Views: 1
ប្រែសម្រួល : កញ្ញាដាលីស (ដេល្លីម៉េល) ៖ ប្រមុខនៃសមាជិកណាតូអឺរ៉ុបចំនួនប្រាំបួនបានចេញសេចក្តីថ្លែងការណ៍រួមមួយដែលគាំទ្រផ្លូវឆ្ពោះទៅកាន់សមាជិកភាពសម្រាប់អ៊ុយក្រែននៅក្នុងសម្ពន្ធភាពសន្តិសុខដឹកនាំដោយសហរដ្ឋអាម៉េរិកមួយនេះ ហើយបានអំពាវនាវឱ្យប្រទេសទាំង ៣០ របស់ណាតូបង្កើនជំនួយផ្នែកយោធាសម្រាប់រដ្ឋាភិបាលក្រុងគៀវ។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គីបានធ្វើចំណាត់ការដ៏គួរឱ្យភ្ញាក់ផ្អើលមួយកាលពីថ្ងៃសុក្រដើម្បីស្នើសុំសមាជិកភាពណាតូយ៉ាងឆាប់បំផុតដើម្បីជាការឆ្លើយតបទៅនឹងការកាត់យកតំបន់ចំនួនបួនរបស់អ៊ុយក្រែនពីសំណាក់រុស្ស៊ី។
សមាជិកភាពណាតូត្រូវការការយល់ព្រមពីសមាជិកទាំង ៣០ ហើយអ៊ុយក្រែនទំនងជាមិនអាចចូលរួមបានឆាប់ៗនោះទេ។ក្នុងនាមជាប្រទេសដែលមានសង្គ្រាមរួចហើយនោះបានធ្វើឱ្យមានភាពស្មុគស្មាញដល់សំណើនេះ។
ប្រទេសណាតូទាំងប្រាំបួននៅអឺរ៉ុបកណ្តាលនិងខាងកើត ដែលបារម្ភថារុស្ស៊ីអាចកំណត់គោលដៅបន្ទាប់លើពួកគេ ប្រសិនបើរុស្ស៊ីមិនត្រូវបានបញ្ឈប់នៅអ៊ុយក្រែន បានជំរុញឱ្យមានការឆ្លើយតបទៅនឹងការកាត់យកទឹកដីនេះ។
មេដឹកនាំនៃប្រទេសឆែក អេស្តូនី ឡេតូនី លីទុយអានី ម៉ាសេដូនៀខាងជើង ម៉ុងតេណេហ្គ្រោ ប៉ូឡូញ រូម៉ានី និងស្លូវ៉ាគី បានចេញផ្សាយសេចក្តីថ្លែងការណ៍នៅលើគេហទំព័ររបស់ពួកគេកាលពីថ្ងៃអាទិត្យ ដោយនិយាយថា “យើងគាំទ្រអ៊ុយក្រែនក្នុងការការពារប្រឆាំងនឹងការឈ្លានពានរបស់រុស្ស៊ី ទាមទារ (ឱ្យរុស្ស៊ី) ដកចេញជាបន្ទាន់ពីដែនដីដែលបានកាន់កាប់ទាំងអស់ និងលើកទឹកចិត្តសម្ពន្ធមិត្តទាំងអស់ឱ្យបង្កើនជំនួយយោធាជាប់លាប់ដល់អ៊ុយក្រែន”។
សេចក្តីថ្លែងការណ៍និយាយថា ក្រុមមេដឹកនាំ “គាំទ្រយ៉ាងរឹងមាំនៅពីក្រោយការសម្រេចចិត្តរបស់កិច្ចប្រជុំកំពូលរបស់ណាតូក្នុងទីក្រុងប៊ុយការ៉េស (Bucharest) ឆ្នាំ ២០០៨ទាក់ទងនឹងសមាជិកភាពនាពេលអនាគតរបស់អ៊ុយក្រែន”។
នៅក្នុងកិច្ចប្រជុំកំពូលឆ្នាំ ២០០៨ សមាជិកណាតូបានស្វាគមន៍ចំពោះសេចក្តីប្រាថ្នារបស់អ៊ុយក្រែននិងហ្សកហ្ស៊ីក្នុងការចូលរួមប៉ុន្តែបានបដិសេធមិនផ្តល់ពេលវេលាច្បាស់លាស់សម្រាប់ការចូលជាសមាជិករបស់ប្រទេសទាំងពីរ។ សេចក្តីថ្លែងការណ៍កាលពីថ្ងៃអាទិត្យក៏មិនបាននិយាយអំពីពេលវេលាចូលជាសមាជិកនោះដែរ។
នៅពេលសួរអំពីពាក្យសុំរបស់លោកហ្សេលេនស្គីសម្រាប់ការចូលជាសមាជិកអង្គការណាតូឱ្យបានលឿន ទីប្រឹក្សាសន្តិសុខជាតិរបស់សេតវិមានលោក ជែក ស៊ូលីវ៉ាន់ (Jake Sullivan) បាននិយាយថា ដំណើរការដាក់ពាក្យសុំនៅទីក្រុងព្រុចសែល “គួរតែត្រូវធ្វើឡើងនៅតាមពេលផ្សេងៗគ្នា”។
អគ្គលេខាធិការអង្គការណាតូ លោក ជែន ស្តូលធិនបឺក (Jens Stoltenberg) មិនបាននិយាយអ្វីទាំងអស់នៅពេលត្រូវបានសួរអំពីការអំពាវនាវរបស់លោកហ្សេលេនស្គីដើម្បីចូលជាសមាជិកណាតូ។
លោក ឌីមីទ្រី មេតវេដេវ (Dmitry Medvedev) អនុប្រធានក្រុមប្រឹក្សាសន្តិសុខរបស់រុស្ស៊ី ដែលដឹកនាំដោយប្រធានាធិបតី វ្ល៉ាឌីមៀ ពូទីន បានចម្អកចំណាត់ការនេះ ដោយនិយាយថាសំណើរបស់លោកហ្សេលេនស្គី គឺស្មើនឹង “ការអង្វរណាតូដើម្បីពន្លឿនការចាប់ផ្តើមសង្គ្រាមលោកលើកទី ៣”៕
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គីបានធ្វើចំណាត់ការដ៏គួរឱ្យភ្ញាក់ផ្អើលមួយកាលពីថ្ងៃសុក្រដើម្បីស្នើសុំសមាជិកភាពណាតូយ៉ាងឆាប់បំផុតដើម្បីជាការឆ្លើយតបទៅនឹងការកាត់យកតំបន់ចំនួនបួនរបស់អ៊ុយក្រែនពីសំណាក់រុស្ស៊ី
