Views: 2
ប្រែសម្រួលៈបំណង(ស្ត្រេតថែមស៍,ដេល្លីម៉េល)៖ សហរដ្ឋអាម៉េរិកមិនសង្កេតឃើញសញ្ញាណាដែលបញ្ជាក់ថារុស្ស៊ីកំពុងត្រៀមប្រើសព្វាវុធនុយក្លេអ៊ែរទេ ទោះជាប្រធានាធិបតីរុស្ស៊ីលោក វ្ល៉ាឌីមៀ ពូទីន បានចេញការព្រមានដដែលៗបែបនេះក្តី នេះបើតាមលេខាព័ត៌មានសេតវិមានបាននិយាយកាលពីថ្ងៃអង្គារទី៤តុលា។
សូមបញ្ជាក់ថា លោកពូទីន បានបង្កើនសង្គ្រាមចំណាស់ប្រាំពីរខែរបស់លោកនៅអ៊ុយករែនជាមួយនឹងការប្រកាសកំណែនទ័ព កាត់យកទឹកដីអ៊ុយក្រែនមួយផ្នែកបញ្ចូលក្នុងរុស្ស៊ីនិងគំរាមប្រើនុយក្លេអ៊ែរដើម្បីការពារទឹកដីរុស្ស៊ី។
ប្រធានាធិបតីរុស្ស៊ីលោក វ្ល៉ាឌីមៀ ពូទីន បានព្រមានប្រើនុយក្លេអ៊ែរដើម្បីការពារទឹកដីរុស្ស៊ី រួមទាំងទឹកដីអ៊ុយក្រែនដែលលោកទើបដាក់ជាឧបសម្ពន្ធរបស់រុស្ស៊ីកាលពីពេលថ្មីៗ
លោខាព័ត៌មានការីន ហ្សង់ព្យែរ( Karine Jean-Pierre)បាននិយាយថា«យើងយកចិត្តទុកដាក់អំពីការគំរាមនុយក្លេអ៊ែរខ្លាំងណាស់ តែខ្ញុំចង់និយាយថា…យើងមិនបានសង្កេតឃើញហេតុផលអ្វីដែលត្រូវកែសម្រួលស្ថានភាពនុយក្លេអ៊ែយុទ្ធសាស្ត្ររបស់យើងទេ។យើងក៏មិនឃើញមានសញ្ញាណាមួយដែលថារុស្ស៊ីកំពុងត្រៀមប្រើសព្វាវុធនុយក្លេអ៊ែរក្នុងពេលឆាប់ៗដែរ»។
តែបើតាមការផ្សាយរបស់សារព័ត៌មានដេល្លីម៉េលរបស់អង់គ្លេស រថភ្លើងដឹកជំនិញដ៏វែងជាមួយនឹងគ្រឿងបរិក្ខារយោធាពិសេស រួមជាមួយកងពលនុយក្លេអ៊ែររបស់រុស្ស៊ី ត្រូវបានគេឃើញកំពុងចល័តទីដោយបង្កអោយមានការសង្ស័យអំពីសង្គ្រាមកាន់តែធ្ងន់ធ្ងរទៅមួយ។
រថពាសដែកនិងយានយន្តយោធារុស្ស៊ីត្រូវបានឃើញដឹកតាមរថភ្លើងនៅរុស្ស៊ីភាគកណ្តាលកាលពីដើមសប្តាហ៍
ដេល្លីម៉េលបាននិយាយកាលពីថ្ងៃចន្ទទី៣តុលាថា រថពាសដែកBPM-97និងយានយន្តយោធាដទៃទៀតត្រូវបានឃើញធ្វើដំណើរកាត់រុស្ស៊ីភាគកណ្តាល។រថពាសដែលទាំងនោះជារបស់កងពលពិសេសរបស់ក្រសួងការពារជាតិរុស្ស៊ី ដែលមានភារកិច្ចស្តុកទុក ថែរក្សានិងផ្តល់សព្វាវុធទៅកាន់កងកម្លាំងរ៉ុក្កែតយុទ្ធសាស្ត្រ ដែលគ្រប់គ្រងកាំជ្រួចនុយក្លេអ៊ែរផងដែរ។
អ្នកវិភាគយោធាលោក ខុនរ៉ាត មូស៊ីកា(Konrad Musyka)បានអះអាងថា ការបញ្ជូនកងឯកភាពទ័ពដូច្នេះអាចជាសញ្ញានៃការបង្កើនជម្លោះដែលនឹងចូលមកដល់ឆាប់ៗមួយពីប្រធានាធិបតីនិយមសង្គ្រាមពូទីន ឬជាសញ្ញានៃសមយុទ្ធនុយក្លេអ៊ែរទ្រង់ទ្រាយធំ។
ការចល័តយុទ្ធោបករណ៍ពិសេសនេះកើតឡើងចំពេលអង្គការណាតូបានព្រមានរដ្ឋជាសមាជិកថា នាវាមុជទឹកបំពាក់គ្រាប់នុយក្លេអ៊ែរBelgorod របស់រុស្ស៊ីបានចាកចេញពីមូលដ្ឋាននៅសមុទ្រស របស់វានៅពេលសម្ពន្ធមិត្តដ៏សំខាន់របស់ពូទីនលោក រ៉ាមហ្សាន់ កាឌីរ៉ូវ(Ramzan Kadyrov)បាននិយាយថា យោធារុស្ស៊ីគួរប្រើគ្រាប់បែកនុយក្លេអ៊ែរកំលាំងខ្សោយដើម្បីកែប្រែសភាពការណ៍លើសមរភូមិអ៊ុយក្រែន៕
សម្ពន្ធមិត្តដ៏សំខាន់របស់ពូទីនបាននិយាយថា យោធារុស្ស៊ីគួរប្រើគ្រាប់បែកនុយក្លេអ៊ែរកំលាំងខ្សោយដើម្បីកែប្រែសភាពការណ៍លើសមរភូមិអ៊ុយក្រែន