Views: 2
ដោយៈ តារារិទ្ធ / ភ្នំពេញៈ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានស្នើឲ្យក្រសួងអប់រំ និង សាលារាជធានីភ្នំពេញ សិក្សាមើលដី នៅតំបន់ពហុកីឡដ្ឋានមរតកតេជោ ដើម្បីកសាង អន្តេវាសិកដ្ឋាន សម្រាប់ការស្នាក់នៅរបស់និស្សិត ជាស្រ្តី ។
សម្តេចតេជោ ហ៊ុន សែន បានថ្លែងបែបនេះ នៅព្រឹកថ្ងៃទី២ ខែកុម្ភៈ ក្នុងឱកាសអញ្ជើញ ជាអធិបតី ក្នុងពិធីជួបសំណេះសំណាល និងជូនរង្វាន់ដល់សិស្សនិទ្ទេស A ទូទាំងប្រទេស ចំនួន ១.០៤៩ នាក់ ។
សម្តេចតេជោ បានថ្លែងថាៈ “ខ្ញុំដាក់បញ្ជានេះ ឲ្យអភិបាលរាជធានី ពិនិត្យមើលលទ្ធភាព ក្នុងការប្រើប្រាស់ដីធ្លី នៅក្នុងរាជធានីភ្នំពេញ ដើម្បីកសាងអន្តេវាសិកដ្ឋាន សម្រាប់និស្សិត ស្ត្រីរបស់យើង។ ខ្ញុំចង់បានចំនួនពីរ បីរយគ្រែទៀត យើងខ្វះកន្លែងស្នាក់នៅ សម្រាប់ និស្សិតជាស្រ្តី។ សម្តេចបានបន្តថាៈ និស្សិតជាបុរស អាចស្នាក់នៅវត្តលោកបាន ប៉ុន្តែនិស្សិតជានារី មិនអាចនៅវត្តលោកបានទេ។
សម្តេចបានបន្តថាៈ ដីនៅតំបន់មរតកតេជោ គឺយើងនៅសល់ដីច្រើន យើងអាចរៀបចំ កសាងអន្តេវាសិកដ្ឋាន សម្រាប់សិស្ស នៅទីនោះបាន។ ដូច្នេះសុំសិក្សាមើលជាមួយគ្នា សាលាក្រុងជាមួយក្រសួងអប់រំ ហើយនិងផ្នែកកីឡា យើងមានដីនៅទីនោះហើយ គឺយើង យកដីនៅទីនោះ ធ្វើតែម្ដង មួយឆ្នាំ យើងធ្វើបន្តិច មួយឆ្នាំយើងធ្វើបន្តិច មួយឆ្នាំ ១០០ គ្រែ ឬ ២០០ គ្រែ យើងធ្វើជាបន្តទៅឆ្នាំក្រោយៗទៀត ដើម្បីបំពេញសេចក្តីត្រូវការ៕/V-PC
