Views: 10
ដោយៈ គង់ហេង / កំពង់ចាមៈ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងថាៈ ដើម្បីក្លាយខ្លួនជានគរបាល មានការយល់ដឹងពី វិជ្ជាជីវៈ គុណវុឌ្ឍិ គុណធម៌ ប្រតិបត្តិការប្រកបដោយ ការទទួលខុសត្រូវ ពោលគឺ ចាំបាច់ត្រូវឆ្លងកាត់វគ្គសិក្សាវិជ្ជាជីវៈជាមុន។
សម្តេចក្រឡាហោម ស ខេង បានថ្លែងបែបនេះ នៅក្នុងឱកាសដែលសម្តេច អមដោយ លោក អ៊ុន ចាន់ដា អភិបាលខេត្តកំពង់ចាម រួមជាមួយអភិបាលខេត្តត្បូងឃ្មុំ អភិបាលខេត្តព្រៃវែង និងអភិបាលខេត្តស្វាយរៀង អញ្ជើញចូលរួមបើកការដ្ឋាន ស្ថាបនាផ្លូវបេតុង ប្រព័ន្ធលូបង្ហូរទឹក អគារស្នាក់នៅ និងសួរសុខទុក្ខសិស្សនគរបាល វគ្គបណ្តុះបណ្តាលកម្រិតបឋមវិជ្ជាជីវៈនគរបាល ជំនាន់ទី១៥ លើកទី២ ចំនួន ១២៧ នាក់ នៅសាលានគរបាលជាតិ ភូមិភាគ២ ស្ថិតក្នុងផ្កាយព្រឹក ឃុំមៀន ស្រុកព្រៃឈរ ខេត្តកំពង់ចាម នៅព្រឹកថ្ងៃទី ៩ សីហា នេះ។
សម្តេច បានថ្លែងថាៈ ទាក់ទងនឹងកំណែទម្រង់កងកម្លាំងប្រដាប់អាវុធនគរបាលជាតិ គឺដើម្បីឱ្យក្លាយជានគរបាល ត្រូវមានការយល់ដឹងពីវិជ្ជាជីវៈ ជាគុណវុឌ្ឍិ ជាគុណធម៌ និងប្រតិបត្តិការប្រកបដោយការទទួលខុសត្រូវ គឺចាំបាច់ត្រូវសិក្សារៀនសូត្រមិនអាចខ្វះបាន ទាំងក្នុងដំណាក់កាលកន្លងទៅ ឬទៅអនាគត គឺត្រូវបានប្រឡងជាប់ជ្រើសរើសជានគរបាល ហើយត្រូវឆ្លងកាត់វគ្គសិក្សា គឺមិនអាចប្រឡងជាប់ហើយ បានចូលក្របខណ្ឌ ដោយស្វ័យប្រវត្តិនោះទេ។ ពិសេស ត្រូវឆ្លងកាត់វគ្គមូលដ្ឋានរយៈពេល បួនខែ ដូចសិស្សនគរបាល ១២៧ នាក់នេះ។
សម្តេច បានបន្ថែមថាៈ នេះជាលទ្ធផលកំណែទម្រង់ ជាក់ស្តែងរបស់នគរបាល គឺកាលណាបានសិក្សា នៅពេលទៅប្រតិបត្តិ បំពេញការងាររក្សាសន្តិសុខ សណ្តាប់ធ្នាប់ ក៏ធ្វើការងារបានល្អដែរ គឺមានជំនាញហើយ។ មួយវិញទៀត សម្រាប់អ្នកផ្ទេរពីស៊ីវិល ក្របខណ្ឌផ្សេងៗ ចូលនគរបាល មានឋានៈ តួនាទី ក៏ត្រូវតែរៀនសូត្រទៀត គឺខុសពីក្របខណ្ឌមួយចំនួន។ ប៉ុន្តែជាទូទៅ ក្របខណ្ឌណាក៏ដោយ អ្នកចេញពីសាលារៀន ទើបប្រឡងចូលក្របខណ្ឌ យ៉ាងណា ក៏ត្រូវធ្វើកម្មសិក្សា រៀនសូត្ររយៈពេលខ្លី មធ្យម ឬធ្វើកម្មសិក្សាផ្សេងៗ តាមការចាំបាច់។
សម្តេច បានបន្តថាៈ ប៉ុន្តែនគរបាលមិនអាចធ្វើសិន ហើយបានទៅរៀននោះទេ គឺរៀនសិន បានទៅធ្វើការងារ គឺនេះជាស្តង់ដារជារួម ហើយគេឱ្យតម្លៃណាស់ កាលណា ដែលបានរៀនហើយ ទទួលសញ្ញាបត្រនេះ គឺគេប្រកាសក្របខណ្ឌធ្វើពិធីប្រកាសអធិបអធម ជាឧឡារិក មានការចូលរួមពីឪពុកម្តាយ បងប្អូន សាច់ញាតិ អបអរសាទរ ៕/V
