគម្រោង ក្នុងនោះមានការសន្យាគាំទ្រក្នុងគម្រោងទាំងពីរគម្រោង ។
ចំពោះគម្រោងវិនិយោគសង្កាត់ទាំង៥ ក្នុងក្រុង មានចំនួន ១៨១គម្រោង មានការសន្យាគាំទ្រចំនួន ៥៤គម្រោង ស្មើនឹង ២៩,៨ភាគរយក្នុងនោះមានការសន្យាគាំទ្រក្រៅគម្រោងមានចំនួន ២៦គម្រោងស្មើនឹង៤៨,១៥ភាគរយ ហើយមានការសន្យាគាំទ្រក្នុងគម្រោងមានចំនួន ២៨គម្រោង ស្មើនឹង៥១,៨៥ភាគរយ៕សរន / N