ភ្នំពេញ៖ ដូចការគ្រោងទុក នៅព្រលប់ថ្ងៃទី៣០វិច្ឆិកានេះ សម្តេចតេជោ នាយករដ្ឋមន្ត្រី ហ៊ុន សែន បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបិទការប្រកួតកីឡាជាតិ លើកទី៣ និងកីឡាជនពិការជាតិ លើកទី១ នៅពហុកីឡដ្ឋានជាតិមរតកតេជោ។
ពិធីបិទព្រឹត្តិការណ៍កីឡាជាតិ និងកីឡាជនពិការ នាល្ងាចនេះ អញ្ជើញចូលរួមពីមហាជន យ៉ាងច្រើនកុះករ ព្រមទាំងមានកម្មវិធីសំខាន់ៗ និងទាក់ទាញជាច្រើនទៀតផងដែរ។
ព្រឹត្តិការណ៍នេះ បានប្រារព្ធពិធីបើកជាផ្លូវការ នៅថ្ងៃទី២១ វិច្ឆិកា ដោយមានការប្រកួតកីឡាច្រើន ប្រភេទ។ សម្រាប់ការប្រកួតកីឡាជាតិ មានកីឡា ៣៨ប្រភេទ ចូលរួម និងសម្រាប់កីឡា ជនពិការជាតិ ឬហៅថា ប៉ារ៉ាហ្គេម មាន ៧ប្រភេទកីឡា ចូលរួម ដោយមានកីឡាករ កីឡាការិនី មកពីរាជធានី ខេត្ត និងក្រសួង សរុបចំនួន ២៨ស្ថាប័ន។
នេះគឺជាព្រឹត្តិការណ៍កីឡាដ៏ធំបំផុតមួយ សម្រាប់ប្រទេសកម្ពុជា ដើម្បីឆ្ពោះទៅការប្រកួតកីឡាអាស៊ានហ្គេម និងកីឡាអាស៊ានប៉ារ៉ាហ្គេម ដែលកម្ពុជា ធ្វើជាម្ចាស់ផ្ទះ នៅឆ្នាំ២០២៣៕
