Views: 2
ដោយ: ប.ខុន / ភ្នំពេញ: សម្ពាធទាបសកម្មនៅក្នុងសមុទ្រចិនខាងត្បូង ដែលមានដំណើរទៅរកកោះហៃណាំ អាចនឹងវិវត្តទៅវិសម្ពាធជាកូនព្យុះ នៅមុនពេលទៅដល់ឆ្នេររបស់ប្រទេសវៀតណាមខាងជើង អំឡុងថ្ងៃទី១១ខែសីហា។ នៅពេលបាតុភូតនេះ វិវត្តទៅជាវិសម្ពាធនៅថ្ងៃទី៩ខែសីហា នឹងបង្កឱ្យមានខ្យល់ខ្លាំងរលកសមុទ្រខ្ពស់ៗ និងមានភ្លៀងធ្លាក់ច្រើននៅលើបណ្តា ខេត្តជាប់មាត់សមុទ្រ។
លោក ចាន់ យុត្ថា អ្នកនាំពាក្យនិងជារដ្ឋលេខាធិការក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី៦ខែសីហាឆ្នាំ២០២២ថា សម្ពាធទាបសកម្ម មួយនៅក្នុងសមុទ្រចិនខាងត្បូងវាអាចនឹងបង្កើនឥទ្ធិពលទៅជាវិសម្ពាធនៅអំឡុងថ្ងៃទី៩ខែសីហា ដោយមានដំណើរទៅរកកោះហៃណាំ មុនទៅដល់ឆ្នេររបស់ប្រទេសវៀតណាម ខាងជើងនៅថ្ងៃទី១១ខែសីហា ហើយអាចបង្កើនឥទ្ធិពលដល់កម្រិតជាកូនព្យុះ(មានកម្រិតលើវិសម្ពាធបន្តិច)មុននឹងឡើងគោក។
អ្នកនាំពាក្យក្រសួងជំនាញខាងលើនិយាយឱ្យដឹងទៀតថាសម្ពាធទាបសកម្មនេះនៅពេលនេះវាមិនមានឥទ្ធិពលអ្វីដល់ប្រទេសកម្ពុជាទេ តែនៅពេលវាវិវត្តទៅជាវិសម្ពាធធ្វើឱ្យតំបន់មាត់សមុទ្ររបស់កម្ពុជាមានខ្យល់ខ្លាំងនិងភ្លៀងច្រើន។ របាយទឹកភ្លៀងធ្លាក់រាយប៉ាយនៅទូទាំងប្រទេសពេលនេះ ស្ថិតនៅក្នុងកម្រិតពីមធ្យមទៅបង្គួរតែនៅអំឡុងពី ថ្ងៃទី៨ដល់ទី១០ខែសីហា អាចមានខ្យល់ខ្លាំង រលកសមុទ្រខ្ពស់ៗនិងភ្លៀងច្រើនសម្រាប់ខេត្តនៅតំបន់មាត់សមុទ្រ។
ក្រសួងធនធានទឹកនិងឧតុនិយមកាលពីថ្ងៃទី០២ខែសីហាឆ្នាំ២០២២បានជូនដំណឹងស្តីពីស្ថានភាពអាកាសធាតុសម្រាប់ពីថ្ងៃទី៣ដល់ថ្ងៃទី៩ខែសីហាថាព្រះ រា ជាណាចក្រកម្ពុជាទទួលរងឥទ្ធិពលពីជ្រលងប្រព័ន្ធសម្ពាធទាប ( ITCZ )ដែលអូសបន្លាយកាត់លើភាគខាងជើងប្រទេសថៃ ឡាវ វៀតណាម ជាមួយនឹងខ្យល់មូសុងនិរតីបក់ក្នុងល្បឿនបង្គួរទៅខ្លាំងលើតំបន់មាត់សមុទ្របង្កឱ្យមានភ្លៀងធ្លាក់ក្នុងកម្រិតពីមធ្យមទៅច្រើនលាយឡំទៅដោយផ្គរ រន្ទះ បង្កជាជំនន់ទឹកភ្លៀង។
នៅក្នុងសេចក្តីជូនដំណឹងបានសរសេរទៀតថា ស្ថានភាពបែបខាងលើធ្វើឲ្យបណ្តាខេត្តនៅតំបន់វាលទំនាបកណ្តាល មានសីតុណ្ហភាពអប្បបរមាពី២៣ទៅ២៥អង្សាសេ និងសីតុណ្ហភាពអតិបរមាមានពី៣២ទៅ៣៤អង្សាសេ។ អាចមានភ្លៀងធ្លាក់ក្នុងកម្រិតពីមធ្យមទៅបង្គួរ ក្នុងនោះផ្នែកខ្លះមានភ្លៀងធ្លាក់ច្រើន លាយឡំទៅដោយផ្គររន្ទះ និងខ្យល់កន្ត្រាក់។ នៅអំឡុងថ្ងៃទី៦ដល់៩ខែសីហាបណ្តាខេត្ត និងរាជធានីនៅវាលទំនាបភាគខាងត្បូងភ្លៀងអាចធ្លាក់នៅក្នុងកម្រិតពីតិចទៅមធ្យម ។
សម្រាប់បណ្តាខេត្តនៅជាប់ជួរភ្នំដងរែក និងខ្ពង់រាបភាគឦសានមានសីតុណ្ហភាពអប្បបរមាពី២២ទៅ២៤អង្សាសេ និងសីតុណ្ហភាពអតិបរមាមានពី៣១ទៅ៣៣អង្សាសេ។ អាចមានភ្លៀងនៅក្នុងកម្រិតពី មធ្យមទៅច្រើនលាយឡំទៅដោយ ផ្គរ រន្ទះនិងខ្យល់កន្ត្រាក់។
នៅតំបន់មាត់សមុទ្រមានសីតុណ្ហភាពអប្បបរមាពី២៣ទៅ២៥អង្សាសេនិងសីតុណ្ហភាពអតិបរមាមានពី៣១ទៅ៣៣អង្សាសេ ។ អាចមានភ្លៀងធ្លាក់ក្នុងកម្រិតពីមធ្យមទៅច្រើនលាយឡំទៅដោយផ្គរ រន្ទះ។នៅអំឡុងពីថ្ងៃទី៦ដល់ថ្ងៃទី៩ខែសីហា អាចមានភ្លៀងធ្លាក់ច្រើនជាបន្តបន្ទាប់ធ្វើឲ្យផ្នែកមួយចំនួននៅក្នុងភូមិសាស្ត្រខេត្តកោះកុង និងខេត្តព្រះសីហនុ ប្រឈមនឹងជំនន់ទឹកភ្លៀង ។ នៅលើផ្ទៃសមុទ្រអាចមានភ្លៀងខ្យល់បក់បោកខ្លាំងនិងរលកសមុទ្រខ្ពស់ៗ៕