Views: 6
ដោយៈ សុផល / ភ្នំពេញ៖ ក្រសួងវប្បធម៌ និងវិចិត្រសិល្បៈ នៅថ្ងៃទី៩ ខែសីហានេះ បានជូនដំណឹងថា សម្បត្តិវប្បធម៌ខ្មែរ ចំនួន ៣០រូប នឹងត្រូវបញ្ជូនពីសហរដ្ឋអាមេរិក មកប្រទេសកម្ពុជាវិញ។ វត្ថុទាំងនេះ ជាប់ពាក់ព័ន្ធនឹងករណីកាន់កាប់វត្ថុបុរាណ ដោយខុសច្បាប់ ដែលត្រូវបានរឹបអូស ដោយរដ្ឋអាជ្ញាសហរដ្ឋអាមេរិក នៃសង្កាត់ភាគខាងត្បូង ក្រុងញូវយ៉ក សហការជាមួយការិយាល័យស៊ើបអង្កេត សន្តិសុខមាតុភូមិ សហរដ្ឋអាមេរិក អនុលោមតាមអនុស្សរណៈ នៃការយោគយល់គ្នា រវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិក ស្តីពីការដាក់កំរិតហាមប្រាម នូវការនាំចូលលើប្រភេទ នៃវត្ថុបុរាណរបស់កម្ពុជា។
សេចក្តីជូនដំណឹង បានឲ្យដឹងថាៈ ក្នុងចំណោមសម្បត្តិវប្បធម៌ខ្មែរនេះ មានរូបបដិមា សំខាន់ៗ មួយចំនួន ផ្នែកពុទ្ធសាសនា និងព្រហ្មញ្ញសាសនា ដូចជា រូបចម្លាក់ដ៏ពិចិត្រ «ព្រះស្កន្ទគង់លើក្ងោក» និង «ព្រះគណេស» ដែលត្រូវបានលួចយកចេញពីប្រាសាទ ក្នុងរមណីយដ្ឋានកោះកេ អតីតរាជធានី នៃអាណាចក្រខ្មែរ នៅសតវត្សរ៍ទី១០ នៃ គ.ស ។ ប្រាសាទកោះកេរ ធ្លាប់ជាគោលដៅ នៃការលួចទ្រង់ទ្រាយធំ អស់ជាច្រើនឆ្នាំ នៅក្នុងអំឡុងសម័យសង្គ្រាម។
សូមបញ្ជាក់ថា នៅថ្ងៃទី៨ ខែសីហា ឆ្នាំ២០២២ លោក កែវ ឈា ឯកអគ្គរាជទូតកម្ពុជា ប្រចាំសហរដ្ឋអាមេរិក តំណាងឱ្យរាជរដ្ឋាភិបាលកម្ពុជា និងលោក Damien Williams អគ្គរដ្ឋអាជ្ញាសហរដ្ឋអាមេរិក នៃសង្កាត់ភាគខាងត្បូង ក្រុងញូវយ៉ក បានចូលរួមនៅក្នុងពិធីប្រគល់-ទទួល សម្បត្តិវប្បធម៌ខ្មែរ ចំនួន ៣០ រូបនេះ នៅទីក្រុងញូវយ៉ក។ ក្រសួងវប្បធម៌ កំពុងធ្វើការជាមួយ ក្រុមហ៊ុនដឹកជញ្ជូន ដើម្បីចាត់ចែងការដឹកវត្ថុ ទាំង ៣០ រូប មកកម្ពុជា ក្នុងពេលវេលាខាងមុខនេះ។
លោកស្រី បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានថ្លែងថាៈ «យើងពិតជាមានសេចក្តីរំភើប ទទួលស្វាគមន៍ នៃការវិលត្រឡប់មកវិញ នូវរតនសម្បត្តិដ៏ល្អឯកទាំងនេះ ដែលជាព្រលឹងបុព្វបុរសខ្មែរ ជាច្រើនជំនាន់ និងតំណាងឱ្យ ភាពរុងរឿងនៃចក្រភពខ្មែរ។
លោកស្រី បានបន្ថែមថាៈ ការបញ្ជូនមកវិញនេះ គឺអាចសម្រេចទៅបាន ដោយសារកិច្ចសហប្រតិបត្តិការ និងការខិតខំប្រឹងប្រែងរួមគ្នា រវាងរដ្ឋាភិបាល នៃប្រទេសទាំងពីរ (កម្ពុជា និងសហរដ្ឋអាមេរិក) និងក៏ដោយសារប្រទេសកម្ពុជា មានសុខសន្តិភាព ពេញលេញ តាមរយៈនយោបាយឈ្នះ-ឈ្នះ ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលផ្តល់ឱកាស ក្នុងការនាំមកវិញ នូវព្រលឹងបុព្វបុរសខ្មែរ ដែលបានរសាត់ចាកឆ្ងាយ ពីមាតុភូមិកំណើត អស់ជាច្រើនឆ្នាំ នាសម័យសង្គ្រាម និងអសន្តិសុខ៕/V
