Views: 1
ដោយ: ចាន់តូ / ភ្នំពេញ: ស្ត្រីចំណាស់ម្នាក់ ត្រូវបានឃាតករវាយសម្លាប់ជាច្រើនត្បូងចប បណ្តាលឲ្យដេកស្លាប់ នៅមុខផ្ទះ ហើយឃាតករដែលគេសង្ស័យថា ជាចៅប្រុសញៀនថ្នាំ បានគេចខ្លួនបាត់។ ហេតុការណ៍កើតឡើង កាលពីវេលាម៉ោងប្រមាណ៤និង៤០នាទីព្រឹក ថ្ងៃទី១០ ខែមិថុនា ឆ្នាំ២០២២ នៅមុខផ្ទះលេខ១៦៧ ផ្លូវជាតិលេខ៥ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
មន្ត្រីនគរបាលបានឲ្យដឹងថា ស្ដ្រីរងគ្រោះមានឈ្មោះ មុំ ហៀង អាយុ៧៧ឆ្នាំ មានលំនៅផ្ទះកើតហេតុខាងលើ ត្រូវឃាតករវាយនឹងត្បូងចបកាប់ បណ្តាលឲ្យដួលផ្កាប់មុខ ស្លាប់នៅលើថាសជណ្តើរឡើងទៅផ្ទះ។
តាមការបំភ្លឺពីកូនស្រីសពបានឲ្យដឹងថា នៅមុនពេលកើតហេតុ ខណៈពេលដែលគាត់កំពុងតែដេកនៅលើផ្ទះ ស្រាប់តែឮសូរសំឡេងម្តាយរបស់គាត់ស្រែក និងឮសូរសម្លេងវាយ។ ភ្លាមៗ គាត់ក៏បានចុះមកមើល ឃើញម្តាយបានដួលផ្កាប់មុខ ស្លាប់បាត់ទៅហើយ ដោយមានស្នាមបែកក្បាល និងឈាមហូរស្រោចលើថាសជណ្តើរ។ នៅកន្លែងកើតហេតុនោះ មានចបកាប់ដងដែកមួយនៅពីលើសព។
តាមក្រុមគ្រួសារបានឲ្យដឹងទៀតថា ជារៀងរាលថ្ងៃ ម្តាយរបស់ខ្លួន តែងតែក្រោកពីយប់ ដើម្បីដាំបាយ និងដាំបបរ មិននឹកស្មានថា ត្រូវបានជនដៃដល់វាយសម្លាប់បែបនេះ។
បន្ទាប់ពីមានមនុស្សស្លាប់ សមត្ថកិច្ចជំនាញក៏បានចុះទៅត្រួតពិនិត្យសព បានបញ្ជាក់ថា សពមានស្នាមរបួសដាច់រយះ ផុងលលាដ៍ក្បាលជាច្រើនកន្លែង ជាំភ្នែក និងដើមដៃស្តាំបាក់ឆ្អឹង។ សមត្ថកិច្ចក៏បានសន្និដ្ឋានថា លោកយាយរូបនោះ ស្លាប់ដោយសារតែប៉ះទង្គិចក្បាលធ្ងន់ធ្ងរ ដែលគេសង្ស័យថា ឃាតករបានប្រើចប់កាប់ដែលបន្សល់ទុកវាយទៅលើលោកយាយ បណ្តាលឲ្យស្លាប់រួចគេចខ្លួនបាត់។
តាមព័ត៌មានបានឲ្យដឹងថា បន្ទាប់ពីមានឃាតកម្មនេះ ចៅប្រុសស្ត្រីចំណាស់រូបនោះ ក៏បានបាត់ខ្លួន ហើយសមត្ថកិច្ចក៏ដូចជាក្រុមគ្រួសារមានការសង្ស័យថា ចៅប្រុសរូបនោះ ដែលជាមនុស្សញៀនថ្នាំ ជាឃាតករ វាយសម្លាប់លោកយាយខ្លួន ឯង។ ទោះបីជាយ៉ាងណា សមត្ថកិច្ច កំពុងតែស្រាវជ្រាយជុំវិញករណីឃាតកម្មនេះ៕
