Views: 3
ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីអេក្វាទ័របានរាយការណ៍ថា អ្នកទោសយ៉ាងហោចណាស់ ១៥ នាក់បានស្លាប់ក្នុងកុបកម្មចុងក្រោយបំផុតដែលវាយប្រហារប្រព័ន្ធពន្ធនាគារពោរពេញដោយបញ្ហារបស់ប្រទេសអាម៉េរិកខាងត្បូងមួយនេះ។
សេចក្តីថ្លែងការណ៍ពី SNAI ដែលជាទីភ្នាក់ងារគ្រប់គ្រងពន្ធនាគាររបស់អេក្វាទ័រ បានឱ្យដឹងថា កុបកម្មបានបណ្តាលឱ្យមនុស្ស ១៥ នាក់ស្លាប់ និង ២១ នាក់រងរបួស។
ទីភ្នាក់ងារ SNAI បានប្រកាសមុននេះថា អង្គភាពយុទ្ធសាស្ត្រកំពុងបន្តប្រតិបត្តិការដើម្បីដណ្តើមការគ្រប់គ្រងមកវិញលើពន្ធនាគារ ដែលមានទីតាំងនៅក្នុងទីក្រុងឡាតាគូអាដូរ៉ាន (Latacuadoran) ភាគខាងត្បូងប្រទេសអេក្វាទ័រ។
ពន្ធនាគារ ដែលមានអ្នកទោសប្រហែល ៤.៣០០ នាក់ និងជាពន្ធនាគារធំជាងគេមួយនៅក្នុងប្រទេស គឺជាកន្លែងនៃការផ្ទុះអំពើហិង្សាសំខាន់ៗចំនួនប្រាំពីរ ដែលទាក់ទងនឹងការជួញដូរគ្រឿងញៀន ដែលបានបណ្តាលឱ្យអ្នកទោសជាង ៤០០ នាក់ស្លាប់ចាប់តាំងពីខែកុម្ភៈ ឆ្នាំ ២០២១។
អាជ្ញាធរមិនអាចទប់ស្កាត់អំពើហិង្សាដ៏ឃោរឃៅនេះបានទេ ដែលតែងតែប្រព្រឹត្តដោយប្រើកាំបិត និងពាក់ព័ន្ធនឹងការកាត់ក្បាល។
យោងតាមការប៉ាន់ប្រមាណជាផ្លូវការ ពន្ធនាគារ ដែលមានមនុស្សច្រើនកកកុញរបស់ប្រទេសនេះ គឺមានអ្នកទោសប្រហែល ៣៥.០០០ នាក់ដែលភាគច្រើនជាសមាជិកនៃក្រុមអន្ធពាលជាប់ពាក់ព័ន្ធនឹងការជួញដូរគ្រឿងញៀន។
មានព្រំប្រទល់ជាប់នឹងកូឡុំប៊ីនិងប៉េរូ ដែលជាប្រទេសផលិតកូកាអ៊ីនធំបំផុតរបស់ពិភពលោកអេក្វាទ័របម្រើជាច្រកចេញដំណើរសម្រាប់ការដឹកជញ្ជូនគ្រឿងញៀនជាចម្បងទៅកាន់សហរដ្ឋអាម៉េរិកនិងអឺរ៉ុប។
ក្នុងឆ្នាំ ២០២១ អេក្វាទ័ររឹបអូសបានថ្នាំញៀនចំនួន ២១០ តោន ដែលភាគច្រើនជាកូកាអ៊ីន។
កាលពីឆ្នាំមុន ប្រទេសដែលមានប្រជាជនចំនួន ១៧,៧ លាននាក់នេះ មានអត្រាឃាតកម្មចំនួន ១៤ នាក់ក្នុង ១០០.០០០ នាក់ ដែលស្មើជិតទ្វេដងនៃករណីឃាតកម្មឆ្នាំ ២០២០៕
ទីភ្នាក់ងារ SNAI បានប្រកាសមុននេះថា អង្គភាពយុទ្ធសាស្ត្រកំពុងបន្តប្រតិបត្តិការដើម្បីដណ្តើមការគ្រប់គ្រងមកវិញលើពន្ធនាគារនៅក្នុងទីក្រុងឡាតាគូអាដូរ៉ាន