Views: 2
ប្រែសម្រួល : កញ្ញាដាលីស (ដេល្លីម៉េល) ៖ សមាជិកសភាជាន់ខ្ពស់អ៊ុយក្រែនម្នាក់បានអំពាវនាវកាលពីថ្ងៃពុធទី១កុម្ភៈឱ្យសហរដ្ឋអាម៉េរិកដាក់ទណ្ឌកម្មបន្ទាប់បន្សំលើចិននិងឥណ្ឌាប្រសិនបើពួកគេបន្តទិញថាមពលពីរុស្ស៊ី ដោយជំរុញឱ្យមានសាមគ្គីភាពទាំងស្រុងប្រឆាំងនឹងការឈ្លានពានរបស់រដ្ឋាភិបាលក្រុងមូស្គូ។
ក្នុងដំណើរទស្សនកិច្ចទៅកាន់ទីក្រុងវ៉ាស៊ីនតោន លោក អូឡេកសាន់ឌឺ មេរ៉េស្កូ (Oleksandr Merezhko) ដែលជាប្រធានគណៈកម្មាធិការកិច្ចការបរទេសក្នុងសភាអ៊ុយក្រែនក៏បានអំពាវនាវផងដែរឱ្យមានទំនាក់ទំនងកាន់តែខ្លាំងជាមួយតៃវ៉ាន់ ជាកោះប្រជាធិបតេយ្យគ្រប់គ្រងដោយខ្លួនឯងដែលទាមទារដោយរដ្ឋាភិបាលក្រុងប៉េកាំង។
លោកមេរ៉េស្កូបាននិយាយថាលោកបានប្រឈមមុខនឹងការរិះគន់នៅក្នុងស្រុកថាជំហរតឹងរ៉ឹងលើការទិញប្រេងអាចជំរុញឱ្យចិនបង្កើនការគាំទ្រដល់រុស្ស៊ីខណៈរដ្ឋាភិបាលក្រុងប៉េកាំងពេលនេះមិនទាន់ហ៊ានផ្តល់ជំនួយយោធាដល់រដ្ឋាភិបាលក្រុងមូស្គូនៅឡើយ។
លោកបានប្រាប់អ្នកយកព័ត៌មាននៃសមាគមអ្នកឆ្លើយឆ្លងព័ត៌មានរបស់ក្រសួងការបរទេសអាម៉េរិកថា “ខ្ញុំបានព្យាយាមពន្យល់ថានេះមិនមែនជាបញ្ហាទេ។ ចិនមិនខ្លាចអ៊ុយក្រែនទេចិនខ្លាចទណ្ឌកម្មរបស់អាម៉េរិក”។
លោកបាននិយាយថា “នេះមានន័យថា សហរដ្ឋអាម៉េរិកអាចនិងគួរតែរារាំងចិនកុំអោយជួយរុស្ស៊ី និងដាក់ចេញទណ្ឌកម្មបន្ទាប់បន្សំ ដើម្បីបញ្ឈប់ចិនពីការផ្តល់ហិរញ្ញប្បទានដល់សេដ្ឋកិច្ចរុស្ស៊ីនិងក្បាលម៉ាស៊ីនយោធារុស្ស៊ីតាមរយៈការទិញប្រេងនិងឧស្ម័នរបស់រុស្ស៊ី”។
សមាជិកសភារបស់បក្សកាន់អំណាចរូបនេះបាននិយាយថា លោកធ្លាប់បានរស់នៅក្នុងទីក្រុងញូវដេល្លី ហើយយល់ឃើញថាបញ្ហានៃការទិញប្រេងរបស់ឥណ្ឌាគឺ”ឈឺចាប់ណាស់”ប៉ុន្តែលោកក៏គាំទ្រការដាក់ទណ្ឌកម្មប្រឆាំងនឹងអ្នកទិញពីរុស្ស៊ីនៅក្នុងប្រទេសលទ្ធិប្រជាធិបតេយ្យដ៏ធំបំផុតរបស់ពិភពលោកមួយនេះផងដែរ។
លោកបាននិយាយថា “ពួកគេគួរតែស្របគ្នា។ នេះគឺជាជម្លោះជាសកលរវាងលទ្ធិប្រជាធិបតេយ្យ ពោលគឺពិភពលោកសេរី និងរបបផ្តាច់ការ”។
“មិនគួរមានការបង្កគ្រោះថ្នាក់ណាមួយ ដោយសារផលប្រយោជន៍សេដ្ឋកិច្ចសម្ភារៈនោះទេ”។
ចិននិងឥណ្ឌា ដែលមានចំនួនប្រជាជនរាប់ពាន់លាននាក់ ពឹងផ្អែកខ្លាំងលើថាមពលនាំចូល និងមានទំនាក់ទំនងជាប្រវត្តិសាស្ត្រជាមួយរុស្ស៊ី។
សហរដ្ឋអាម៉េរិកបានដាក់ទណ្ឌកម្មបន្ទាប់បន្សំកាលពីមុនអស់ជាច្រើនឆ្នាំលើក្រុមហ៊ុនបរទេសដែលទិញប្រេងពីអ៊ីរ៉ង់។
លោកមេរ៉េស្កូកំពុងបំពេញទស្សនកិច្ចនៅទីក្រុងវ៉ាស៊ីនតោនជាមួយសមភាគីរបស់គាត់មកពីប៉ូឡូញនិងលីទុយអានីខណៈពួកគេជំរុញសមាជិកសភានិងអ្នកផ្សេងទៀតឱ្យគាំទ្រអ៊ុយក្រែនអោយគាំទ្រគំនិតរបស់គេ៕
លោក អូឡេកសាន់ឌឺ មេរ៉េស្កូ (កណ្តាល) និង សមភាគីរបស់គាត់មកពីប៉ូឡូញនិងលីទុយអានីកំពុងបំពេញទស្សនកិច្ចនៅទីក្រុងវ៉ាស៊ីនតោនដើម្បីជំរុញសមាជិកសភា និងអ្នកផ្សេងទៀតឱ្យគាំទ្រអ៊ុយក្រែន